Pad Minskam na miescy byłoha savieckaha pijanierłahiera źjavicca spa-hatel
Kaliści na bierazie Isłačy, za 25 kiłamietraŭ ad Minska, raźmiaščaŭsia dziciačy łahier «Arlania». Nieŭzabavie paśla raspadu Sajuza dziciačaja ŭstanova zakryłasia, a jaje terytoryja pierajšła da novaha ŭłaśnika. Za apošnija dziesiacihodździ na ŭčastku źjaviłasia niekalki pabudoŭ, u tym i liku žyłyja katedžy (jak vyśvietliłasia, nie zusim zakonna). Ciapier były łahier čakaje hłabalnaja rekanstrukcyja — tut chočuć pabudavać novy hatel z sučasnym termalnym kompleksam, piša Realt.by.
Prajektavany ŭčastak znachodzicca ŭ vioscy Źviniačy Haranskaha sielsavieta. Hetyja miaściny znajomyja mnohim minčukam: pobač — raka Isłač i reabilitacyjny centr «Aksakaŭščyna».
U savieckija hady na hetym placy raźmiaščaŭsia dziciačy łahier «Arlania», a ŭ 2000‑ch terytoryja azdaraŭlenčaj ustanovy pierajšła va ŭłasnaść HD «Ždanovičy». Uładalniki najbujniejšaj handlovaj placoŭki stalicy nabyli kala 13 hiektaraŭ ziamli dla «absłuhoŭvańnia bazy adpačynku».
Turystyčny abjekt u Źviniačach sapraŭdy źjaviŭsia. Tut zapracavaŭ kompleks z łaźniaj, rybałkaj i inšymi zabavami. Praŭda, častku terytoryi rekreacyjnaj zony ŭłaśniki vyrašyli vykarystać pad budaŭnictva žyłych katedžaŭ, što akazałasia niezakonnym.
U spravu ŭmiašałasia prakuratura, i paśla šerahu sudoŭ sprečnyja ziemli znoŭ adyšli da Minskaha rajona. U 2022 hodzie terytoryja z katedžami dy inšymi budynkami vystaŭlałasia na aŭkcyjon. A zaraz stała viadoma, što pabudovy chočuć rekanstrujavać pad rekreacyjny abjekt (bazu adpačynku).
Zakazčykam prajekta vystupaje kampanija «Karparacyja Vołma Bieł», jakaja zajmajecca vytvorčaściu budaŭničych materyjałaŭ. Architekturnuju kancepcyju kompleksu raspracavała studyja «Arch-Nuvo». Raspracoŭščyki prapanujuć stvaryć na bierazie Isłačy kamfortnuju i maksimalna intehravanuju va ŭnikalny pryrodny łandšaft prastoru dla azdaraŭleńnia i adpačynku.
Adznačajecca, što novaja kancepcyja praduhledžvaje nie tolki rekanstrukcyju najaŭnych budynkaŭ sa źmienaj ich funkcyjanalnaha pryznačeńnia (havorka pra tyja samyja katedžy), ale i budaŭnictva novaha hatela z sučasnym termalnym kompleksam.
Hramadskaje abmierkavańnie prajekta budzie prachodzić z 16 lutaha da 2 sakavika. Aznajomicca ź im u elektronnym vyhladzie možna na sajcie Minskaha rajvykankama, a ŭ drukavanym — u Haranskim sielvykankamie. Taksama dla ŭsich achvotnych budzie arhanizavanaja prezientacyja, jakaja projdzie ŭ budynku dziciačaha sadka ŭ pasiołku Traskoŭščyna 25 lutaha a 17.00. Paśla zakančeńnia abmierkavańnia ŭsie materyjały razhledzić architekturna-horadabudaŭničaja rada.
Na Niamizie ŭ Minsku dabudoŭvajuć šmatfunkcyjanalny kompleks z vadaspadam i drevami na dachu
U Minsku na ŭčastku praśpiekta Pieramožcaŭ zabiaruć adnu pałasu ruchu dla budaŭnictva mietro
Minskbud pakazaŭ, jak vyhladaje novaja infiekcyjnaja balnica
U nastupnym hodzie źbirajucca zdać novy archiŭny kompleks u Minsku
Ciapier čytajuć
Palaki kuplajuć damy ŭ Biełarusi — cikaviacca, ci chopić na žyćcio jeŭrapiejskaj piensii, i radujucca śmiešnym vydatkam17
Kamientary