Estoniec vykraŭ u svajoj byłoj žonki-biełaruski dačku. Prapahanda paprakaje: nie treba było rabić dziciaci estonski pašpart

Piać dzion tamu biełaruska Alena padniała paniku ŭ Threads. 27 červienia rankam jaje były muž-estoniec uziaŭ u čarhovy raz ich ahulnuju dačku (hrafik znosin ź dziciem byŭ vyznačany biełaruskim sudom), ale nie viarnuŭ.

Była aformlena zabarona na vyvaz dziciaci z terytoryi Biełarusi. Ale ž maleńkaja Daša, jak hramadzianka i Biełarusi, i Estonii, mieła jašče i estonski pašpart.

Pavialičyć

Na nastupny dzień Alena paviedamiła, što joj stała viadoma: były muž, jaho maci i dačka ŭžo znachodziacca ŭ Rasii (u Smalensku) — i płanujuć pierasiekčy miažu z Estonijaj.

Jašče praź dzień biełaruscy patelefanavali z estonskaj palicyi i paćvierdzili: jaje dačka razam z baćkam znachodzicca na terytoryi Estonii. Ciapier maci ŭ rospačy šukaje sposaby viarnuć dačku sabie.

Detali svajho siamiejnaha žyćcia Alena raspaviała «Minskaj praŭdzie».

Sama žančyna z Marjinaj horki. U 2021 hodzie jana vyjšła zamuž za hramadzianina Estonii i naradziła dačku Darju — žyć siamja vyrašyła ŭ Jeŭrasajuzie.

Ale ž składanaści ŭźnikli amal adrazu. Alena śćviardžaje, što były kachany amal što nie pracavaŭ — moh znajści niejkuju chałturu raz na paŭhoda. A hrošy, jakija svajaki padaryli z nahody naradžeńnia dziciaci, baćka prajhraŭ u kazino.

Žyli biedna — navat na adzieńnie małoj finansaŭ nie zaŭsiody chapała. Pry hetym Alena kaža, što dačkoj tata zusim nie zajmaŭsia i razdražniaŭsia praz toje, što niemaŭla płača pa načach.

Dziaŭčyncy, jakaja naradziłasia ŭ Estonii ad baćki-estonca ŭ pieršuju čarhu zrabili estonski pašpart. Biełaruski pašpart u maleńkaj Darji źjaviŭsia paźniej — u 2022 hodzie, kali siamja pryjechała ŭ Biełaruś u hości da maci Aleny.

Paśla taho adpačynku adnosiny pamiž Alenaj i jaje mužam tolki pahoršylisia. Letam 2023 hoda, nie biez składanaściaŭ adšukaŭšy hrošy na pajezdku na radzimu, žančyna z dačkoj znoŭ pryjechali ŭ Biełaruś. U hety momant Estonija anulavała Alenie dazvoł na žycharstva — jana kaža, što nahodaj stała adsutnaść pracy i aficyjnaha prybytku ŭ jaje muža.

U vyniku siamja vyrašyła žyć u Biełarusi — estoniec pryjechaŭ siudy i aformiŭ dazvoł na žycharstva. Arandavali kvateru ŭ Minsku — ale spakojnaha žyćcia znoŭ nie atrymałasia. I vinoj tamu prablemy z hrašyma. Alena raspaviadaje, što muž staŭ vielmi ahresiŭnym, paśla čarhovaha vyśviatleńnia adnosin joj navat pryjšłosia pisać zajavu ŭ milicyju i zdymać paboi.

U 2024 hodzie žančyna z dačkoj viarnułasia da svajoj maci ŭ Marjinu Horku, padała na razvod. Amal što adnačasova byłyja muž i žonka źviarnulisia ŭ sud, kab vyznačyć paradak znosin ź dziciem — vynik usich zadavoliŭ.

Ale ž było zrazumieła, što šansy estonca praciahnuć dazvoł na žycharstva ŭ Biełarusi amal što nulavyja — jon aficyjna nie pracavaŭ i nie mieŭ prybytkaŭ.

Pavialičyć

Kali jon pryjazdžaŭ da dački, časta adbyvalisia kanflikty — i doma, i ŭ dziciačym sadku. Alena vydychnuła z palohkaj, kali vyjhrała sud pa ŭstanaŭleńni zabarony na vyjezd dziciaci z krainy.

Byłoha muža heta ŭ vyniku nie spyniła. Prapahandysty miarkujuć, što estoniec moh schłusić na radzimie, byccam zhubiŭ estonski pašpart dački, i zrabić novy — a hetaha dakumienta nie było ŭ bazie pamiežnikaŭ.

Pavialičyć

U tekście prapahanda niekalki razoŭ padkreślivaje, što takich prablem u maci nie było b, kali b Darja nie mieła estonskaha pašparta.

• 1
• 0
• 6
• 5
• 2
• 6
• 0
• 0