Luksavyja brendy stracili miljony klijentaŭ — u asnoŭnym heta moładź

Pavodle analizu francuzskaha daśledčaha instytuta Les Echos Études, na jaki źviartaje ŭvahu vydańnie Sapital Luxe, za apošnija hady rynak tavaraŭ raskošy sutyknuŭsia z maštabnym «vymyvańniem» klijenckaj bazy.

Asnoŭny ŭdar prypaŭ nie na ultrabahatych pakupnikoŭ, a na tak zvanuju klijenturu, aryjentavanuju na luks, — ludziej siaredniaha dastatku, jakija čas ad času nabyvali darahija rečy i farmavali masavy popyt.

Mienavita hetaja hrupa, jakaja składaje kala 95% usich spažyŭcoŭ luksu, zabiaśpiečvaje bolš za 60 pracentaŭ ekanamičnaj kaštoŭnaści hetaha rynku. Na praciahu dvuch dziesiacihodździaŭ jana była asnovaj jaho rostu.

Adnak u apošnija hady hetaja madel dała surjozny zboj. Zhodna z acenkami Les Echos Études, tolki za 2023—2024 hady luksavyja brendy stracili da 60 miljonaŭ klijentaŭ. Kali ž brać trochhadovy pieryjad paśla pandemii, ahulnaja kolkaść stračanych pakupnikoŭ moža dasiahać 70—80 miljonaŭ čałaviek. Pieravažna havorka idzie pra maładych spažyŭcoŭ, u tym liku pakaleńnie Z, dla jakich luks pastupova pierastaŭ być dasiahalnaj metaj.

U čym pryčyny?

Hety praces maje jak strukturnyja, tak i kanjunkturnyja pryčyny. Na pavodziny spažyŭcoŭ paŭpłyvali rost inflacyi, padaražańnie žyćcia, hieapalityčnaja niestabilnaść i asłableńnie klučavych rynkaŭ, u tym liku kitajskaha, jaki zastajecca adnym z hałoŭnych drajvieraŭ hłabalnaha luksu. Ale, pavodle analitykaŭ, nie mienš važnuju rolu adyhrała sama stratehija luksavaj industryi.

Sistematyčnaje pavyšeńnie cen i kurs na maksimalnuju ekskluziŭnaść pryviali da taho, što mnohija znakavyja tavary stali faktyčna niedastupnymi dla pakupnikoŭ siaredniaha ŭzroŭniu. Luks usio mienš asacyjujecca z maraj, da jakoj možna nablizicca, i ŭsio čaściej — z zamknionym kłubam dla abranych.

U vyniku maładyja pakupniki advaročvajucca ad kłasičnych luksavych brendaŭ, addajučy pieravahu ŭražańniam, padarožžam, servisam i alternatyŭnym formam spažyvańnia.

Što rabić?

Maštabnaja strata pakupnikoŭ prymušaje industryju raskošy terminova pierahladać svaju madel biznesu. Klučavym vyklikam stanovicca viartańnie maładych spažyŭcoŭ i klijentaŭ siaredniaha dastatku, jakija patrabujuć bolšaj dastupnaści — jak u cenavaj palitycy, tak i ŭ samim pracesie pakupki.

Hetaja dynamika padšturchoŭvaje brendy da raźvićcia novych kirunkaŭ. Usio bolš marak asvojvajuć rynak pre-owned (užyvanych rečaŭ) i ŭzmacniajuć liniejki tavaraŭ pačatkovaha ŭzroŭniu.

Paralelna z hetym źmianiajecca sama fiłasofija bucikoŭ. Jany pierastajuć być tolki miescami prodažu. Usio bolš uvahi nadajecca ŭražańniu ad naviedvańnia, atmaśfiery i zdolnaści kramy «zahavaryć» z pakupnikom na adnoj movie.

Sučasnyja spažyŭcy, asabliva «ličbavaje pakaleńnie», dyktujuć novyja trendy. Dla ich status brenda ŭžo nie taki važny, jak jaho aŭtentyčnaść, prazrystaść pachodžańnia pradukcyi i najaŭnaść hłybokaha sensu. Heta prymušaje modnyja damy pierahladać svaju kamunikacyju, robiačy staŭku na ščyraść i kaštoŭnaści, a nie tolki na prestyž.

Na hetym fonie źjaŭlajucca i novyja hulcy, jakija prapanujuć nietypovyja kancepcyi luksu. Heta bačna, naprykład, u siehmiencie prestyžnaj haściničnaj industryi, dzie maładyja pradprymalniki zachodziać na rynak z abnoŭlenym pohladam na raskošu i servis.

Ahulnaja stratehija haliny ciapier palahaje ŭ hnutkaści: treba zachavać histaryčnuju ekskluziŭnaść, ale zrabić jaje bolš sučasnaj i «demakratyčnaj».

• 4
• 1
• 13
• 3
• 0
• 0
• 0
• 0