Biełarus palacieŭ u Nicu praz Stambuł — ciapier jon u komie ŭ francuzskaj balnicy. Miascovyja miedyki rajać adklučać jaho

Viktar Pahrabny z Mahilova trapiŭ u balnicu padčas pajezdki ŭ Francyju. Ciapier siamja ŭ sacsietkach źbiraje 100 tysiač jeŭra, kab pieravieźci Viktara ŭ Biełaruś i ŭžo tut zajmacca jaho lačeńniem i reabilitacyjaj.

Rodnyja mužčyny vykłali dakumienty z balnicy. Miarkujučy pa papierach, Viktar pryjechaŭ u Francyju, kab adpačyć — pa inšych danych, jon pajechaŭ tudy pracavać. Ciapier jon lažyć u balnicy horada Nica.

Usio pačałosia jašče padčas pierajezdu ŭ Francyju: u dakumientach paznačana, što Viktar try hadziny lacieŭ ź Minska ŭ Stambuł, prabyŭ dźvie hadziny ŭ stambulskim aeraporcie i potym jašče try hadziny lacieŭ u Nicu. Doŭhaja nieruchomaść i pieraloty — heta faktary ryzyki, kali ŭ čałavieka ŭžo jość tromby.

Paśla pieralotu ŭ jaho pastupova pačała pavialičvacca zadyška, i praz tydzień jon źviarnuŭsia ŭ balnicu. U levaj nazie mužčyny znajšli tromb, a taksama pabačyli na KT prykmiety trombaembalii lohačnaj arteryi. Tym nie mienš, pišuć francuzskija miedyki, na toj čas Viktar byŭ jašče ŭ adnosna stabilnym stanie.

Jaho pakłali ŭ balnicu i pačali davać jamu antykaahulant, kab źniščyć tromb. Było heta ŭ pačatku červienia.

8 červienia stan mužčyny rezka pahoršaŭ, upaŭ cisk i puls. U pravym prysercku znajšli tromb, pieraviali Viktara ŭ reanimacyju. Dalej jaho serca dvojčy spyniłasia — spačatku na siem chvilin, potym na dvaccać chvilin, abodva razy francuzskija miedyki viartali mužčynu da žyćcia.

Miarkujučy pa dakumientach, miedyki padklučali biełarusa da aparata EKMO, jaki časova biare na siabie pracu serca i lohkich, padklučali i da ŠVŁ. Uvodzili macniejšyja, čym raniej, leki, kab rastvaryć tromby, davali Viktaru antybijotyki, bo znajšli ŭ jaho infiekcyi, i padklučali da dyjalizu, tamu što ŭ mužčyny paškodžanyja nyrki. Pa stanie na 27 červienia Viktar usio jašče dychaŭ z dapamohaj.

Na žal, mozh mužčyny mocna paciarpieŭ. Kali serca Viktara spyniałasia, jaho ŭviali ŭ stan hłybokaj siedacyi — praściej kažučy, u vielmi hłyboki son. Ale ž kali prybrali leki, jakija zabiaśpiečvali tuju siedacyju, Viktar nie pračnuŭsia i tak i zastaŭsia ŭ komie. Jamu praviali niekalki abśledavańniaŭ, pa jakich pabačyli, što ŭ jaho značnaje paškodžańnie mozhu paśla spynieńniaŭ serca i vyklikanaha hetym niedachopu kisłarodu.

Kamanda francuzskich miedykaŭ acaniła pierśpiektyvy adnaŭleńnia na 4‑5 bałaŭ pa škale CPC. U lepšym vypadku heta aznačaje komu ci viehietatyŭny stan, u horšym — śmierć. Svaju vysnovu jany padmacavali mierkavańniem vonkavaha nieŭrołaha, i hetaja doktarka taksama prahałasavała za spynieńnie aktyŭnaha lačeńnia.

Pavodle francuzskich pratakołaŭ lekavańnia, mužčynie rekamiendujuć terminalnuju ekstubacyju. Praściej kažučy, miedyki nie bačać sensu ŭ tym, kab i dalej vykarystoŭvać aparat, jaki dapamahaje jamu dychać.

Jak piša žonka mužčyny ŭ instahramie, na siońnia ŭdałosia sabrać bolš za 55 tysiač rubloŭ, i rodnyja Viktara čakajuć paćviardžeńnia pa samalocie koštam 80 tysiač jeŭra. Na tym samalocie, kali ŭsio składziecca, mužčynu i paviazuć u Biełaruś.

Viktar naležyć da supolnaści futbolnych fanataŭ, i adzin z tematyčnych akaŭntaŭ u instahramie patłumačyŭ, čamu adkryli terminovy zbor:

«Usio heta adbyvajecca ŭ Francyi, adkul patrabujecca terminovaje transpartavańnie ŭ biełaruskuju kliniku, bo francuzskija lekary dziejničajuć nieachvotna, spasyłajučysia na małyja šancy na adnaŭleńnie.

Adnak słova «zdavacca» — nie pra našu kulturu i pryncypy. Tamu my z vami prosta abaviazany chacia b pasprabavać začapicca za jaho žyćcio!»

Błohier kocmos_stas taksama raskazvaje, što kala Viktara ciapier znachodzicca jaho žonka Julija, i dzielicca infarmacyjaj ad jaje:

«Daktary prapanujuć joj adklučyć Viktara ad aparataŭ i nie dajuć nijakaha šansa na žyćcio, ale ŭ Viktara jość refleksy, i jamu nieabchodny darahi avijapieralot, jaki moža dać šaniec na vyratavańnie žyćcia i dalejšaje palapšeńnie».

Inšy siabar Viktara pad nikam borissborkin udakładniaje, što lohkija mužčyny ciapier pracujuć tolki na 30%. I raśpisvaje padrabiaźniej, što płanujuć rodnyja Viktara.

Pavodle jaho słoŭ, u abłasnoj balnicy ŭžo padrychtavali pałatu dla mužčyny:

«Ciapier hałoŭnaja zadača — dastavić jaho dadomu, zrabić heta moža tolki sanitarnaja avijacyja. Košt pieravozki składaje ad 80 da 130 tysiač jeŭra. Praz palityčnyja niuansy znajści prydatny bort vielmi ciažka, ale praca ŭ hetym kirunku idzie pastajanna».

Znachodžańnie mužčyny ŭ francuzskaj balnicy taksama kaštuje hrošaj. Dzień u reanimacyi abychodzicca ŭ 4000 jeŭra, a strachoŭka ŭ Viktara była na 30 tysiač jeŭra. Ciapier, jak pišuć znajomyja z historyjaj, u balničnym rachunku Viktara suma bolš čym u 90 tysiač jeŭra.

• 0
• 0
• 3
• 1
• 0
• 13
• 0
• 0