Ci choča biełaruskaja moładź pierajechać i kudy? Vyniki apytańnia
Centr novych idej pravioŭ apytańnie siarod biełaruskaj moładzi i pacikaviŭsia, siarod inšaha, ci jany chočuć emihravać i jakija krainy ličać lepšymi dla pierajezdu.
Jak pakazali vyniki apytańnia, u moładzievym asiarodździ niama masavaha namieru pakinuć Biełaruś. Ab svaim žadańni ŭ bližejšyja 3‑5 hadoŭ źjechać zajaviŭ tolki kožny dziasiaty respandent (11%). U toj ža čas kožny druhi (53%) zapeŭniŭ, što choča zastacca. Pry hetym istotnaja dola tych, chto vahajecca, i prymie rašeńnie ŭ zaležnaści ad abstavin — 36%.
Daśledčyki taksama pacikavilisia mierkavańniem maładych ludziej nakont taho, jakija krainy najbolš pasujuć im dla žyćcia. Aŭtary padkreślivajuć: ich metaj było vyvučeńnie mienavita ŭsprymańnia roznych dziaržaŭ, a nie składańnie rejtynhu ich realnaj dastupnaści dla pierajezdu. Daśledčyki davodziać, što takoje ŭsprymańnie časta budujecca na stereatypach i ŭjaŭleńniach, sfarmiravanych pad upłyvam źniešniaha asiarodździa, što i stała hałoŭnym pradmietam ich cikavaści.
Charakterna, što na pytańnie adkazvali i tyja, chto naohuł nie źbirajecca emihravać. Pakolki dola takich ludziej u vybarcy najbolšaja, całkam zakanamierna, što samym papularnym staŭ adkaz «nikudy» (33%). Tym nie mienš, mnohija z tych, chto płanuje zastavacca ŭ Biełarusi, usio ž nazvali inšyja krainy, jakija padajucca im pryvabnymi.
Pa vynikach apytańnia na pieršym miescy apynułasia Rasija (26%). Ale ad jaje nie nadta adstali Polšča (24%) i Hiermanija (23%). U piaciorku ŭvajšoŭ daloki Kitaj (18%), jaki apiaredziŭ susiedku Biełarusi — Litvu (12%). Astatnija krainy, niezaležna ad taho, na jakim kantyniencie jany znachodziacca, nabrali prykładna adnolkavuju kolkaść hałasoŭ.
Aŭtary adznačajuć, što suisnavańnie ŭ adkazach Rasii, Polščy, Hiermanii i Kitaja śviedčyć pra adsutnaść u moładzi žorstkaj hieapalityčnaj pryviazki. Roznyja krainy fihurujuć u ich śviadomaści paralelna i nie vyklučajuć adna adnu.
Pry hetym aŭtary daśledavańnia zaŭvažajuć, što nielha śćviardžać, byccam za kožnym vybaram staić vyraznaja kaštoŭnasnaja pazicyja. Hetyja adkazy adlustroŭvajuć chutčej ujaŭleńni pra toje, dzie žyć lepš. Pohlady maładych ludzj mohuć farmavacca praz asabistyja suviazi, raspoviedy znajomych, miedyja i papularnyja stereatypy pra dachody, svabodu ci karjernyja šancy.
Takoje raźmierkavańnie, jak adznačajuć daśledčyki, dazvalaje havaryć pra prahmatyčny charaktar aryjentacyj: krainy ŭsprymajucca jak roznyja typy mahčymaściaŭ. Ale prahmatyčnaść nie vyklučaje ŭpłyvu miedyjavobrazaŭ: ujaŭleńni pra «krainu mahčymaściaŭ» mohuć być adnačasova i instrumientalnymi, i simvaličnymi. Z vysokaj imaviernaściu ŭ asnovie adkazaŭ lažyć nie stolki ideałohija, kolki pošuk asiarodździa, dzie asabistyja namahańni, na dumku respandentaŭ, z bolšaj praŭdapadobnaściu pryniasuć žadany vynik.
U apytańni ŭziali ŭdzieł 465 respandentaŭ va ŭzroście ad 18 da 35 hadoŭ. Danyja byli pieraŭzvažanyja pavodle połu i rehijona pražyvańnia ŭ adpaviednaści z aficyjnaj statystykaj Biełstata za 2022 hod. Maksimalnaja statystyčnaja pahrešnaść składaje kala 4,5 pracentnaha punkta.
Ciapier čytajuć
Što viadoma pra viciebčuka, jakoha vinavaciać u sprobie padryvu samalota ŭ Hiermanii10
Kamientary