Kuba daŭno nie žyła dobra. Pry hetym jaje ekanamičnaja madel i demahrafičnaje padzieńnie mocna nahadvaje łukašenkaŭskuju. Joj kaniec?

U druhim vieličynioj horadzie Kuby, Sanćjaha, natoŭpy ludziej adkryta słuchajuć muzyku kubinskich emihrantaŭ. Nad vulicami hučać hałasy Hłoryi Estefan i Vili Čyryna, jaki śpiavaje: «Naš dzień chutka nadydzie».

Hałoŭnym šturškom dla takich nastrojaŭ stała zrynańnie vieniesuelskaha dyktatara Nikałasa Madury pry ŭdziele ZŠA. Dla krainy z nasielnictvam mienš za 10 miljonaŭ čałaviek heta aznačaje adhortvańnie novaj staronki, pakolki mienavita pastaŭki vieniesuelskaj nafty doŭhi čas byli tym adzinym faktaram, jaki dazvalaŭ zbałansavać dziaržaŭny biudžet.

Padzieńnie režymu ŭ Karakasie moža zapuścić praces padzieńnia kubinskaj dyktatury, piša WSJ.

U najbiadniejšych haradach ludzi adkryta razvažajuć, ci zmoža ŭtrymacca kamunistyčny ŭrad prezidenta Mihiela Dyjas-Kaniela — pierajemnika Fidela i Raula Kastra. Situacyja robicca krytyčnaj, bo strata vieniesuelskaj padtrymki moža pakinuć biez zarobkaŭ dziaržaŭny aparat biaśpieki.

Byt zvyčajnych kubincaŭ pieratvaryŭsia ŭ kašmar. Jak raskazaŭ žurnalistu 66‑hadovy Rejnald Fłores, na druhi dzień paśla padzieńnia Madury ŭ jahonaj kvatery ŭžo piaty dzień zapar nie było vady. Razam z pastajannymi adklučeńniami śviatła, zaniapadam miedycyny i horami śmiećcia na vulicach heta stała «novaj normaj».

Pavialičyć

Žyćcio ŭskładniajuć śpiakota i chvaroby, jakija pieranosiacca maskitami. Niadaŭna, pavodle słoŭ mužčyny, u jaho adnačasova nie było elektryčnaści, vady i hazu dla pryhatavańnia ježy.

Kryzis vyklikaŭ niebyvałuju emihracyju. Jak piša WSJ, z 2020 hoda Kubu pakinuli bolš za 2,7 miljona čałaviek — heta kala čverci žycharoŭ, pryčym vyjazdžaje pieravažna aktyŭnaja moładź. Pa acenkach demohrafa Chuana Karłasa Albizu-Kampasa, realnaje nasielnictva vostrava skaraciłasia da 8 miljonaŭ. Uzrovień naradžalnaści jašče nikoli nie byŭ nastolki nizkim.

Turyzm, byłaja apora krainy, taksama ŭ zaniapadzie. Dachody ŭ valucie skaracilisia na 75%. Novy 42‑paviarchovy hatel u Havanie koštam 200 miljonaŭ dalaraŭ amal pustuje, a ahulnaja zahruzka hatelaŭ nie daciahvaje i da 30%. Mała chto choča jechać u krainu, dzie vulicy zavalenyja śmiećciem. Pry hetym turysty z Rasii i Kitaja najčaściej karystajucca pakietami «ŭsio ŭklučana», tamu ich hrošy amal nie traplajuć u ruki prostych kubincaŭ: turysty nie zachodziać u restarančyki i nie jeździać na taksi.

Pavialičyć

Jak adznačaje analityk Uiljam Leahrande, u adroźnieńnie ad kryzisu paśla raspadu SSSR, času, viadomaha jak «asablivy pieryjad», kali ekanamičny bol adčuvaŭsia va ŭsim kubinskim hramadstvie, ciažkaści ŭ hetym kryzisie niepraparcyjna mocna bjuć pa tych kubincach, u jakich niama svajakoŭ za miažoj, jakija dasyłajuć im dalary. Takaja situacyja vyklikaje realnuju sacyjalnuju napružanaść.

Jak piša WSJ, kubinskaja dziaržava vyžyvała za košt miljardaŭ dalaraŭ, jakija płaciać u biudžet kubinskija miedyki, što pracujuć u Vieniesuele ci Mieksicy, a taksama dziakujučy pastaŭkam vieniesuelskaj nafty lhotnymi cenami. Heta była schiema, anałahičnaja toj, pa jakoj Maskva spansuje režym Alaksandra Łukašenki.

Pavodle acenak ekśpierta Chorchie R. Pińjona, Kuba spažyvaje jak minimum 100 tysiač baralaŭ nafty na dzień. Vieniesueła pastaŭlała 35 tysiač. Ułasnaja zdabyča vostrava (40 tysiač baralaŭ) — heta ciažkaja nafta ź sieraj i mietałami, jakaja litaralna dabivaje znošanaje abstalavańnie miascovych ciepłaelektrastancyj.

U Kuby niama hrošaj, kab kuplać paliva na suśvietnym rynku, a nadziei na pastaŭki z Anhoły ci Ałžyra źnižanymi cenami pakul zastajucca tolki tearetyčnymi.

Pińjon papiaredžvaje: bieź vieniesuelskaj nafty enierhietyčnuju infrastrukturu Kuby čakaje poŭny paralič užo praz 30 dzion. Pry hetym ekśpiert dapuskaje paradaksalny scenar: «Ja nie ździŭlusia, kali amierykancy zahadajuć Vieniesuele praciahvać pastaŭki nafty na Kubu, kab nie pačaŭsia chaos».

Pavialičyć

Jak piša WSJ, pakul kubinskaje kiraŭnictva dziejničaje pa starych schiemach: zhaniaje ludziej na mitynhi i abviaščaje žałobu pa 32 aficerach, što zahinuli ŭ Vieniesuele. Adnak bieź śviatła i paliva (časam elektryčnaść dajuć tolki na 4 hadziny ŭ sutki) kraina apynułasia ŭ zamknionym kole, sapraŭdnym vychadam ź jakoha moža stać źmiena sistemy.

• 19
• 0
• 1
• 1
• 2
• 2
• 0
• 0