Эстонец выкраў у сваёй былой жонкі-беларускі дачку. Прапаганда папракае: не трэба было рабіць дзіцяці эстонскі пашпарт
Алена спрабавала спыніць мужа, які вывез у Еўрасаюз 4‑гадовую дачку, нягледзячы на афіцыйную забарону на вываз дзіцяці з Беларусі. Цяпер стала вядома: дзяўчынка знаходзіцца на тэрыторыі Эстоніі.
Пяць дзён таму беларуска Алена падняла паніку ў Threads. 27 чэрвеня ранкам яе былы муж-эстонец узяў у чарговы раз іх агульную дачку (графік зносін з дзіцем быў вызначаны беларускім судом), але не вярнуў.
Была аформлена забарона на вываз дзіцяці з тэрыторыі Беларусі. Але ж маленькая Даша, як грамадзянка і Беларусі, і Эстоніі, мела яшчэ і эстонскі пашпарт.
На наступны дзень Алена паведаміла, што ёй стала вядома: былы муж, яго маці і дачка ўжо знаходзяцца ў Расіі (у Смаленску) — і плануюць перасекчы мяжу з Эстоніяй.
Яшчэ праз дзень беларусцы патэлефанавалі з эстонскай паліцыі і пацвердзілі: яе дачка разам з бацькам знаходзіцца на тэрыторыі Эстоніі. Цяпер маці ў роспачы шукае спосабы вярнуць дачку сабе.
Дэталі свайго сямейнага жыцця Алена распавяла «Мінскай праўдзе».
Сама жанчына з Мар’інай горкі. У 2021 годзе яна выйшла замуж за грамадзяніна Эстоніі і нарадзіла дачку Дар’ю — жыць сям’я вырашыла ў Еўрасаюзе.
Але ж складанасці ўзніклі амаль адразу. Алена сцвярджае, што былы каханы амаль што не працаваў — мог знайсці нейкую халтуру раз на паўгода. А грошы, якія сваякі падарылі з нагоды нараджэння дзіцяці, бацька прайграў у казіно.
Жылі бедна — нават на адзенне малой фінансаў не заўсёды хапала. Пры гэтым Алена кажа, што дачкой тата зусім не займаўся і раздражняўся праз тое, што немаўля плача па начах.
Дзяўчынцы, якая нарадзілася ў Эстоніі ад бацькі-эстонца ў першую чаргу зрабілі эстонскі пашпарт. Беларускі пашпарт у маленькай Дар’і з’явіўся пазней — у 2022 годзе, калі сям’я прыехала ў Беларусь у госці да маці Алены.
Пасля таго адпачынку адносіны паміж Аленай і яе мужам толькі пагоршыліся. Летам 2023 года, не без складанасцяў адшукаўшы грошы на паездку на радзіму, жанчына з дачкой зноў прыехалі ў Беларусь. У гэты момант Эстонія анулявала Алене дазвол на жыхарства — яна кажа, што нагодай стала адсутнасць працы і афіцыйнага прыбытку ў яе мужа.
У выніку сям’я вырашыла жыць у Беларусі — эстонец прыехаў сюды і аформіў дазвол на жыхарства. Арандавалі кватэру ў Мінску — але спакойнага жыцця зноў не атрымалася. І віной таму праблемы з грашыма. Алена распавядае, што муж стаў вельмі агрэсіўным, пасля чарговага высвятлення адносін ёй нават прыйшлося пісаць заяву ў міліцыю і здымаць пабоі.
У 2024 годзе жанчына з дачкой вярнулася да сваёй маці ў Мар’іну Горку, падала на развод. Амаль што адначасова былыя муж і жонка звярнуліся ў суд, каб вызначыць парадак зносін з дзіцем — вынік усіх задаволіў.
Але ж было зразумела, што шансы эстонца працягнуць дазвол на жыхарства ў Беларусі амаль што нулявыя — ён афіцыйна не працаваў і не меў прыбыткаў.
Калі ён прыязджаў да дачкі, часта адбываліся канфлікты — і дома, і ў дзіцячым садку. Алена выдыхнула з палёгкай, калі выйграла суд па ўстанаўленні забароны на выезд дзіцяці з краіны.
Былога мужа гэта ў выніку не спыніла. Прапагандысты мяркуюць, што эстонец мог схлусіць на радзіме, быццам згубіў эстонскі пашпарт дачкі, і зрабіць новы — а гэтага дакумента не было ў базе памежнікаў.
У тэксце прапаганда некалькі разоў падкрэслівае, што такіх праблем у маці не было б, калі б Дар’я не мела эстонскага пашпарта.
Цяпер чытаюць
«Ліпа ва ўсіх сэнсах». Вось як будуць выглядаць дрэвы ў вазонах на галоўным мінскім праспекце. Блогеры атрымалі заданне імі захапляцца10
Каментары