U Polščy biespracoŭny ŭdaryŭ biełaruskaha doktara za toje, što toj adbiraje pracu ŭ palakaŭ
Sud Biełastoka pryhavaryŭ žychara Suvałak da hoda turmy za napad na biełaruskaha doktara. Na nacyjanalnaj hlebie jon udaryŭ biełarusa ŭ tvar — tak, što ŭ mužčyny aciakło pravaje voka, vynikaje z rašeńnia suda, piša «Most».
Incydent zdaryŭsia ŭviečary 29 studzienia hetaha hoda. Tady mužčyny sustrelisia vypadkova, vyhulvajučy sabak. Spačatku hadavaniec palaka napaŭ na sabaku biełarusa. A paśla hetaha palak, pačuŭšy akcent, udaryŭ biełarusa ŭ tvar i ŭ nieprystojnaj formie zapatrabavaŭ ad taho źjechać z Polščy — pavodle jaho słoŭ, zamiežniki zabirajuć pracoŭnyja miescy ŭ palakaŭ.
Paciarpieły biełarus pracuje ŭ Polščy doktaram. Napadnik — biespracoŭny žychar Suvałak, jaki złoŭžyvaje ałkaholem i nieadnarazova pryciahvaŭsia da adkaznaści.
Apielacyjny sud Biełastoka pryhavaryŭ napadnika da hoda pazbaŭleńnia voli. Akramia taho, jon musić vypłacić paciarpiełamu kampiensacyju škody ŭ pamiery 1 tys. złotych (800 rubloŭ), a taksama nie pavinien kantaktavać ź im i nabližacca da jaho bližej čym na 30 mietraŭ na praciahu troch hadoŭ.
Sudździa Januš Sulima zajaviŭ, što złačynstvy na nacyjanalnaj i relihijnaj hlebie niebiaśpiečnyja dla hramadstva, a vyniesieny prysud pavinien paŭpłyvać jak na abvinavačanaha, tak i na hramadstva ŭ cełym.
— Pavinien pajści sihnał, što takija dziei škodnyja dla hramadstva, drenna śviedčać ab našym hramadstvie. Nieabchodna taksama zrazumieć toje, jak moh adčuvać siabie sam paciarpieły, jaki pryjechaŭ u Polšču, źjaŭlajecca lekaram, lečyć u špitali, — skazaŭ sudździa.
Kamientary