«Chto ŭvohule takija biełarusy». Siamja apłaciła tur na Kaba-Verde, ale nie zmahła atrymać vizy ni ŭ adnym konsulstvie Jeŭropy
Kožny hod Volha arhanizuje siamiejny adpačynak, da jakoha dałučajucca jaje baćki. Jany žyvuć u Biełarusi, a Volha ź siamjoj-užo try hady ŭ Polščy. Sioleta chacieli razam palacieć na Kaba-Verde, ale z 1 studzienia kraina ŭviała vizy dla hramadzian Biełarusi. Volha stała šukać, dzie ŭ Jeŭropie možna adkryć vizu baćkam, ale pakul u jaje ničoha nie atrymałasia. Svajoj prablemaj jana padzialiłasia z vydańniem Most.
Sioleta try pakaleńni siamji pa tradycyi źbiralisia adpravicca ŭ adpačynak. Zvyčajna da płanavańnia pajezdak Volha padychodzić skrupulozna: staranna vyvučaje infarmacyju, prakładaje padrabiaznyja maršruty i pradumvaje zabavy.
Spačatku vybar prypaŭ na Kieniju, adnak nieŭzabavie stała jasna, što arhanizavać adpačynak u hetaj krainie budzie składana i davoli doraha. Tady žančyna spyniłasia na Kaba-Verde.
«Voś prosta syhrała ŭsio: niadoraha lacieć tudy i nazad — mienš za 300 jeŭra na čałavieka, tempieratura vady — 24 hradusy, na dvare tam 26-29, biełarusam možna ŭjazdžać bieź vizy», — pieraličvaje Volha.
Praŭda, apošniaje było aktualna ŭ 2025 hodzie, kali Volha i płanavała adpačynak. Tady hramadzianie Biełarusi mahli atrymlivać dazvoły na ŭjezd u krainu pa prybyćci ŭ aeraport paśla papiaredniaj rehistracyi ŭ sistemie EASE.
Ale z 1 studzienia 2026 hoda Kaba-Verde značna ŭskładniła praceduru nie tolki dla biełarusaŭ, ale i dla hramadzian jašče 95 krain. Ciapier vizu treba atrymlivać zahadzia praz dypłamatyčnyja ŭstanovy Kaba-Verde.
U kancy śniežnia siamja kupiła kvitki na samalot, 1 studzienia zapłaciła za žyllo. A jašče praź niekalki dzion Volha daviedałasia pra vizavy režym. Pra jaho ŭviadzieńnie sapraŭdy praktyčna nie pisali zahadzia.
Na biełarusaŭ z DNŽ u krainach Jeŭrasajuza novaŭviadzieńnie nie raspaŭsiudžvajecca. U Volhi, muža i dziaciej prablem z ujezdam na Kaba-Verde być nie pavinna. A voś dla baćkoŭ novyja praviły stali prablemaj.
«Zrobim vizu za hadzinu»
Siamja adrazu pačała šukać vyjście ź situacyi. Biełarusy razasłali elektronnyja listy ŭ ambasady Kaba-Verde ŭ Brusieli, Lisabonie, Bierlinie i Rymie. Ale adkaz atrymali tolki ź Bierlina.
«Skazali: «Pryjazdžajcie, zrobim vizu za hadzinu». Maŭlaŭ, niama prablem. Baćki jakraz byli ŭ nas — Novy hod razam adznačali. Kupili kvitki — i pajechali ŭ Bierlin», — kaža Volha.
Pravioŭšy ŭ niamieckaj stalicy paŭdnia ŭ čakańni vizy, biełarusy daviedalisia, što sistema dała zboj. Im prapanavali pryjści na nastupny dzień. Adnak zastacca jany nie mahli: baćkam treba było viartacca ŭ Biełaruś, pakolki adpačynak padychodziŭ da kanca.
U Biełarusi konsulstva Kaba-Verde niama. Ustanova ŭ Hiermanii — najbližejšaja, dzie možna atrymać vizu.
«Bieź vizy vas nichto nie puścić»
Vypadkova Volha daviedałasia, što jaje znajomyja taksama vybrali dla adpačynku z baćkami Kaba-Verde i sutyknulisia z anałahičnaj prablemaj. Abjadnaŭšysia, jany na praciahu niekalkich dzion telefanavali ŭ ambasadu ŭ Bierlinie, ale im adkazvali, što sistemu ŭsio jašče nie vypravili. Urešcie biełarusy pieraklučylisia na inšyja ŭstanovy.
«U Brusieli nam skazali, što patrebnaja viza, ale zrabić jaje nie mohuć, bo sistema nie pracuje, — raskazvaje Volha. — U Lisabonie taksama skazali, što sistema nie pracuje: «Vy lacicie — vam tam na miescy zrobiać vizu».
Tady Volha napisała zapyt u techpadtrymku EASE — elektronnaj sistemy papiaredniaj rehistracyi dla ŭjezdu na Kaba-Verde. Ź jaje dapamohaj padarožniki paćviardžajuć svaje pašpartnyja danyja, apłačvajuć abaviazkovy zbor aeraporta i praviarajuć, ci patrebnaja im viza dla ŭjezdu. Joj biełarusy karystalisia da 2026 hoda.
«Učora nočču jany adkazali: «Patrabujecca viza. Bieź vizy vas nichto nie puścić», — kaža žančyna. — Ja tak razumieju, što, chutčej za ŭsio, nas i na samalot nichto nie pasadzić.
«Adčuvańnie, što pasolstvam ničoha nie pieradali»
Admianiać tur užo pozna.
«Kvitki [kuplali] na łaŭkostar z vyletam ź Miłana — ich nichto nie viernie, — kaža Volha. — Znajomyja kuplali tur praz turahienctva. Za pakiet «usio ŭklučana» jany zapłacili 3,5 tysiač dalaraŭ. Ale viartać hrošy im admovilisia: skazali, što heta ich prablema, što nie mohuć zrabić vizu».
Biełaruska adznačaje, što jaje znajomyja navat nie zmahli atrymać piśmovaje paćviardžeńnie ad ambasady ab admovie ŭ vydačy vizy, pakolki farmalna ŭstanova nie admaŭlaje — tolki spasyłajecca na zboi ŭ sistemie.
«Naohuł takoje adčuvańnie, što [pryniali pastanovu], pasolstvam ničoha nie pieradali i jany nie viedajuć, što biełarusam patrebnyja vizy — i chto naohuł takija biełarusy», — narakaje žančyna.
Abiedźvie siamji buduć sprabavać trapić na svaje rejsy praź niekalki dzion, nie traciačy nadziei. Ale Volha kaža, što maralna jany hatovyja da luboha raźvićcia padziej.
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?20
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?
Za dva dni na vyratavalny ŭkoł Ksiušy z Mahilova sabrali rekordnyja $300 tysiač. Mama zdała jaje ŭ dzietdom, a čužyja ludzi bjucca za žyćcio dziciaci44
Za dva dni na vyratavalny ŭkoł Ksiušy z Mahilova sabrali rekordnyja $300 tysiač. Mama zdała jaje ŭ dzietdom, a čužyja ludzi bjucca za žyćcio dziciaci4
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju3333
Kamientary