Vienhierski režysior, scenaryst i pradziusar Bieła Tar, viadomy pa filmach «Sataninskaje tanha» i «Turynski koń», pamior va ŭzroście 70 hadoŭ paśla praciahłaj chvaroby.
Tara ličać adnym z hałoŭnych pradstaŭnikoŭ miedytatyŭnaha, zmročnaha i miełanchaličnaha kino ŭ Jeŭropie. Jaho paetyčnyja, časam palityčna nasyčanyja filmy vyłučalisia piesimistyčnym pohladam na čałaviečuju pryrodu i čornym humaram.
Naradziŭsia jon u 1955 hodzie ŭ vienhierskim horadzie Pieč i pačaŭ karjeru na studyi imia Bieły Bałaža, viadučaj placoŭcy ekśpierymientalnaha kino ŭ Vienhryi. Mižnarodnaje pryznańnie pryjšło da jaho ŭ 1994 hodzie paśla pakazu siamihadzinnaj čorna-biełaj apovieści «Sataninskaje tanha», pryśviečanaj krachu kamunizmu va Uschodniaj Jeŭropie, pavodle adnaho z ramanaŭ Łasła Krasnaharkai, łaŭreata Nobieleŭskaj premii pa litaratury 2025 hoda.
U 2000 hodzie Tar ekranizavaŭ jašče adzin raman Krasnaharkai — «Miełancholija supracivu», a jaho apošniaja rabota «Turynski koń» (2011) ličycca samym zmročnym šedeŭram. Film pakazvaje štodzionnaje žyćcio haspadara i jaho dački i zasnavany na historyi pra niervovy zryŭ fiłosafa Nicše. Priemjera adbyłasia na 61‑m Bierlinskim kinafiestyvali, dzie film atrymaŭ Hran-pry žury «Srebny miadźviedź».
Paśla vychadu «Turynskaha kania» Tar abjaviŭ pra zaviaršeńnie karjery i pierajechaŭ u Sarajeva, dzie zasnavaŭ mižnarodnuju kinaškołu film.factory. Jon byŭ členam Jeŭrapiejskaj kinaakademii z 1997 hoda, a ŭ 2023‑m atrymaŭ Hanarovuju ŭznaharodu prezidenta Akademii.
Jeŭrapiejskaja kinaakademija adznačyła:
«My ŭ žałobie pa vybitnym režysioru i jarkaj asobie z palityčnaj pazicyjaj, jakoha šanujuć kalehi i jakim zachaplajucca hledačy va ŭsim śviecie».
Ciapier čytajuć
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju14
Kamientary