Na Kubie zastałosia zapasaŭ nafty na dva-try tydni

Amierykanskaja błakada Vieniesueły i cisk Vašynhtona na Mieksiku pazbavili Kubu dvuch asnoŭnych i stabilnych krynic pastavak nafty i mazutu, jaki vykarystoŭvajecca dla vypracoŭki elektraenierhii. Pry ciapierašnim uzroŭni spažyvańnia i vielmi abmiežavanaj ułasnaj zdabyčy paliva situacyja vyhladaje krytyčnaj.

Na dumku ekśpierta kansałtynhavaj kampanii Teneo Nikałasa Uotsana, biez novych pastavak kryzis moža stać nastolki hłybokim, što pastavić pad pahrozu samo isnavańnie kubinskaha režymu.

Pavodle Kpler, u hetym hodzie Kuba atrymała kala 84,9 tysiačy baralaŭ nafty — usiaho z adnoj pastaŭki ź Mieksiki. U siarednim heta prykładna 3 tysiačy barelaŭ u dzień, u toj čas jak u 2025 hodzie kraina impartavała bolš za 37 tysiač baralaŭ štodnia. Kali dadać studzieńskuju pastaŭku da prykładna 460 tysiač baralaŭ, jakija znachodzilisia ŭ schoviščach na pačatku hoda, zapasaŭ chopić usiaho na 15—20 dzion, ličyć analityk Kpler Viktoryja Hrabienviohier.

Akramia nafty, na Kubie amal skončyŭsia i mazut. Da siaredziny 2025 hoda jaho faktyčna adzinym pastaŭščykom zastavałasia Vieniesueła, ale apošni hruz prybyŭ jašče ŭ listapadzie.

11 studzienia, nieŭzabavie paśla apošniaj pastaŭki ź Mieksiki i na fonie siłavych dziejańniaŭ ZŠA ŭ Vieniesuele, Donald Tramp publična zajaviŭ, što Kuba bolš nie budzie atrymlivać naftu. Na hetym tydni jon taksama adznačyŭ, što kubinski režym «vielmi blizki da kałapsu».

Ekśpiert Techaskaha ŭniviersiteta Chorchie Pińjon papiaredžvaje: kali ŭ najbližejšyja tydni novyja pastaŭki nie adnoviacca, krainu čakaje surjozny ekanamičny i enierhietyčny kryzis.

Pry hetym Kuba i biez naftavaj błakady pieražyvaje najciažejšy ekanamičny spad z 1959 hoda. Pavodle acenak demohrafa Karłasa Albisu-Kampasa, z 2020 hoda krainu pakinuła kala čverci nasielnictva — bolš za 2,7 miljona čałaviek.

Raniej Vieniesueła zabiaśpiečvała kala 40% patreb Kuby ŭ nafcie, pryčym pa lhotnych cenach. Situacyja rezka pahoršyłasia naprykancy minułaha hoda, kali ZŠA ŭviali marskuju błakadu i pačali pierachop tankieraŭ ź vieniesuelskaj naftaj. Adzin z zachoplenych karabloŭ vioz na Kubu bolš za miljon baralaŭ.

Mieksika letaś była hałoŭnym pastaŭščykom nafty dla Havany, adnak ciapier ZŠA nastojvajuć na spynieńni hetych pastavak. Miechika apynuŭsia ŭ składanym stanoviščy z-za pahroz Vašynhtona i majučaha adbycca pierahladu handlovaha pahadnieńnia pamiž Mieksikaj, ZŠA i Kanadaj.

Jak adznačaje mieksikanski enierhietyčny kansultant Hansała Monroj, Kuba mocna zaležała ad Vieniesueły, i kali ciapier pad ciskam ZŠA Mieksika taksama spynić ekspart, prablemy dla vostrava stanuć nadzvyčaj surjoznymi.

Pavodle źviestak analityčnaha centra Social Rights Observatory, kala 90% kubincaŭ žyvuć u krajniaj biednaści, a 70% nie mohuć rehularna zabiaśpiečyć siabie navat adnym paŭnavartasnym pryjomam ježy ŭ dzień. Bolšaść apytanych nazyvaje hałoŭnymi prablemami deficyt praduktaŭ i pastajannyja adklučeńni elektraenierhii, jakija ŭ asobnych rehijonach doŭžacca da 18 hadzin i bolš.

• 6
• 0
• 0
• 2
• 1
• 0
• 0
• 0