Jeŭrapiejski sajuz uchvaliŭ novy pakiet sankcyj suprać Rasii. Novyja abmiežavańni nakiravanyja suprać rasijskaha vajskova-pramysłovaha kompleksu, «cieniavoha fłotu», a taksama asob i arhanizacyj, jakija padtrymlivajuć hibrydnyja dziejańni Maskvy suprać krain Jeŭropy.
Pa słovach kiraŭnicy jeŭrapiejskaj dypłamatyi Kai Kałas, novyja sankcyi zakranajuć klučavyja elemienty rasijskaj vajskovaj mašyny i zvužajuć mahčymaści Rasii abychodzić mižnarodnyja abmiežavańni. Adnačasova ŭ Jeŭrasajuzie praciahvajecca padrychtoŭka da jašče bolš šyrokaha, 21‑ha pakieta sankcyj.
U novy śpis uklučyli siem fizičnych asob i 21 arhanizacyju, źviazanuju z vytvorčaściu i pastaŭkami bieśpiłotnikaŭ, vajskovaha abstalavańnia i padtrymkaj rasijskaha VPK, u tym liku praz pasiarednikaŭ u inšych krainach.
Asobna sankcyi zakranuli naftavuju infrastrukturu, jakaja vykarystoŭvajecca dla abychodu abmiežavańniaŭ. Pad ich trapili dźvie asoby i 24 arhanizacyi, źviazanyja z ekspartam rasijskaj nafty i naftapraduktaŭ praz tak zvany «cieniavy fłot».
Siarod novych fihurantaŭ sankcyj:
- mitrapalit Simfieropalski i Krymski RPC Cichan (Hieorhij Šaŭkunoŭ), jakoha časta nazyvajuć duchoŭnikam Uładzimira Pucina;
- błohierka Sasha meets Russia Alaksandra Jost. U 2022 hodzie jana pierajechała ŭ Maskvu, tłumačačy svajo rašeńnie «rusafobijaj» na Zachadzie i tym, što ŭ Rasii jość «tradycyjnyja kaštoŭnaści» i adsutničaje «hiendarny paradak dnia»;
- były ŭpaŭnavažany pa pravach dziciaci Rasii Pavieł Astachaŭ;
- Z-błohiery Raman Antonaŭski i Raman Fiodaraŭ;
- viadučy prapahandysckaha tok-šou «Vriemia pokažiet» Anatol Kuzičaŭ;
- pradziusarka RT Documentary Volha Kiryj;
- ahladalnik RT Ihar Malcaŭ;
- Prezidencki fond kulturnych inicyjatyŭ;
- MKAT «NTK» — chołdynhavaja kampanija, raspracoŭščyk sistem raspaznavańnia tvaraŭ NtechLab;
- Ižeŭski avijacyjny zavod i jašče šerah abaronnych pradpryjemstvaŭ;
- sudnachodnyja struktury «Łukojła» i «Hazpramnafty».
Taksama Jeŭrasajuz praciahnuŭ da 23 červienia 2027 hoda sankcyi, uviedzienyja paśla niezakonnaj anieksii Rasijaj Kryma i Sievastopala.
Pierad hetym ES u krasaviku pryniaŭ 20‑ty pakiet sankcyj suprać Rasii, jaki staŭ adnym z najbujniejšych za apošnija hady. Jon byŭ nakiravany na abmiežavańnie klučavych siektaraŭ rasijskaj ekanomiki, jakija padtrymlivajuć vajnu suprać Ukrainy.
ES zabaronić ujezd udzielnikam vajny Rasii suprać Ukrainy
Jeŭrasajuz pakul nie budzie pryznačać pieramoŭščyka z Pucinym
Da novaha sankcyjnaha pakieta Jeŭrasajuza suprać Rasii i Biełarusi dałučylisia jašče 8 krain
ES płanuje ŭklučyć u novy pakiet sankcyj abmiežavańni ŭ dačynieńni da patryjarcha Kiryła i śviataroŭ RPC
Što viadoma pra viciebčuka, jakoha vinavaciać u sprobie padryvu samalota ŭ Hiermanii12
Kamientary