«Pry +30 niemahčyma adkryć vokny». Žodzincy skardziacca: u horadzie śmiardzić haŭnom
Žychary Žodzina ŭžo niekalki miesiacaŭ skardziacca na mocny pach kanalizacyi i hnoju, jaki, pavodle ich, nakryvaje ceły horad. Ludzi źbirajuć podpisy i patrabujuć novych pravierak, ale aficyjnyja słužby adkazvajuć: usio pracuje ŭ štatnym režymie.
Abiacali, što pachu nie budzie
Pra budaŭnictva kopanki-nazapašvalnika kala vioski Vostraŭ žodzincy daviedalisia jašče kala dvuch hadoŭ tamu. Tady pradstaŭniki vodakanała zapeŭnivali miascovych, što sučasnyja ačyščalnyja technałohii nie dapuściać raspaŭsiudžvańnia niepryjemnych pachaŭ.
Spačatku tak i było. Uzimku prablema amal nie adčuvałasia, a viasnoj pach źjaŭlaŭsia tolki čas ad času, kali viecier dźmuŭ u bok horada. Mnohija dumali, što heta vynik sielskahaspadarčych prac na palach.
Ale z pačatkam śpioki situacyja źmianiłasia.
«Samy apahiej — kali horača i dźmie viecier. Pa ŭsim horadzie staić pach, byccam tolki što prajechała mašyna z kanalizacyjaj. Jon moža trymacca dzień-dva. Ciapier, kali śpioka bolš za +30, niemahčyma ni znachodzicca na vulicy, ni adkryć vokny doma. Prosta śmiardzić kanalizacyjaj i hnojem», — dzielacca žychary ŭ sacsietkach.
«Pretenzij nie vyjaŭlena»
Tym časam aficyjnyja pravierki prablemy nie paćviardžajuć.
Žodzinski centr hihijeny i epidemijałohii i Minskaja abłasnaja inśpiekcyja achovy navakolnaha asiarodździa paviedamili, što śpiecyjalisty vyjazdžali na miesca, adbirali proby vady i pavietra, ale pieravyšeńniaŭ zabrudžvalnych rečyvaŭ nie vyjavili.
U adkazach havorycca, što ekspłuatacyja kopanki-nazapašvalnika viadziecca biez parušeńniaŭ, a ŭzrovień vykidaŭ adpaviadaje narmatyvam.
«Minčuki, chopić chadzić u tualet!»
Adsutnaść vynikaŭ paśla šmatlikich zvarotaŭ pieratvaryła temu ŭ hałoŭny pradmiet žartaŭ u miascovych čatach.
«Minčuki, chopić chadzić u tualet!» — iranizujuć žodzincy, namiakajučy na toje, što ŭ nazapašvalnik traplajuć ścioki nie tolki ź ich horada.
Ciapier źbirajuć podpisy
Žychary pačali rychtavać kalektyŭny zvarot u Kamitet dziaržaŭnaha kantrolu i Ministerstva pryrodnych resursaŭ.
Aŭtary zvarotu prosiać pravieści paŭtornuju pravierku kopanki-nazapašvalnika z udziełam niezaležnych śpiecyjalistaŭ i hramadskich pradstaŭnikoŭ, a taksama ŭvieści pastajanny kantrol za jaje pracaj.
Jašče adna prapanova — rehularna vykarystoŭvać srodki dla niejtralizacyi pachu, kab u letni pieryjad smurod nie raspaŭsiudžvaŭsia pa ŭsim horadzie.
Ciapier miascovyja aktyvisty zaklikajuć susiedziaŭ dałučacca da zboru podpisaŭ i spadziajucca, što masavy zvarot prymusić čynoŭnikaŭ vyrašać prablemu.
Ciapier čytajuć
«Na karabli kožny dzień — paniadziełak». Biełaruska raskazała pra svaju pracu na kruiznym łajniery4
Kamientary
P.S. Haŭno tam pierš-napierš nie na palihonie, a ŭ kabinietach. Pišuć adpiski, bo ludzi nie mohuć vyhnać ich adtul za drennuju pracu. Robiać prablemu tam, dzie šlachi vyrašeńnia viadomyja ŭžo dziesiacihodździ.