«Jana choča zabrać sabie navat toje, što źjaŭlajecca maim». Eks-pradziusarka Lery Jaskievič emacyjna adkazała na ŭsie abvinavačvańni

«Siabroŭstva z boku Ani było mahčymaje tolki ŭ tym vypadku, kali jana zmoža na mnie zarablać hrošy. Ja pryniała rašeńnie vydalić usie svaje treki, kab vyzvalicca ad zaležnaści ad hetaha čałavieka. Heta baluča, ale lepš, čym praciahvać karmić źviera», — nie chavała emocyj Jaskievič.

Pradziusarka Hanna Navickaja ŭ adkaz zapisała videa, u jakim padzialiłasia svajoj viersijaj padziej.

Pavialičyć

Lera Jaskievič paznajomiłasia z Hannaj Navickaj, kali joj było 17 hadoŭ — u 2016 hodzie. Navickaja dapamahła Jaskievič pastupić u Biełaruski dziaržaŭny ŭniviersitet kultury i mastactvaŭ, zvaziła na ŭkrainski Ch-Faktar, była jaje mieniedžarkaj i najlepšaj siabroŭkaj — dziaŭčaty žyli razam i navat niejki čas dzialili łožak.

U 2022 hodzie paśla pačatku vajny va Ukrainie Jaskievič pierabrałasia ŭ Varšavu, a Navickaja zastałasia ŭ Biełarusi — jany praciahvali tvorčuju supracu, ale jaje było ŭsio mienš. Pradziusarka pieraklučyła ŭvahu na novy prajekt — hurt «Barysaŭski trakt», i ŭ kancy 2025 hoda Jaskievič prapanavała joj pierahladzieć farmat pracoŭnych adnosin: zamiest raniejšaj dzialby zaroblenaha 50 na 50 śpiavačka zachacieła atrymlivać na ruki poŭnuju sumu, pry hetym jana hatovaja była zabrać na siabie ŭsiu mieniedžarskuju i administratyŭnuju pracu Navickaj. Apošniaja, ź jejnych słoŭ, nie pahadziłasia na takija ŭmovy — tak i vybuchnuŭ kanflikt, paśla jakoha Jaskievič źbirajecca vydalić usie svaje treki, zapisanyja da 2024 hoda.

Pavialičyć

Jak raspaviała ŭ svaim videa Hanna Navickaja, paśla publičnych abvinavačvańniaŭ na jaje adras z boku Lery Jaskievič jana sutyknułasia z ckavańniem i chiejtam, jakija ličyć niezasłužanymi.

«Moj układ u prajekt «Lera Jaskievič» byŭ abiascenieny i rastaptany. Lera paličyła, što jana ŭ pravie zabrać absalutna ŭsio, navat toje, što joj nie naležyć. My nie pryjšli da taho, kab niešta pierahledzieć, pa-čałaviečy abmierkavać, pamianiać umovy».

Navickaja raskazała, što jašče da taho, jak prajekt «Lera Jaskievič» pačaŭ prynosić stabilny dachod, jana ŭkłała ŭ jaho raskrutku bolš za 20 tysiač dalaraŭ ułasnych srodkaŭ. Dla jaje heta było inviestycyjaj u prajekt, u jaki jana vieryła.

«Ja dapamahła Lery pastupić va ŭniviersitet. Arenda žytła, kišennyja raschody, pobytavyja rečy — usio heta paśla pierajezdu ŭ Minsk Lery spansavała ja. Ja intehravała jaje ŭ staličnaje žyćcio, znajomiła z tusoŭkaj, prafiesijanałami ŭ tvorčaj śfiery. Ja dapamahała joj sa zdymkami na kaviery (a potym z klipami na pieśni), ź pieršymi kvaternikami, hastrolami. Ja zakryvała ŭsie arhanizacyjnyja momanty. Ja prapanavała zapisvać joj aŭtarskija pieśni — jana pahadziłasia. Tak źjaviłasia pieśnia «Džon», jana napisanaja nami abiedźviuma: ja napisała druhi kuplet.

Dy i dalej praca ŭ našym duecie budavałasia ŭ padobnaj miechanicy: usia fabryka vytvorčaści piesień była maksimalna sumiesnaja. Uvieś pradakšn paśla taksama byŭ na mnie: ja płaciła za ŭsie etapy dla źjaŭleńnia pieśniaŭ i klipaŭ ažno da 2019 hoda».

U siabrovak nie było kantrakta, bo jany adčuvali siabie «siostrami». Ale Navickaja prapanavała zarehistravać pravy na aŭtarskija pieśni ŭ Nacyjanalnym centry intelektualnaj ułasnaści — tam jany ŭkazanyja jak paŭnavartasnyja suaŭtarki, tamu ŭsie hrošy ad dystrybucyi trekaŭ dzielacca napałam. Takaja ž schiema była zaćvierdžanaja na dachody ad inšych prajektaŭ.

«Lera žyła sa mnoj i nie pracavała. Usia atmaśfiera, u jakoj jana stvarała svaje pieśni, była maksimalna kamfortnaj i biaśpiečnaj, joj nie treba było biehčy štodzień na dadatkovuju pracu i padpracoŭki. U jaje było ŭsio, kab zajmacca muzykaj i błohierstvam. Jana pryjechała ŭ 2016-m, a ŭ 2019‑m u jaje ŭžo byŭ «Dysnejłend»: krutyja kałabaracyi i rekłamnyja prapanovy… A ŭ kancy 2025‑ha hoda jana prychodzić da dumki, što ahułam mahła b dasiahnuć usiaho sama, i jana nie prosta choča pierahledzieć umovy, a choča razarvać usio i zabrać usio sabie — navat toje, što źjaŭlajecca maim». 

Jaskievič ličyć stvareńnie dla jaje vobrazu «z hrazi ŭ kniazi» abraźlivym, bo, pa jaje słovach, Ania zaŭvažyła jaje ŭžo «nie pustoj dziaŭčynkaj», a sa 100 tysiačami padpisantaŭ u instahramie i 20‑ciu tysiačami ŭ jutubie.

«Akramia taho, na druhi ž dzień paśla pierajezdu ŭ Minsk, Ania adviała mianie na kastynh na bek-vakał u karaokie Bahiema. Na načnyja źmieny ŭ 17 hod. A potym tam ja pracavała ŭ kavier-duecie na letnich terasach — zaroblenyja hrošy pamiž nami dzialilisia».

Praź niemahčymaść damovicca pryvatna pradziusarka prapanavała byłoj padapiečnaj prafiesijnuju miedyjacyju, ale, ź jaje słoŭ, Lera Jaskievič prapanovu admiała.

«Taksama ja prapanoŭvała joj padpisać damovu, dzie my b urehulavali ŭsie momanty — nijakaha adkazu. Jana prosta ŭ adnabakovym paradku pryniała rašeńnie vydalić usie treki i pierakłaści adkaznaść na mianie. Ale ja suprać vydaleńnia trekaŭ», — padsumoŭvaje Navickaja.

• 2
• 1
• 2
• 4
• 1
• 1
• 0
• 0