Karol Vialikabrytanii Karł III u zapisanym videazvarocie padzialiŭsia dobrymi navinami pra svoj stan zdaroŭja. Manarch skazaŭ, što dziakujučy rańniaj dyjahnostycy i efiektyŭnamu lačeńniu ŭ novym hodzie abjom terapii jaho ankałahičnaha zachvorvańnia źmienšycca, piša Bi-bi-si.
«Siońnia ja mahu padzialicca z vami dobraj navinoj ab tym, što dziakujučy rańniaj dyjahnostycy, efiektyŭnamu ŭmiašańniu i vykanańniu pradpisańniaŭ daktaroŭ, moj ułasny hrafik lačeńnia raku ŭ novym hodzie možna budzie skaracić», — skazaŭ karol u svajoj pramovie.
Videazvarot, zapisany dva tydni tamu, byŭ pakazany ŭ piatnicu ŭviečary na kanale Channel 4 u ramkach dabračynnaha prajekta Stand Up To Cancer («Paŭstańcie suprać raku»), jaki pravodzicca sumiesna z dabračynnaj arhanizacyjaj Cancer Research UK, jakaja finansuje ankałahičnyja daśledavańni.
«Hety rubiež — adnačasova asabistaje dabrasłavieńnie i śviedčańnie vydatnaha prahresu, dasiahnutaha ŭ lačeńni raku», — skazaŭ Karł III.
Z zajavy karala vynikaje, što jon dobra reahuje na lačeńnie, i heta samaje značnaje abnaŭleńnie infarmacyi ab jaho stanie zdaroŭja z momantu, kali jon abjaviŭ pra dyjahnaz u lutym 2024 hoda.
Typ ankałahičnaha zachvorvańnia pa-raniejšamu nie raskryvajecca, a lačeńnie i miedycynskaje nazirańnie praciahnucca, tolki ŭ inšym režymie.
Svoj vystup karol prailustravaŭ prykładami statystyki vylečvańnia raku kišačnika pry rańniaj i poźniaj dyjahnostycy. Adnak, pa słovach krynic Bi-bi-si pry dvary, zhadvańnie hetaha typu raku nie adnosiłasia da samoha manarcha.
Taksama ź minułych zajaŭ viadoma, što ŭ karala niama puchliny prastaty.
Bukinhiemski pałac taksama zajaviŭ, što praces adnaŭleńnia karala znachodzicca na takoj dobraj stadyi, što lekary pieravieduć schiemu jaho lačeńnia «ŭ prafiłaktyčnuju fazu».
Častata pravierak i pracedur budzie značna skaročana, adnak, padkreślivajuć miedyki, 77‑hadovy karol nie znachodzicca ŭ stanie remisii ci «vylečvańnia».
«Biascenny čas» rańniaj dyjahnostyki
Stand Up To Cancer zaklikaje jak maha bolš ludziej prachodzić abśledavańnie na rak i karystacca nacyjanalnymi prahramami skryninhu, a ŭ pasłańni karala padkreślivajecca važnaść pravierak dla vyjaŭleńnia raka na rańniaj stadyi.
Pavodle źviestak Cancer Research UK, prykładna dzieviać miljonaŭ brytancaŭ nie prachodziać abśledavańnia pa prahramach nacyjanalnaj achovy zdaroŭja svoječasova.
«Pa ŭłasnym dośviedzie ja viedaju, što dyjahnaz «rak» moža być ašałamlalnym. Ale ja taksama viedaju, što rańniaja dyjahnostyka — heta kluč da ŭsiaho nastupnaha pracesu lačeńnia, jana daje miedykam biascenny čas», — skazaŭ karol.
Karł III taksama raskazaŭ, nakolki hłyboka jaho kranuŭ kłopat, jakim akružany kožny pacyjent z ankałohijaj, — śpiecyjalisty, miedsiostry, navukoŭcy i vałanciory, jakija niastomna pracujuć, kab ratavać žyćci.
Premjer-ministr ser Kir Starmier zajaviŭ, što zvarot karala staŭ «mahutnym pasłańniem».
«Ja viedaju, što vykazvaju mierkavańnie ŭsioj krainy, kali kažu, jak ja rady tamu, što ŭ novym hodzie intensiŭnaść jaho lačeńnia ad rakv budzie źnižana», — dadaŭ jon.
Dahetul karol mała kazaŭ pra svaju chvarobu publična. Jon praciahvaŭ pracavać u nasyčanym hrafiku, uklučajučy zamiežnyja pajezdki i dziaržaŭnyja pryjomy — u tym liku pryjom u honar vizitu prezidenta Hiermanii na minułym tydni.
Kamientary