U Ispanii zatrymali biełarusaŭ za kradziež i pieraprodaž mašyn
U Ispanii spynili dziejnaść złačynnaj hrupy, jakaja zajmałasia kradziažom mašyn premium-kłasa ŭ pravincyjach Alikante i Valensija, ich nastupnaj niezakonnaj lehalizacyjaj i prodažam za miažoj. Pra heta paviedamlaje radyjo Cadena Ser sa spasyłkaj na pravaachoŭnyja orhany, piša sajt «Biełaruś i mir».
Rasśledavańnie pačałosia ŭ kastryčniku 2025 hoda paśla taho, jak u horadzie Kampielja znajšli aŭtamabil z padroblenymi numarnymi znakami. Heta ŭ vyniku pryviało da identyfikacyi čatyroch hramadzian biełaruskaha pachodžańnia va ŭzroście ad 40 da 50 hadoŭ, jakija žyli ŭ haradach Bienidorm i Liryja.
Hrupa dziejničała pavodle pradumanaha płana i z vykarystańniem technałohij. Złačyncy vybirali transpartnyja srodki, stavili GPS-trekiery dla adsočvańnia pieramiaščeńniaŭ, a zatym, vykarystoŭvajučy hłušycieli častot i składanyja elektronnyja sistemy, adčyniali ich, nie vyklikajučy padazreńniaŭ.
Paśla kradziažu mašyny pakidali na cełyja tydni pryparkavanymi ŭ hłuchich miescach. I tolki potym adhaniali na kančatkovyja punkty, dzie mianiali VIN-numary, kleili padroblenyja identyfikacyjnyja nalepki i atrymlivali falšyvyja dakumienty ź inšych jeŭrapiejskich krain, rychtujučy da vyvazu.
Padčas palicejskaj apieracyi pravaachoŭniki pryjšli ŭ kvateru ŭ Bienidormie, składskoje pamiaškańnie ŭ Finiestracie i zaharadny dom u Liryi, dzie i pravodziłasia kančatkovaja «dapracoŭka» aŭtamabilaŭ.
Čatyroch biełarusaŭ zatrymali. Akramia taho, znajšli vosiem skradzienych mašyn i kanfiskavali vialikuju kolkaść śpiecyjalizavanaha abstalavańnia, jakoje mahło być vykarystana dla ździajśnieńnia kradziažoŭ.
Zatrymanych, raniej sudzimych za anałahičnyja dziejańni, padazrajuć u kradziažy z uzłomam, padrobcy dakumientaŭ i prynaležnaści da złačynnaj arhanizacyi. Jany zastanucca pad vartaj da suda. Rasśledavańnie praciahvajecca.
Ciapier čytajuć
Prosty biełarus ździviŭ ludziej, kali ŭ Hiermanii pryznavaŭsia ŭ lubovi da Łukašenki. Ale akazałasia, što jon niaprosty23
Kamientary