Siła biełarusaŭ. Za niekalki dzion ludzi sabrali dla trochhadovaj Ksiušy 500 tysiač dalaraŭ

Ale ŭsio ŭpirajecca ŭ jaho košt — amal $2 miljony. Raniej takija zbory zapuskali baćki, ale historyja dziaŭčynki akazałasia składaniej: užo bolš za hod Ksiuša znachodzicca ŭ Domie dziciaci.

Za apošnija niekalki dzion u redakcyju Onliner napisali dziasiatki čytačoŭ — usie jany padzialilisia historyjaj dziaŭčynki. U instahram-akaŭncie, jaki viaduć vałanciory, 4 sakavika źjaviŭsia videarolik z Ksiušaju. U podpisie paznačana, što jana vychavanka Mahiloŭskaha doma dziciaci, «taty bolš niama, a mama nie zmahła pra jaje kłapacicca».

Žurnalisty źviazalisia ź Ludmiłaj — vałanciorkaj, jakaja aktyŭna dapamahaje dziaŭčyncy. Pavodle słoŭ žančyny, dyjahnaz Ksiušy pastavili jašče dva hady tamu, u Domie dziciaci jana znachodzicca z studzienia 2025 hoda.

Daviedaŭšysia pra historyju dziaŭčynki, vałanciorka źviazałasia z mamaj Ksiušy, razam jany navat naviedali dzicia ŭ balnicy. Pryčynaj špitalizacyi, tłumačyć Ludmiła, stała zapaleńnie lohkich — na lačeńni dziaŭčynka znachodzicca z 4 sakavika.

Na momant znajomstva z Ksiušaju ŭ Ludmiły ŭžo byŭ dośvied udziełu ŭ inšych zborach na lačeńnie dziaciej sa SMA i mijadzistrafijaj Dziušena (u hetym vypadku havorka idzie pra preparat koštam $2,9 miljona; u Biełarusi zakryć zbory na «Elevidys» udałosia dvum chłopčykam — Arciomu Padjałoŭskamu i Vani Ściacenku).

Źviazaŭšysia ź inšymi vałanciorami, było vyrašana adkryć zbor i na lačeńnie Ksiušy. Da hetaha, padkreślivaje surazmoŭca, vałanciory vyvučyli ŭsie dakumienty (ich kopii znachodziacca ŭ mamy dziaŭčynki), źviazalisia z Domam dziciaci i pradstaŭnikami orhanaŭ apieki.

Pavialičyć

Historyja pačała chutka nabirać abaroty — dopisy pra Ksiušu aktyŭna repościać va ŭsich sacsietkach, padklučajucca błohiery i pabliki. Dziakujučy ahałoscy i pracy vałancioraŭ na momant padrychtoŭki publikacyi ŭdałosia sabrać kala $650 tysiač.

— My čakali vodhuku, ale nie dumali, što jon budzie nastolki vialikim. Svaju rolu syhrała toje, što ŭ Ksiušy niama mamy pobač — jana jość tolki pa dakumientach.

Užo sabranaja suma vyhladaje ŭražliva, ale na spravie heta krychu bolš za 36% ad vystaŭlenaha rachunku — $1,8 miljona. Času ŭ zapasie niašmat: u Biełarusi preparat «Zołhiensma» ŭvodziać dzieciam vahoj da 13,5 kiłahrama. U Dubai hatovy ŭvieści preparat, kali dzicia važyć da 21 kiłahrama, ale paŭstaje pytańnie, chto budzie supravadžać dziaŭčynku.

— Ksiuša nie chodzić i nie poŭzaje, ale nožki ŭ jaje ruchajucca. Kali b zaŭvažyli raniej… Dziaŭčynka vielmi kiemlivaja — bačna, što jana dumaje pierad tym, jak adkazać na pytańnie. Jašče jana vielmi lubić abdymacca, a hetyja vočki! My śpim pa dźvie hadziny — robim usio mahčymaje, kab ukoł Ksiuša atrymała ŭ Biełarusi.

Infarmacyju, jak dapamahčy Ksiušy, možna znajści tut

• 1
• 0
• 0
• 0
• 0
• 0
• 0
• 2