Na Paleśsi tanna pradajuć siadzibu XIX stahodździa z čyrvonaj cehły. Možna pierarabić u žyły dom
U Stolinskim rajonie vystavili na tarhi siadzibu Oleš-Bieražnoŭskich. Dvuchpaviarchovy asabniak u pasiołku Nova-Bieražnoje addajuć za 12 892 rubli (mienš za $5000).
Sam budynak nie maje statusu historyka-kulturnaj kaštoŭnaści, što značna spraščaje žyćcio budučamu ŭładalniku — možna navat zrabić ź siadziby žyły dom, piša Onliner.by.
Ziemli ŭ Nova-Bieražnym naležali šlachieckamu rodu Oleš bolš za čatyry stahodździ — jašče z 1508 hoda. Samu siadzibu ŭ jaje ciapierašnim vyhladzie dabudavaŭ Kanstancin Aleša ŭ 1890 hodzie. Heta kłasičny prykład nieahotyki: pramavuholny budynak z čatyrochschilnym dacham, lukarnami i vytančanaj hranionaj viežaj z tylnaha boku.
Asabniak płoščaj 426 «kvadrataŭ» akružany starym piejzažnym parkam. Kaliści tut rasło bolš za 50 vidaŭ ekzatyčnych dreŭ, a da doma viała hrabavaja aleja.
Paśla vajny budynak prystasavali pad žyllo dla rabočych miascovaha śpirtzavoda, ale apošnija dziesiacihodździ jon pustuje i pastupova hibieje.
Niahledziačy na efiektny źniešni vyhlad z čyrvonaj cehły, unutry siadziba patrabuje kapitalnaha ramontu. Elektryka demantavanaja, piečy nie pracujuć, a kamunikacyi treba pravodzić nanova.
Razam z domam pakupnik atrymlivaje ŭčastak amal u 38 sotak u arendu na 50 hadoŭ. Hałoŭny plus — adsutnaść žorstkich restaŭracyjnych rehłamientaŭ.
Uładalnik moža sam vyrašać, što ŭładkavać u byłym majontku: haścinicu, kaviarniu, handlovy abjekt abo paŭnavartasny žyły dom. Adzinaje patrabavańnie — pry rekanstrukcyi treba zachavać aryhinalny architekturny vyhlad fasadaŭ.
Aŭkcyjon pryznačany na 29 maja. Startavaja cana łota — 12 892 rubli.
Ciapier čytajuć
Što viadoma pra viciebčuka, jakoha vinavaciać u sprobie padryvu samalota ŭ Hiermanii16
Kamientary