Majstra pa drevie i šmatdzietnaha baćku z Babrujska asudzili za reabilitacyju nacyzmu
Viačasłaŭ Michałap z Babrujska zajmajecca azdableńniem draŭlanych damoŭ i maje svoj nievialiki biznes. U žniŭni minułaha hoda jaho aryštavali. Paśla mužčynu pasadzili ŭ SIZA i asudzili za reabilitacyju nacyzmu.
Viačasłavu Michałapu 38 hadoŭ. U Babrujsku jon pracavaŭ jak indyvidualny pradprymalnik. Jaho kampanija, stvoranaja ŭ 2022 hodzie, śpiecyjalizavałasia na azdableńni draŭlanych damoŭ sa zruba i brusa: prafiesijnaj šlifoŭcy, farbavańni i hiermietyzacyi pa technałohii «ciopłaje švo». U jaho bryhadzie pracujuć try čałavieki.
U Viačasłava jość žonka i troje dziaciej.
U žniŭni 2025‑ha pra Michałapa pisaŭ kanał Śledčaha kamiteta. U siužecie jaho nazyvajuć skinchedam:
«Jašče z padletkavaha ŭzrostu mužčyna prajaŭlaŭ intares da historyi nieanacyzmu, byŭ uciahnuty ŭ subkulturu skinchedaŭ i raniej užo mieŭ sudzimaść za hrupavoje chulihanstva ŭ dačynieńni da nieznajomcaŭ». Śćviardžałasia, što jon «pryščaplaŭ svaje pohlady 7‑hadovamu synu».
Viačasłaŭ raniej byŭ udzielnikam ultrapravych telehram-čataŭ. Pra siabie jon niekali pisaŭ, što źjaŭlajecca pierakananym nacyjanał-sacyjalistam. U kamientarach jon pieryjadyčna vitaŭsia nacysckim pryvitańniem, zachaplaŭsia ultrapravaj muzykaj, nazyvaŭ Adolfa Hitlera «vialikim palitykam i lepšym ź ludziej».
Nieviadoma, nakolki jon usurjoz heta pisaŭ i ci źmianiŭ svaje pohlady da hetaha času, ale asudzili jaho za hetyja paviedamleńni. Telehram-akaŭnt Viačasłava całkam adkryty i znajści ich było nieskładana.
Viačasłava Michałapa sudzili ŭ Mahiloŭskim abłasnym sudzie pavodle častki 1 artykuła 130‑1 Kryminalnaha kodeksa Biełarusi — reabilitacyja nacyzma.
Jamu prysudzili chimiju z nakiravańniem i dadali ŭ «śpis ekstremistaŭ». Ciapier Viačasłaŭ adbyvaje pakarańnie.
«Viasna» nie ličyć jaho palitviaźniem, na sajcie Dysidenta jaho imia staić z paznakaj «patencyjny pieraśled».
«Naša Niva» — bastyjon biełaruščyny
PADTRYMAĆ
Kamientary
Łukašenka