Były prezident Brazilii Bałsanaru asudžany na 27 hadoŭ turmy za padrychtoŭku vajennaha pieravarotu
Były prezident Brazilii Žair Bałsanaru asudžany na 27 hadoŭ turmy. Kalehija sudździaŭ Viarchoŭnaha suda Brazilii vyniesła prysud nieŭzabavie paśla taho, jak pryznała Bałsanaru vinavatym u zmovie z metaj vajennaha pieravarotu paśla parazy na vybarach 2022 hoda, piša Bi-bi-si.
Advakaty Bałsanaru vypuścili zajavu, u jakoj nazvali prysud «absurdna niesuvymiernym» i paabiacali abskardzić jaho «na ŭsich uzroŭniach, u tym liku mižnarodnym».
Čatyry ź piaci sudździaŭ Viarchoŭnaha suda pryznali 70-hadovaha Bałsanaru vinavatym u kiraŭnictvie zmovaj, nakiravanaj na zachavańnie jaho ŭłady paśla taho, jak jon prajhraŭ vybary 2022 hoda svajmu levamu supierniku Łuisu Inasiu Łule da Siłva, jaki zastajecca prezidentam da hetaha času.
Sudździ ŭstanavili, što, niahledziačy na toje, što zmova nie zmahła atrymać dastatkovuju padtrymku z boku vajskoŭcaŭ, jana ŭsio ž taki zaviaršyłasia šturmam uradavych budynkaŭ prychilnikami Bałsanaru 8 studzienia 2023 hoda.
Adzin z sudździaŭ apraŭdaŭ Bałsanaru, a apošni sudździa doŭha ciahnuŭ z rašeńniem, ale prostaj bolšaści hałasoŭ chapiła.
Były prezident, jaki ciapier znachodzicca pad chatnim aryštam, zaŭsiody admaŭlaŭ abvinavačańni. Čakajecca, što abarona eks-prezidenta padzie apielacyju.
Sam Žair Bałsanaru na sudzie adsutničaŭ, pavodle słoŭ advakata, z-za stanu zdaroŭja, ale byŭ zaŭvažany žurnalistam AFP u čaćvier ranicaj u sadzie svajho doma ŭ Brazilia. U jaho i praŭda nie raz byli prablemy sa zdaroŭjem paśla taho, jak u 2018 hodzie jon pieražyŭ zamach: jaho paranili nažom u žyvot.
Prychilniki Bałsanaru ŭvarvalisia ŭ ŭradavyja budynki i razhramili ich paśla taho, jak jon prajhraŭ prezidenckija vybary levamu Łuisu Inasiu Łule da Siłvie.
Bałsanaru publična padtrymlivaŭ prezidenta ZŠA Donalda Trampa, jaki nazvaŭ sud nad im «palavańniem na viedźmaŭ». U čaćvier Tramp zajaviŭ, što vielmi ździŭleny vierdyktam.
«Nu, ja sačyŭ za hetym sudom. Ja viedaju jaho davoli dobra. Zamiežny lidar. Jon dobry, ja liču, jon byŭ dobrym prezidentam Brazilii. I heta vielmi dziŭna, što takoje adbyłosia», — tak adkazaŭ Tramp na pytańnie žurnalista, ci ŭviadzie jon novyja sankcyi suprać Brazilii.
«Ja vielmi niezadavoleny. Ja viedaju prezidenta Bałsanaru, viedaju nie vielmi dobra, ale ja viedaju jaho jak lidara krainy. I ja zaŭsiody ličyŭ jaho vielmi pramym, vielmi vybitnym jak čałaviek, vielmi vybitnym čałaviekam. Ja dumaju, heta žachlivaja sprava. Vielmi žachlivaja. Ja dumaju, heta vielmi drenna dla Brazilii», — dadaŭ Tramp.
Dziaržsakratar ZŠA Marka Rubio śledam za Trampam nazvaŭ sud nad Bałsanaru «palavańniem na viedźmaŭ» i paabiacaŭ, što ZŠA adreahujuć, ale jak — nie skazaŭ.
«Palityčna matyvavanyja pieraśledy z boku padpadajučaha pad sankcyi parušalnika pravoŭ čałavieka Alešandry de Maraisa praciahvajucca: jon i inšyja ŭ Viarchoŭnym sudzie Brazilii niespraviadliva pastanavili adpravić u turmu byłoha prezidenta Žaira Bałsanaru, — napisaŭ Rubio ŭ sietcy X. — Złučanyja Štaty adkažuć na heta palavańnie na viedźmaŭ adpaviednym čynam».
MZS Brazilii ŭ adkaz zajaviła, što Rubia, napadajučy na ŭłady Brazilii, ihnaruje fakty i «pierakanaŭčyja dokazy ŭ materyjałach [abvinavačańnia]», i što brazilskaja demakratyja nie paddasca pahrozam z boku ZŠA.
Ciapierašni prezident Brazilii, levy palityk Łuis Inasiu Łuła da Siłva ŭ teleintervju jašče da vyniasieńnia vierdyktu skazaŭ, što nie baicca novych sankcyj Vašynhtona.
Brazilski kanhresmien Eduarda Bałsanaru, syn byłoha prezidenta, zajaviŭ Reuters, što čakaje dadatkovych sankcyj ZŠA ŭ dačynieńni da brazilskich čynoŭnikaŭ i sudździaŭ paśla abvinavaŭčaha vierdyktu suprać jaho baćki.
Jon taksama papiaredziŭ, što sudździ Viarchoŭnaha suda, jakija prahałasavali za pryznańnie byłoha prezidenta vinavatym, mohuć sutyknucca z sankcyjami ŭ adpaviednaści z amierykanskim Aktam Mahnickaha, jaki raniej užo prymianiaŭsia administracyjaj Trampa suprać sudździ Alešandry dy Maraisa, jaki kuryravaŭ spravu na rańnich stadyjach.
Kamientary