Кароль Вялікабрытаніі Карл III у запісаным відэазвароце падзяліўся добрымі навінамі пра свой стан здароўя. Манарх сказаў, што дзякуючы ранняй дыягностыцы і эфектыўнаму лячэнню ў новым годзе аб'ём тэрапіі яго анкалагічнага захворвання зменшыцца, пiша Бі-бі-сі.
«Сёння я магу падзяліцца з вамі добрай навіной аб тым, што дзякуючы ранняй дыягностыцы, эфектыўнаму ўмяшанню і выкананню прадпісанняў дактароў, мой уласны графік лячэння раку ў новым годзе можна будзе скараціць», — сказаў кароль у сваёй прамове.
Відэазварот, запісаны два тыдні таму, быў паказаны ў пятніцу ўвечары на канале Channel 4 у рамках дабрачыннага праекта Stand Up To Cancer («Паўстаньце супраць раку»), які праводзіцца сумесна з дабрачыннай арганізацыяй Cancer Research UK, якая фінансуе анкалагічныя даследаванні.
«Гэты рубеж — адначасова асабістае дабраславенне і сведчанне выдатнага прагрэсу, дасягнутага ў лячэнні раку», — сказаў Карл III.
З заявы караля вынікае, што ён добра рэагуе на лячэнне, і гэта самае значнае абнаўленне інфармацыі аб яго стане здароўя з моманту, калі ён аб'явіў пра дыягназ у лютым 2024 года.
Тып анкалагічнага захворвання па-ранейшаму не раскрываецца, а лячэнне і медыцынскае назіранне працягнуцца, толькі ў іншым рэжыме.
Свой выступ кароль праілюстраваў прыкладамі статыстыкі вылечвання раку кішачніка пры ранняй і позняй дыягностыцы. Аднак, па словах крыніц Бі-бі-сі пры двары, згадванне гэтага тыпу раку не адносілася да самога манарха.
Таксама з мінулых заяў вядома, што ў караля няма пухліны прастаты.
Букінгемскі палац таксама заявіў, што працэс аднаўлення караля знаходзіцца на такой добрай стадыі, што лекары пераведуць схему яго лячэння «ў прафілактычную фазу».
Частата праверак і працэдур будзе значна скарочана, аднак, падкрэсліваюць медыкі, 77‑гадовы кароль не знаходзіцца ў стане рэмісіі ці «вылечвання».
«Бясцэнны час» ранняй дыягностыкі
Stand Up To Cancer заклікае як мага больш людзей праходзіць абследаванне на рак і карыстацца нацыянальнымі праграмамі скрынінгу, а ў пасланні караля падкрэсліваецца важнасць праверак для выяўлення рака на ранняй стадыі.
Паводле звестак Cancer Research UK, прыкладна дзевяць мільёнаў брытанцаў не праходзяць абследавання па праграмах нацыянальнай аховы здароўя своечасова.
«Па ўласным досведзе я ведаю, што дыягназ «рак» можа быць ашаламляльным. Але я таксама ведаю, што ранняя дыягностыка — гэта ключ да ўсяго наступнага працэсу лячэння, яна дае медыкам бясцэнны час», — сказаў кароль.
Карл III таксама расказаў, наколькі глыбока яго крануў клопат, якім акружаны кожны пацыент з анкалогіяй, — спецыялісты, медсёстры, навукоўцы і валанцёры, якія нястомна працуюць, каб ратаваць жыцці.
Прэм'ер-міністр сэр Кір Стармер заявіў, што зварот караля стаў «магутным пасланнем».
«Я ведаю, што выказваю меркаванне ўсёй краіны, калі кажу, як я рады таму, што ў новым годзе інтэнсіўнасць яго лячэння ад ракв будзе зніжана», — дадаў ён.
Дагэтуль кароль мала казаў пра сваю хваробу публічна. Ён працягваў працаваць у насычаным графіку, уключаючы замежныя паездкі і дзяржаўныя прыёмы — у тым ліку прыём у гонар візіту прэзідэнта Германіі на мінулым тыдні.
Цяпер чытаюць
Лукашэнка знайшоў незвычайныя словы для спачування Хаменеі: «вераломная атака»28
Каментары