Były prezident Brazilii Žair Bałsanaru, jaki ciapier adbyvaje prysudžany jamu vialiki turemny termin, byŭ źmieščany ŭ adździaleńnie intensiŭnaj terapii ŭ adnoj z balnic Brazilii. Daktary dyjahnastavali ŭ jaho pnieŭmaniju, paviedamlaje Euronews.
Pa słovach miedykaŭ, u Bałsanaru naziralisia vysokaja tempieratura, panižany ŭzrovień kisłarodu ŭ kryvi, patlivaść i dryžyki. Abśledavańnie pakazała bronchapnieŭmaniju — adnu z formaŭ zapaleńnia lohkich, jakaja, vierahodna, uźnikła paśla traplańnia źmieściva straŭnika ŭ dychalnyja šlachi.
Lekary adznačajuć, što ŭ ludziej starejšych za 70 hadoŭ (Bałsanaru praz tydzień spoŭnicca 71) takaja chvaroba časta prachodzić ciažka i moža pryvieści da siepsisu, kali bakteryi traplajuć u kroŭ.
Starejšy syn byłoha prezidenta paviedamiŭ u sacyjalnych sietkach, što jahonaha baćku pieraviali z turmy ŭ balnicu paśla taho, jak jon pračnuŭsia z mocnymi dryžykami i vanitami. Kardyjołah, jaki lečyć Bałsanaru, taksama adznačyŭ, što ŭ najbližejšyja dni jon, chutčej za ŭsio, nie vierniecca ŭ turmu, bo lačeńnie pravodzicca ŭ stacyjanary i patrabuje ŭviadzieńnia lekaŭ praz kropielnicu.
Siamja palityka praciahvaje prasić Viarchoŭny sud dazvolić Bałsanaru adbyvać pakarańnie pad chatnim aryštam, śćviardžajučy, što ŭ turmie jon nie atrymlivaje naležnaj miedycynskaj dapamohi. Sud pakul admoviŭ u hetym, spasyłajučysia na padazreńni ŭ mahčymaj sprobie ŭciokaŭ, ale raniej pieravioŭ byłoha prezidenta ŭ bolš prastornuju kamieru.
Žair Bałsanaru byŭ asudžany ŭ vieraśni 2025 hoda Viarchoŭnym fiederalnym sudom Brazilii i atrymaŭ 27 hadoŭ turmy za sprobu dziaržaŭnaha pieravarotu i inšyja abvinavačańni, u tym liku ŭ kiraŭnictvie ŭzbrojenaj złačynnaj arhanizacyjaj i sprobie hvałtoŭna źmianić demakratyčny ład. Sam jon svajoj viny nie pryznaje.
Były prezident Brazilii Bałsanaru pieranios apieracyju na kišečniku
«Brazilski Tramp» chavaŭsia ŭ pasolstvie Vienhryi, kab paźbiehnuć aryštu pa spravie dziaržpieravarotu
«Brazilski Tramp» chacieŭ admianić vybary paśla projhryšu. Hienierały papiaredzili, što tady aryštujuć jaho
U Brazilii małanka ŭdaryła pa natoŭpie prychilnikaŭ Žaira Bałsanaru VIDEA
Kamientary