Rasija atrymlivaje 150 młn dalaraŭ dadatkovaha dachodu ŭ dzień ad rostu cen na naftu
Da kanca sakavika rasijski ŭrad moža atrymać ad 3,3 da 4,9 młrd dalaraŭ ahulnaha dadatkovaha dachodu.
Z-za rostu cen na naftu, vyklikanaha vajennym kanfliktam na Blizkim Uschodzie, Rasija akazałasia ŭ vyjhryšy.
Maskva zarabiła, pavodle acenak, ad 1,3 da 1,9 młrd dalaraŭ na padatkach ad ekspartu nafty paśla taho, jak faktyčnaje zakryćcio Armuzskaha praliva pryviało da rostu popytu na rasijskuju syravinu z boku Indyi i Kitaja, piša Financial Times.
Rasija zarablaje da 150 miljonaŭ dalaraŭ u dzień dadatkovych biudžetnych dachodaŭ ad prodažu nafty.
ZŠA taksama źmiakčyli sankcyi suprać Rasii i cisk na Indyju, kab taja nie kuplała rasijskuju naftu, što nakiravała značnuju kolkaść tankieraŭ u Indyjski akijan.
Pavodle raźlikaŭ Financial Times, zasnavanych na halinovych dadzienych i acenkach analitykaŭ, da kanca sakavika rasijski ŭrad moža atrymać ad 3,3 da 4,9 młrd dalaraŭ ahulnaha dadatkovaha dachodu. Heta pry ŭmovie, što siaredniaja cana na naftu marki Urals składzie kala 70—80 dalaraŭ za barel u hetym miesiacy.
Heta kardynalnaja źmiena situacyi dla Maskvy, jakaja da vajny ź Iranam sutyknułasia z padzieńniem cen i strataj bolšaj častki prodažaŭ u Indyju praź cisk Vašynhtona. Ekspart rasijskaj syroj nafty i naftapraduktaŭ u lutym źniziŭsia na 11,4 pracenta da 6,6 młn barelaŭ u sutki, što źjaŭlajecca samym nizkim uzroŭniem z momantu ŭvarvańnia va Ukrainu ŭ 2022 hodzie, havorycca ŭ spravazdačy Mižnarodnaha enierhietyčnaha ahienctva.
Kožnaje pavyšeńnie siaredniamiesiačnaj cany barela na 10 dalaraŭ prynosić rasijskim eksparcioram dadatkovyja 2,8 młrd dalaraŭ dachodu, ź jakich dziaržava atrymlivaje 1,63 młrd praz padatki.
Ciapier čytajuć
Łukašenka: Abmiarkoŭvajem z ZŠA vyzvaleńnie palitviaźniaŭ15
Kamientary