Bałsanaru pačaŭ adbyvać 27‑hadovy termin pa spravie ab sprobie pieravarotu

Bałsanaru, prysudžany da 27 hadoŭ i troch miesiacaŭ źniavoleńnia, budzie adbyvać pakarańnie na terytoryi štab-kvatery Fiederalnaj palicyi ŭ stalicy krainy Brazilia, kudy byŭ dastaŭleny na minułym tydni.

Jak paviedamlajuć brazilskija ŚMI, 70‑hadovy Bałsanaru znachodzicca ŭ nievialikaj kamiery płoščaj 12 kv. m, u joj jość televizar, nievialiki chaładzilnik i kandycyjanier.

Viarchoŭny sud adchiliŭ apielacyju na jaho prysud u pačatku hetaha miesiaca, a ŭ aŭtorak pastanaviŭ, što prysud źjaŭlajecca kančatkovym.

Bałsanaru byŭ asudžany ŭ vieraśni, paśla taho jak jaho pryznali vinavatym u zmovie z metaj pieraškodzić Łuisu Inasiu Łule da Siłvie ŭstupić na pasadu prezidenta paśla vybaraŭ 2022 hoda.

Prakurory zajavili, što zmova pravaliłasia tolki z-za adsutnaści padtrymki z boku vyšejšaha vajskovaha kiraŭnictva.

Bałsanaru znachodziŭsia pad chatnim aryštam u žyłym kompleksie ŭ Brazilia, ale ŭ minułyja vychadnyja byŭ źmieščany pad vartu, pakolki ŭłady paličyli jaho schilnym da ŭciokaŭ.

Jak havaryłasia ŭ rašeńni sudździ Viarchoŭnaha suda Brazilii Alešandre de Marajesa, zatrymańnie było nieabchodna ŭ jakaści previentyŭnaj miery ŭ suviazi z tym, što Bałsanaru sprabavaŭ paškodzić elektronny branzalet na ščykałatcy, a jahony syn Fłavia zaklikaŭ da publičnaj akcyi pratestu kala doma, dzie žyŭ eks-prezident.

De Marajes zajaviŭ, što byli prykmiety taho, što Bałsanaru moh pasprabavać źbiehčy padčas hetaj akcyi. Pa słovach sudździ, pablizu ad žyłoha kompleksu znachodzicca pasolstva ZŠA, i palityk moh mieć namier atrymać tam palityčny prytułak.

Bałsanaru pryznaŭ, što paškodziŭ elektronny branzalet pajalnikam i zajaviŭ, što padobnyja pavodziny byli nastupstvam pryjomu lekaŭ. Sprobu ŭciokaŭ jon admaŭlaŭ.

Raniej advakaty byłoha prezidenta źviarnulisia ŭ Viarchoŭny sud z prośbaj dazvolić jamu adbyć uvieś termin źniavoleńnia pad chatnim aryštam z humanitarnych mierkavańniaŭ.

Jany prasili dazvolić Bałsanaru pakidać svoj dom dla vizitaŭ da lekara, zajaviŭšy, što ich klijentu patrabujecca rehularnaje lačeńnie. U aŭtorak sudździa de Marajes rasparadziŭsia zabiaśpiečyć Bałsanaru kruhłasutačny miedycynski dohlad.

Paśla vizitu da Bałsanaru ŭ aŭtorak jaho syn Karłas apisaŭ baćku jak «nadzvyčaj słaboha i psichałahična raźbitaha» čałavieka.

«Jon vielmi mała jeść — čałaviek, jaki viedaje, što nie ździajśniaŭ złačynstva, nie moža ličyć heta narmalnym», — cytuje jaho AFP.

Bałsanaru, jaki byŭ prezidentam Brazilii z 2019 pa 2022 hod, nieadnarazova śćviardžaŭ, što nievinavaty i źjaŭlajecca achviaraj palityčnaha pieraśledu.

• 2
• 1
• 0
• 0
• 0
• 1
• 0
• 0