«Navina stała šokavaj i niečakanaj». Minski Vizor praciahvaje masava skaračać supracoŭnikaŭ
U kastryčniku 2025 hoda źjaviłasia infarmacyja pra zvalnieńni ŭ minskim ofisie Vizor Games, jaki z krasavika 2024 hoda pracuje pad nazvaj «Hiejmtek». Da taho momantu, pa raskazach supracoŭnikaŭ, pad skaračeńnie mahli trapić kala 20 supracoŭnikaŭ art-adździeła. Pradstaŭnik Vizor Games u kamientary vydańniu Devby.io tady paćvierdziŭ, što ŭ kampanii «zvolnili niekalki mastakoŭ u kampanii z 700 čałaviek». Ale paźniej byłyja supracoŭniki Vizor raskazali Devby.io, što skaračajuć i śpiecyjalistaŭ ź inšych adździełaŭ.
Marharyta (imia źmieniena) pracavała na kampaniju niekalki hadoŭ i trapiła pad skaračeńnie vosieńniu. Jana paprasiła nie raskryvać nazvy svajho adździeła i dakładnych terminaŭ zvalnieńnia:
«Na žal, ja pajšła z Vizor nie pa ŭłasnaj voli. Heta adbyłosia vielmi chutka i niečakana. U apošni čas, paśla pierajezdu ź Biełarusi, ja praciahvała pracu z kampanijaj u farmacie B2B jak IP. Tamu, choć vychadnaja dapamoha i była, adnak zusim nie takaja, jakaja praduhledžanaja dla supracoŭnikaŭ, aformlenych pavodle pracoŭnych damoŭ u Biełarusi.
Pra samo zvalnieńnie mnie paviedamili vielmi niečakana i vielmi chutka. Pry hetym za ŭvieś čas supracoŭnictva da majoj pracy nikoli nie było ni pytańniaŭ, ni zaŭvah. Litaralna napiaredadni abviaščeńnia hetaj naviny my z maim niepasrednym kiraŭnikom abmiarkoŭvali biahučyja i bolš doŭhaterminovyja zadačy. Na paŭhadavym revju mnie taksama pastavili vielmi hłabalnyja mety.
Ci stała pryčynaj skaračeńnia mienavita ŭkaranieńnie ŠI — skazać ciažka. Ale nie vyklučaju hetaha. U apošni čas aktyŭnaje vykarystańnie ŠI ŭ našym adździele padtrymlivałasia i navat zaachvočvałasia.
Pa sutnaści mianie prosta pastavili pierad faktam. Usio adbyłosia nastolki chutka i skamiečana, što ja navat nie viedaju jak heta prakamientavać. I dla mianie, i dla maich kaleh hetaja navina stała šokavaj i niečakanaj».
Dyzajnierku Maryju (imia źmieniena) taksama zvolnili z Vizor vosieńniu, paśla niekalkich hadoŭ pracy na kampaniju ŭ minskim ofisie:
«U mianie byŭ kantrakt z kampanijaj, jaki zakančvaŭsia ŭ nastupnym hodzie. Na hety momant skaračeńniaŭ šmat, i zvalniajuć nie tolki mastakoŭ i dyzajnieraŭ. Viedaju pra ludziej, jakich zvolnili z saporta i ź inšych adździełaŭ.
Tłumačačy pryčyny zvalnieńniaŭ, kiraŭnictva raskazvaje, što nibyta adbyvajecca aptymizacyja pracesaŭ. Ale ŭ takim vypadku nie zusim zrazumieła, navošta zvalniać ludziej z profilnaj adukacyjaj i adnačasova naciahvać na pracu ź niejronkaj mieniedžaraŭ.
Mnie pra zvalnieńnie paviedamili dzień u dzień. Ranicaj skazali, što mianie zvalniajuć, i ŭžo da abiedu ja pavinna była zdać techniku i pieradać pracu. Tydniem raniej ja daviedałasia pra zvalnieńnie svajoj mieniedžarki, i my z kaleham u tryvozie čakali navin.
Nakolki ja viedaju, usie, chto sutyknuŭsia sa zvalnieńniem dzień u dzień, byli ŭ šoku, jak i ja. Kiraŭniki malavali spačuvańnie, a voś u buchhałteryi staŭleńnie da nas adrazu ž pamianiałasia na niehatyŭnaje. I ŭsio roŭna, što ludzi adpracavali ŭžo pa try-čatyry hady, što ŭ ich byli dobryja adnosiny z kalehami i što jany dobra prachodzili ŭsio revju. Kampiensacyju vypłačvajuć u pamiery dvuch zarobkaŭ».
Situacyja, zdajecca, nie zusim typovaja dla Vizor. Devby.io pahutaryła ź niekalkimi byłymi supracoŭnikami kampanii, jakija pakidali jaje pa roznych pryčynach u minułyja hady.
Tak, Naścia (imia źmieniena) zvalniałasia z adździeła markietynhu ŭ 2024 hodzie:
«Ja sychodziła raniej, i praces zvalnieńnia byŭ vielmi cyvilizavanym. Naadvarot, u našaj kamandzie imknulisia zachavać čałavieka ci dapamahčy jamu znajści inšaje miesca ŭnutry kampanii. Mahčyma, ciapierašniaja situacyja źviazanaja nie z padychodam ŭsioj kampanii ŭ cełym, a z padychodami asobnych kamandaŭ».
U kampanii ad kamientaroŭ admovilisia.
Kamientary