Meta pavinna vypłacić 567 miljonaŭ dalaraŭ za škodu, naniesienuju dziciačaj psichicy Facebook i Instagram
«Siońniašniaje rašeńnie suda — heta pieramoha dla kožnaha z baćkoŭ, jakija kali-niebudź chvalavalisia pra toje, što sacsietki robiać ź ich dziećmi», — zajaviŭ hienieralny prakuror Ńju-Mieksika Raul Tores.
Sud u štacie Ńju-Mieksika pastanaviŭ, što Meta pavinna vypłacić 567 młn dalaraŭ u jakaści kampiensacyi za škodu, jakuju dva hałoŭnyja pradukty kampanii — Facebook i Instagram — nanieśli dzieciam i padletkam. Hetaja suma budzie vypłačana ŭ dadatak da štrafu ŭ pamiery 375 młn dalaraŭ, jaki prysiažnyja pryznačyli kampanii ŭ sakaviku, piša Bi-bi-si.
Bolšaja častka kampiensacyi — 420 młn dalaraŭ — budzie nakiravana na prahramy dapamohi paciarpiełym dzieciam i maładym ludziam. Astatnija srodki vykarystajuć dla navučańnia, u tym liku nastaŭnikaŭ i miedycynskich rabotnikaŭ, jak supraćstajać škodnamu ŭpłyvu sacyjalnych sietak na padletkaŭ.
Sudździa Brajan Bidschiejd taksama pastanaviŭ, što Meta pavinna ŭvieści šerah dadatkovych abmiežavańniaŭ dla niepaŭnaletnich karystalnikaŭ. Naprykład, schavać ad ich kolkaść «łajkaŭ», nie dasyłać push-apaviaščeńni ŭnačy i padčas vučebnaha dnia, a taksama pierakanacca, što ałharytmy nie rekamiendujuć darosłym karystalnikam akaŭnty dziaciej i padletkaŭ.
«Padobna tamu, jak zavody zabrudžvajuć navakolnaje asiarodździe i tym samym mohuć parušać prava čałavieka na dastatkova čystaje pavietra, škoda, jakuju płatformy Meta nanosiać dzieciam, nie zastajecca ŭnutry płatformaŭ. Hetaja škoda vychodzić u internet i — što, mahčyma, vyklikaje jašče bolšuju zaniepakojenaść — u realny śviet», — adznačyŭ sudździa ŭ svaim rašeńni.
«Siońniašniaje rašeńnie suda — heta pieramoha dla kožnaha z baćkoŭ, jakija kali-niebudź chvalavalisia pra toje, što sacyjalnyja sietki robiać ź ich dziećmi, i dla kožnaha dziciaci, jakoje zasłuhoŭvaje raści ŭ bolš biaśpiečnaj internet-prastory», — zajaviŭ hienieralny prakuror Ńju-Mieksika Raul Tores.
Meta płanuje abskardzić rašeńnie suda.
«My prykładajem usie namahańni, kab zabiaśpiečyć biaśpieku karystalnikaŭ našych płatformaŭ, i adkryta havorym pra ciažkaści, ź jakimi sutykajemsia pry vyjaŭleńni i vydaleńni škodnaha kantentu i złamyśnikaŭ», — zajavili ŭ kampanii.
«My pa-raniejšamu ŭpeŭnienyja ŭ svajoj zdolnaści zabiaśpiečvać biaśpieku padletkaŭ u internecie i praciahniem abaraniacca ad śćviardžeńniaŭ, jakija skažajuć fakty», — dadali ŭ Meta.
Pazoŭ ab škodzie praduktaŭ Meta dla dziaciej i padletkaŭ prakurory štata Ńju-Mieksika padali ŭ 2023 hodzie. Padčas pieršaha etapu razhladu spravy Meta pryznali vinavataj u nieadnarazovych parušeńniach zakona štata Ńju-Mieksika ab niadobrasumlennaj praktycy, pakolki ałharytmy sacyjalnych sietak faktyčna «nakiroŭvali» niepaŭnaletnich karystalnikaŭ da škodnaha kantentu i niebiaśpiečnych kantaktaŭ. Tady sud prysiažnych pryznačyŭ kampanii maksimalna mahčymy štraf — 375 młn dalaraŭ.
Sprava ŭ Ńju-Mieksika — nie adzinaja ŭ svaim rodzie. Niekalki dziasiatkaŭ štataŭ padali ŭ fiederalny sud pazovy suprać kampanii z-za škody, naniesienaj psichičnamu zdaroŭju niepaŭnaletnich karystalnikaŭ, a jašče vosiem štataŭ źviarnulisia ŭ sudy svaich štataŭ. Razhlad fiederalnaj spravy ŭ Kalifornii pačniecca ŭžo ŭ žniŭni.
Pazovy suprać bujnych sacyjalnych sietak padajuć i pryvatnyja asoby. U sakaviku 2026 hoda sud u Łos-Andželesie pastanaviŭ, što kampanii Meta i Google pavinny vypłacić 6 młn dalaraŭ 20‑hadovaj dziaŭčynie, jakaja śćviardžała, što ich płatformy vyklikali ŭ jaje depresiju i suicydalnyja dumki.
Ciapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5959
Kamientary
20-hadovuju łos-anžaličučku niechta prymušaŭ leźci ŭ toj Facebook, Instagram ci Google, što ŭ jaje suicydalnyja dumki źjavilisia?
Heta nahadvaje toje, jak Stryžak fotkami dzievak hvałtavaŭ.