Kala 40 čałaviek zahinuli, bolš za 100 z traŭmami. Achviary strašnaha pažaru na raskošnym alpijskim kurorcie
U vyniku pažaru, jaki ŭspychnuŭ u navahodniuju noč u bary na harnałyžnym kurorcie Kran-Mantana na paŭdniovym zachadzie Šviejcaryi, zahinuli kala 40 čałaviek. Pra heta paviedamiŭ kiraŭnik miascovaj palicyi, piša Bi-bi-si.
Šef palicyi kantona Vale Frederyk Hiler skazaŭ na pres-kanfierencyi, što apioki i traŭmy atrymali 115 čałaviek.
Pavodle słoŭ Hilera, apaznańnie zahinułych, jak i niekatorych asob, što atrymali ciažkija apioki, zojmie peŭny čas. Viadoma, što siarod zahinułych jość i šviejcarcy, i zamiežnyja turysty. MZS Biełarusi ŭ svaju čarhu paviedamlała, što im pakul nie pastupała infarmacyi pra paciarpiełych biełarusaŭ.
Pažar uspychnuŭ u 1:30 nočy pa miascovym časie ŭ bary pad nazvaj Le Constellation. 60 paciarpiełych dastaŭleny ŭ balnicu stalicy kantona, Śjona. Astatnich, jak paviedamiŭ kiraŭnik miascovaj palicyi, transpartavali ŭ balnicy Ženievy, Łazany, Bierna i Ciurycha. Dapamohu ŭ lačeńni paciarpiełych prapanavali i susiednija krainy: Francyja, Hiermanija i Italija.
Pryčyna pažaru, jak skazała hienieralny prakuror Šviejcaryi Bieatrys Piłu, pakul kančatkova nie vyznačana: śledstva vyvučaje niekalki viersij.
Vidavočcy pažaru raniej raskazali žurnalistam, što ahoń uspychnuŭ z-za ŭstaŭlenaha ŭ butelku šampanskaha fiejervierka, jaki padnieśli zanadta blizka da stoli. Połymia, pavodle słoŭ śviedak, vielmi chutka raspaŭsiudziłasia pa ŭsioj stoli.
Kran-Mantana — heta fiešenebielny kurort u kantonie Vale. U śviatočnyja dni jon zvyčajna całkam zapoŭnieny: na prykładna 10 000 žycharoŭ tut kala 2600 hatelnych miescaŭ.
Ciapier čytajuć
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień10
Kamientary