Pad Minskam źbirajuć novy poŭnapamierny pikap. Voś kolki jon kaštuje
U Biełarusi pačali pradavać poŭnapamierny pikap Dongfeng Z9, jaki vypuskajuć na pradpryjemstvie «Junison» pad Minskam. Pra jaho košt i ŭmovy kredytnaj prahramy, piša Myfin.by.
Ceny na madel pačynajucca ad 119 800 rubloŭ i dachodziać da 146 800 rubloŭ — u zaležnaści ad daŭžyni kołavaj bazy, ruchavika, karobki pieradač i kamplektacyi.
Pikap dastupny ŭ standartnym i daŭhabaznym vykanańniach.
Pieršaja viersija maje kołavuju bazu 3 300 mm, druhaja — 3 505 mm. Mienavita daŭhabazny Z9 dasiahaje 5 725 mm u daŭžyniu i atrymaŭ hruzavuju płatformu pamieram 1 760 × 1 600 × 555 mm.
Samy dastupny Dongfeng Z9 — heta standartny pikap ź bienzinavym 2, 0‑litrovym turbaruchavikom mahutnaściu 258 k. s., 8‑stupieńčatym aŭtamatam i poŭnym pryvadam. U kamplektacyi Winter jon kaštuje 119 800 rubloŭ.
Dyzielnyja viersii asnaščajucca 2, 3‑litrovym ruchavikom na 190 k. s.
Pikap sa standartnaj bazaj i miechaničnaj karobkaj pieradač u vykanańni Titan acanili ŭ 123 800 rubloŭ. Za dyzielnuju madyfikacyju z 8‑stupieńčatym «aŭtamatam» prosiać 130 800 rubloŭ, a za bolš asnaščany varyjant Platinum — 137 800 rubloŭ.
Daŭhabazny Z9 daražejšy. Bienzinavaja viersija z aŭtamatam u vykanańni LWB Titan kaštuje 129 800 rubloŭ. Dyzielny pikap ź miechaničnaj karobkaj abydziecca ŭ 133 800 rubloŭ, z aŭtamatyčnaj — u 140 800 rubloŭ. Topavaja viersija z dyzielem, AKP i kamplektacyjaj LWB Platinum — 146 800 rubloŭ.
Usie viersii Dongfeng Z9 asnaščajucca poŭnym pryvadam BorgWarner i błakiroŭkaj dyfierencyjała. Darožny praśviet zajaŭleny na ŭzroŭni 235 mm, hłybinia brodu, jaki pieraadolvajecca, — da 800 mm. Kuty ŭjezdu i źjezdu składajuć 31 i 26 hradusaŭ adpaviedna.
Pikap maje dvuchrazradnuju piacimiesnuju kabinu.
U zaležnaści ad kamplektacyi ŭ śpis abstalavańnia ŭvojduć śviatłodyjodnaja optyka, abahreŭ łabavoha škła i rula, piarednija siadzieńni z abahrevam, vientylacyjaj i elektrarehulavańniami, 10‑calevaja ličbavaja prybornaja panel i multymiedyjnaja sistema z ekranam na 12 calaŭ.
Taksama dla Z9 zajaŭleny sistema stabilizacyi, dapamoha pry ekstrannym tarmažeńni, abarona ad pierakulvańnia i funkcyja Auto Hold. U viersij z aŭtamatyčnaj karobkaj pieradač praduhledžany režymy ruchu, pazadarožny kruiz-kantrol i funkcyja «tankavaha» razvarotu.
Dla madeli praduhledžana kredytnaja prahrama sa staŭkaj ad 6,6% hadavych na praciahu pieršych troch hadoŭ. Dongfeng Z9 staŭ jašče adnoj madellu marki, vytvorčaść jakoj arhanizavana na «Junisonie»: na placoŭcy taksama vypuskajuć Shine, Shine GS, T5 EVO, MAGE, HUGE i Bigvan.
Biełarus palacieŭ u Nicu praz Stambuł — ciapier jon u komie ŭ francuzskaj balnicy. Miascovyja miedyki rajać adklučać jaho6
Kamientary
Niejak heta nie pa biełarusku, pisać košty nie ŭ dalarach.