Biełarusy dajechali aŭtastopam da Aŭstralii i raskazali, kolki patracili
Dzima i Toma paznajomilisia ŭ Minsku ŭ dadatku dla znajomstvaŭ i ŭžo praz hod vypravilisia na druhi kaniec śvietu. Za 9 miesiacaŭ jany naviedali 16 krain, arendavali aŭtadom za 1 dalar, ustupili ŭ kanflikt z pamiežnikami i pažyli tydzień u tajskim manastyry, apisvaje Myfin.
«My płanavali supier-bomž-tryp, ale vyjšła bolš za $1000 u miesiac»
Pačatkova para nie płanavała tracić šmat. Jak pryznajecca Toma, jany raźličvali ŭkładvacca ŭ $300 na čałavieka.
U samim padarožžy chłopiec i dziaŭčyna amal nie pracavali. Toma tolki zredku pravodziła anłajn-siesii z klijentami jak psichołah, a Dzima davaŭ redkija kansultacyi pa svajoj IT-śfiery. Pracoŭnyja miescy, jak praviła, davodziłasia šukać na chadu. Dzima, darečy, u paŭsiadzionnym žyćci razmaŭlaje pa-biełarusku.
«My śpiecyjalna zdymali asobny pakoj, kab možna było papracavać. Samym składanym było niaviedańnie ŭłasnych płanaŭ daŭžej, čym na dzień ci dva. Siońnia my śpim u namiocie kala trassy, ale zaŭtra nam treba adšukać miesca z Wi-Fi, kab pravieści siesii».
U pajezdku para praktyčna nie brała najaŭnych hrošaj, raźličvajučy tolki na bankaŭskija kartki. Sapraŭdnym finansavym ratavańniem stała inviestycyjnaja dalnabačnaść Dzimy, jakaja dazvoliła im apłacić najraniejšuju i najdaražejšuju častku maršrutu.
«Nas vielmi vyratavała, što ja hrošy nie prosta trymaŭ u banku, a ŭkładvaŭ u akcyi na zołata. Jano vielmi mocna skoknuła ŭvierch, kali Tramp pačaŭ svaju palityčnuju «dźvižuchu». Hetyja hrošy nie byli zadumany pad padarožža, ale jany nam vielmi dapamahli. Mienavita na ich my vyrašyli trapić u Aŭstraliju».
«Nie zrabili pryščepki, ciapier škadujem»
Pierad vyjezdam maładyja ludzi zakupilisia bazavaj aptečkaj, ale, jak jany sami pryznajucca, zrabili vialikaje hłupstva — pajechali ŭ azijackija krainy bieź miedycynskaj strachoŭki i pryščepak.
«My lubim ryzykavać, — žartam adkazvaje Toma. — Adrazu pa prylocie ŭ Mumbai (Indyja) z Uźbiekistana Dzima źloh z tempieraturaj na try-čatyry dni. Nam pašancavała, što na hety pieryjad nas prytuliŭ indyjec pa kaŭčsiorfinhu. Akramia niepraciahłaj prastudy, nam pašancavała nie zachvareć bolš surjozna. Choć, viadoma, ja b nikomu nie rekamiendavała tak rabić».
Biaśpieka ŭ padarožžy i 10 dzion u tajskim manastyry
Žyćcio ŭ namiocie dla pary było ŭ navinku — da hetaha jany tolki raz vyrajazdžali na Paleśsie dziela teściravańnia ryštunku. Kłasičnyja kardonnyja tablički dla aŭtastopu chłopcy i dziaŭčyna vykarystoŭvali tolki ŭ Biełarusi i ŭ Kitai (tam nadpis «Jedziem u Syčuań» pa-kitajsku, vydatna pracavaŭ u miascovych kiroŭcaŭ).
«U darozie zdarałasia roznaje: ad načlehaŭ na pryvatnaj terytoryi pad Smalenskam u kampanii vielizarnaj aŭčarki, jakaja haŭkała, da napružanych pajezdak. Pad Čalabinskam my sieli ŭ mašynu da 21‑hadovaha chłopca. U jaho była ahresiŭnaja maniera kiravańnia i pahardlivaje staŭleńnie da našaj movy. Było vielmi niajomka i strašna, my navat prasili vysadzić nas, ale jon nastajaŭ jechać dalej. U takija momanty lepš nie piarečyć».
A kab paźbiehnuć lišnich prablem u musulmanskich krainach (asabliva ŭ Kyrhyzstanie), pary davodziłasia ŭsim kazać, što jany zakonnyja muž i žonka. Ale jość i pryjemny bok: pa nazirańniach maładych ludziej, u azijackich krainach vielmi dobrazyčlivyja ludzi. Toma pastajanna viała natatki ŭ Threads, i, kali jana napisała, što para pryjechała ŭ Kazachstan, kazachi prosta ŭ kamientarach pisali z zaprašeńniem pieranočyć u ich.
«Praź niekalki miesiacaŭ intensiŭnaha spynu my vyrašyli zapavolicca ŭ Tajłandzie. Źniali kvateru za ścipłyja $300 u miesiac i vyrašyli adpačyć adno ad adnoha».
Pakul Toma vyvučała krainu i ładziła sesii, Dzima pajechaŭ žyć da manachaŭ. «U sapraŭdnych tajskich manastyrach usio pracuje na danatach. Kancepcyja budyzmu ŭ tym, što ty ničym nie vałodaješ. Brać fiksavanyja hrošy — značyć pryviazvacca da materyjalnaha, a danaty niby nie haniebna brać. Mnie dali svoj pakojčyk, ja žyŭ tam 10 dzion biez suviazi sa źniešnim śvietam, zajmajučysia duchoŭnymi praktykami».
Treba skazać, što časam padarožniki pieralatali z krainy ŭ krainu praz zakryćcio suchaputnych hranic (Indyja/Pakistan, Mjanma/Tajłand) abo praź ich adsutnaść, jak u vypadku z Aŭstralijaj. Choć jany dva tydni žyli ŭ portavym horadzie Port Klang u Małajzii i sprabavali zastopić karabiel — na žal, nie vyjšła.
Indyjskaja palicyja i favaryty padarožža
Pryhod chapała i ź miascovymi ŭładami. Kali para chacieła pierajści hranicu Indyi, ich spynili nieviadomyja mužčyny ŭ cyvilnym adzieńni na matacykłach, pradstavilisia palicyjaj i zapatrabavali dakumienty.
«U mianie vyraznaja pazicyja: pašpart u ruki nikomu nie addam, asabliva paśla historyj pra rabstva ŭ Mjanmie, — rašuča zajaŭlaje Toma. — Ja trymała jaho ŭ svaich rukach, pakul jany fatahrafavali. Ale spačatku my zapatrabavali ad ich paśviedčańni. Takoje niepadparadkavańnie ich napružyła, ale spračacca nie stali. Dziŭna, što ŭ ich paśviedčańni zachoŭvajucca, jak fatahrafii ŭ telefonie, choć u adnaho ŭsio ž znajšłasia drukavanaja viersija. Potym nam patłumačyli, što pieššu pierajści nielha, advieźli nas na vakzał, dapamahli sieści ŭ ciahnik i navat čakali z nami paŭtary hadziny. My im na pamiać jašče biełaruskija manietki padaryli».
Kolki heta kaštuje: poŭny razbor biudžetu
Pieršyja miesiacy padarožža pa Rasii i Centralnaj Azii apłačvalisia sa źbieražeńniaŭ. U darozie biudžet zredku papaŭniaŭsia za košt redkich anłajn-kansultacyj. Hałoŭnym sponsaram bujnych trat, naprykład pieralotu ŭ Aŭstraliju, stali ŭdała pradadzienyja Dzimam akcyi na zołata.
-
Ahulnyja vydatki. Pačynali padarožža sa ścipłych $600 u miesiac na dvaich. Bližej da siaredziny pajezdki štomiesiačny biudžet vyras da $1200—1400. U asnoŭnym praz darahoŭlu žyćcia ŭ Kitai i Aŭstralii.
-
Žytło. U metach ekanomii rabiaty aktyŭna vykarystoŭvali namiot i spynialisia pa kaŭčsiorfinhu va ŭsich krainach znachodžańnia abo zdymali tannaje žytło. U Tajłandzie miesiac arendy paŭnavartasnaj kvatery abyšoŭsia ŭsiaho ŭ $300. Časam para ŭładkoŭvałasia pa prahramie Workaway (na vostravie Barnea/Kalimantan), kali za prostuju pracu rukami ich karmili i davali łožka-miesca.
-
Miedycyna. Strachoŭku ŭ pajezdku nie afarmlali. Płatnych pryščepak pierad startam nie rabili, vyrašyŭšy zekanomić i ryzyknuć. Bazavyja antybijotyki nabyvali prosta ŭ miascovych aptekach, choć tak lepš nie rabić.
Za 9 miesiacaŭ para abjechała 16 krain, razmaŭlajučy ŭ asnoŭnym pa-anhlijsku, a ŭ Kitai, Łaosie i Vjetnamie ratujučysia pierakładčykam. Z usich miescaŭ Dzima vyłučaje Aŭstraliju jak krainu, dzie jany byli maksimalna ščaślivyja, niahledziačy na niekatoryja ciažkija momanty. Ciapier maładyja ludzi adpačyvajuć i imknucca nazapasić na novuju pajezdku ŭ Afryku.
«Hałoŭnaje nie zabyvać padzaradžać nie tolki telefon, ale i siabie samoha». Jak ukrainski vajskoviec žyvie z dvuma elektrastymulatarami. I što ŭ jaho z seksam?11
«Hałoŭnaje nie zabyvać padzaradžać nie tolki telefon, ale i siabie samoha». Jak ukrainski vajskoviec žyvie z dvuma elektrastymulatarami. I što ŭ jaho z seksam?1
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje99
Kamientary