Z efiru ANT vyrazali słovy Łukašenki pra toje, što vyzvalenyja palitviaźni zmohuć zastacca ŭ Biełarusi
Padčas pajezdki ŭ Drybinski rajon Alaksandr Łukašenka prakamientavaŭ temu vyzvaleńnia palitviaźniaŭ i pieramovy z ZŠA. Ale jaho słovy pa-roznamu padali dziaržaŭnyja resursy.
Jak viadoma, učora Łukašeka inśpiektavaŭ haspadarki Drybinskaha rajona Mahiloŭskaj vobłaści. U razmovie z žurnalistami jon prakamientavaŭ pieramovy z ZŠA nakont vyzvaleńnia źniavolenych.
U aryhinalnaj viersii, jakuju apublikavaŭ telehram-kanał «Puł Pieršaha», hučyć:
«Zakon dla ŭsich adziny. Parušyŭ zakon — idzi. Voś takaja ščyraja razmova. Chočuć zastacca [u Biełarusi] — kali łaska. Ale ŭ miežach najaŭnaha pravavoha pola. Tyja, chto nam nie patrebny, ci buduć siadzieć, ci vy ŭ Amieryku ich zabieracie. Zusim ščyra kažu».
U adpaviednym materyjale dziaržaŭnaha ahienctva BiełTA, čytajem:
«Jon padkreśliŭ, što ź Biełarusi taki ludziej nie vyhaniajuć, ale jany pavinny vykonvać zakon. (…) «Chočuć zastacca — kali łaska. Ale ŭ miežach najaŭnaha pravavoha pola».
A voś hledačy prahramy «Našy naviny» na ANT u piatnicu ŭbačyli zusim inšuju karcinku. Słovy pra toje, što vyzvalenyja ludzi mohuć zastacca ŭ Biełarusi, prosta vykinuli. Zamiest hetaha ŭ efir pajšła tolki žorstkaja častka śpiča:
«Tyja, chto nam nie patrebny, ci buduć siadzieć, ci vy ŭ Amieryku ich zabieracie. Zusim ščyra kažu. Ja nie chaču, kab jany znoŭku biehali, kidali kamieńni ci jašče niešta ŭ ich. Ja nie chaču. Ja pavinien zabiaśpiečyć svaju biaśpieku, svajho naroda i svajoj dziaržavy».
Varyjant «nie chapiła času» adpadaje adrazu. Jak viadoma, siužety pra Łukašenku na dziaržTB mohuć iści i pa 40 chvilin. Na praciahłyja razvahi dyktatara zvyčajna znachodzicca čas. Značyć, hety mantaž zrobleny znarok.
Admietna, što ŭ navinach na «Biełaruś 1» hetyja słovy Łukašenki vyrašyli nie cenzuravać.
Kamientary
Ŭ hitleraŭskim rejchu tak sama byli "zakony", što nie vyratavała hitleraŭskich sudździaŭ i karnikaŭ ad kary za ich złačynstvy suprać čałaviectva.