U vuhłavoj viežy znachodziŭsia kabiniet Lva Sapiehi, a ŭ paŭdniovaj — kaplica.
Archieołahi na terytoryi Ružanskaha pałacavaha kompleksu raskapali dźvie viežy pieršapačatkovaha zamka Sapiehaŭ kanca XVI — pačatku XVII stahodździa, paviedamili BiełTA ŭ adździele kultury Pružanskaha rajvykankama.
Archieołahi raskapali vuhłavuju (paŭnočna-ŭschodniuju) i paŭdniovuju (centralnuju) viežy.
«Vuhłavaja vieža była raskapanaja jašče raniej. Archieałahičnyja raboty tam vialisia, kali nie pamylajusia, u 1990‑ch hadach. Sioleta było pryniata rašeńnie znoŭ raskapać jaje dla detalovaha vyvučeńnia kanstrukcyi, — raskazała načalnica adździeła kultury rajvykankama Alena Kubarka. — Paŭdniovuju viežu znajšli vypadkova. Pa čarciažach my viedali pra jaje isnavańnie. Letaś restaŭratary rasčyščali padmurak i natrapili na mur. Pavodle čarciažoŭ Biekiera (niamiecki architektar Jan Samuel Biekier u siaredzinie XVIII stahodździa pierabudavaŭ zamak Sapiehaŭ u pałacavy kompleks) my pačali šukać jaje abrysy, kab paćvierdzić, što heta sapraŭdy vieža. Znajšli vuhły i pieradali infarmacyju archieołaham».
Hetym letam archieołahi praciahnuli daśledavańni i poŭnaściu raskapali padmurak paŭdniovaj viežy. Heta paćvierdziła źviestki, što zamak Lva Sapiehi mieŭ try viežy.
«Treciaja — zachodniaja. Jaje Biekier nie razburaŭ. A dźvie inšyja byli źniesieny padčas pierabudovy zamka ŭ pałacavy kompleks. Zachodniaja vieža ŭvajšła ŭ ahulny ansambl hałoŭnaha korpusa. Restaŭratary taksama rasčyścili jaje, znajšli ŭvachod u padziamielli i vintavyja schody. My atrymali adkazy na mnohija zahadki, jakija pakinuŭ zamak. Upeŭnienyja, što napieradzie nas čakaje jašče šmat adkryćciaŭ», — adznačyła Alena Kubarka.
Pryznačeńnie viežaŭ prykładna viadomaje pavodle invientarnych apisańniaŭ.
Tak, u vuhłavoj viežy znachodziŭsia kabiniet Lva Sapiehi, a ŭ paŭdniovaj — kaplica. Jak i ŭvieś zamak, viežy vykonvali abarončyja funkcyi.
Vierahodna, hałoŭny korpus budzie muziejefikavany. Dla hetaha śpiecyjalistam nieabchodna vyznačyć, jak prystasavać jaho da turystyčnych patreb i arhanizavać paŭnavartasnyja ekskursii.
«Rašeńnie płanujecca pryniać da kanca hoda — paśla zaviaršeńnia raskopak i ŭsich daśledavańniaŭ. Tady budzie zrazumieła, z čym nam daviadziecca pracavać, što možna zrabić, i možna budzie raspracoŭvać kancepcyju. Źjavicca mahčymaść prahulacca pa terytoryi hałoŭnaha korpusa i ŭjavić, jak usio vyhladała nasamreč», — padsumavała Alena Kubarka.
Ciapier čytajuć
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie9
Kamientary