Ałana Hiebremaryjam raskazała, čym budzie adroźnivacca novaje abjadnańnie palitźniavolenych žančyn
Pa śladach stvareńnia abjadnańnia palitźniavolenych žančyn «Pobač» zapytali ŭ adnoj z publičnych suarhanizatarak Ałany Hiebremaryjam, čamu ŭźnikła patreba ŭ jašče adnoj arhanizacyi dapamohi i ŭ čym jaje asablivaść.
Abjadnańnie «Pobač» vyrasła z užo isnaha niefarmalnaha kamjunici biełarusak, što prajšli kałoniju — žančyny pačali hurtavacca adna la adnoj u 2023 hodzie.
«Paśla vyzvaleńniaŭ my pačali śpisvacca i razvažać pra toje, što było b kłasna sustrakacca z tymi ludźmi, jakija ciabie razumiejuć, ź jakimi vy plačo da plača prachodzili roznyja, davoli składanyja situacyi. My padtrymlivali adna adnu jak mahli, pracavali pa mietadzie sarafannaha radyjo i sami šukali dla biełarusak paśla turmaŭ srodki na zakryćcio ich psichałahičnych, materyjalnych patreb, dapamahali z pošukam pracy. Naša niefarmalnaje kamjunici rasło, ale my nie mahli achapić usich žančyn: niechta byŭ u Biełarusi, niechta ŭ Litvie, niechta ŭ Polščy, niechta zastavaŭsia vielmi zakrytym i nie išoŭ na kantakt.
Naš krok u publičnaść zdaryŭsia ŭ tym liku dla taho, kab abjadnać bolšaść z tych, chto hatovy da hetaha. Dapamahčy tym, chto šukaje parazumieńnia, kamu brakuje sustreč z adnadumcami, kamu nie chapaje hrupy padtrymki mienavita žanočaj. Bo ŭsio ž žanočy dośvied prachodžańnia kałonij №4 u Homieli i №24 u Zareččy adroźnivajecca ad mužčynskaha — i praz prynižalnuju kamunikacyju z žančynami ad administracyi z mužčyn, praz seksualizavany hvałt.
Taksama žančyny prachodziać praces parušeńnia rolaŭ maci, dački, partniorki, prafiesijanałki — usio heta ŭpłyvaje na toje, jakim čynam varta budavać dla ich reabilitacyju.
My asensoŭvajem, što nam patrebnaja śpiecyfičnaja kamunikacyja i reabilitacyja. My adna adnu lepš razumiejem, i paśla taho, jak cami stanovimsia na nohi, hatovyja dapamahać inšym žančynam padniacca», — dadaje byłaja palitźniavolenaja Ałana Hiebremaryjam.
Taksama Ałana źviartaje ŭvahu na haryzantalnaść ich struktury.
«My imkniomsia padzialać adkaznaść pa roznych kirunkach u zaležnaści ad kampietencyj. U nas niama lidara ci lidaraŭ, jakija ŭsio vyrašajuć, my prymajem rašeńni razam. Heta daje pole dla roznaści dumak, viartaje žančynam subjektnaść — jany znoŭ mohuć prymać udzieł u vyrašeńni pytańniaŭ, jakija ich chvalujuć.
Plus nas adroźnivaje niehvałtoŭnaja kamunikacyja. Šmat žančyn kazali mnie, što nie chočuć dałučacca da inšych arhanizacyj praz taksičnaść niekatorych asob, jakija pry hetym časta nie razumiejuć, što jany kryŭdziać ludziej vakoł. A dla adekvatnaha adnaŭleńnia paśla kałonii, kab źmienšyć upłyŭ PTSR na žyćcio, patrabujecca atačeńnie, jakoje budzie padtrymlivać, padšturchoŭvać, davać prastoru dla realizacyi».
Ałana abiacaje poŭnuju prazrystaść ich pracy — prynamsi, dastupnaść spravazdačnaści, kali inicyjatyva budzie zarehistravanaja jak jurydyčnaja asoba.
«Ja časam šukaju infarmacyju pra kirunki pracy inšych asacyjacyj, ich spravazdačnaść — hadavuju ci lubuju inšuju i nie mahu znajści. My ŭ svaju čarhu budziem imknucca rabić našu dziejnaść prazrystaj, budziem dzialicca infarmacyjaj u adkrytym dostupie pa ŭsich kirunkach pracy — i psichałahičnaja dapamoha, i advakacyja, i inšaje».
Pry hetym Ałana vieryć u toje, što ŭ raznastajnaści zaŭsiody bolš siły.
«Niemahčyma stvaryć adnu arhanizacyju, jakaja budzie adkazvać za ŭsie kirunki, źviazanyja z palitviaźniami. U kožnaj zvyčajna svoj indyvidualny fokus, a ŭ ludziej unutry arhanizacyi — svaje kampietencyi. Raznastajnaść dazvalaje nie pierahružacca, daje mahčymaść prajavić siabie roznym ludziam. Hałoŭnaje, kab u hetym mnostvie isnavaŭ abmien infarmacyjaj, kab arhanizoŭvalisia supolnyja prajekty (u tym liku dla taho, kab dapamoha nie dublavałasia).
Padsumoŭvajučy, dla mianie bolšaja kolkaść arhanizacyj, jakija dapamahajuć palitviaźniam, heta dakładna plus i bolšy ŭniosak u budučyniu hetych ludziej».
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii17
Kamientary
Vielmi cikava, bo fieministki kažuć, što heta ŭsio patryjarchat i sučasnyja žančyny svabodnyja ad hetych tradycyjnych, kab nie skazać kansiervatyŭnych, normaŭ.