Dobra adukavanyja, pracujuć, vałodajuć polskaj — Nacyjanalny bank Polščy pradstaviŭ daśledavańnie pra žyćcio mihrantaŭ ź Biełarusi ŭ 2025 hodzie.
U asnovie dakłada «Žyćcio i ekanamičnaja situacyja mihrantaŭ ź Biełarusi ŭ Polščy» — źviestki apytańnia, praviedzienaha Nacbankam Polščy z 7 krasavika pa 20 červienia 2025 hoda. Było atrymana 750 ankiet ad biełarusaŭ, starejšych za 18 hadoŭ. Daśledavańnie achoplivaje siem vajavodstvaŭ Polščy, u jakich pražyvaje kala 85% biełaruskaj supolnaści. Da jakich vysnoŭ prychodziać aŭtary, piša DW.
Bolš za pałovu respandentaŭ biehli ad represij u Biełarusi
Biełarusy — druhaja pa kolkaści hrupa mihrantaŭ u Polščy paśla hramadzian Ukrainy. Pavodle źviestak Upraŭleńnia pa spravach zamiežnikaŭ (UdSC) Polščy, na 30 vieraśnia 2025 hoda dazvoł na znachodžańnie ŭ krainie mieli amal 146 tysiač hramadzian Biełarusi. Dla paraŭnańnia ŭ 2020‑m — usiaho 16 tysiač.
Jak vyśvietliŭ Nacbank, 62% biełaruskich mihrantaŭ majuć dazvoł na časovaje znachodžańnie ŭ krainie. Amal tracina, u asnoŭnym, ludzi z polskimi karaniami, atrymali pastajanny vid na žycharstva. 7% znachodziacca ŭ Polščy na padstavie statusu dadatkovaj abarony.
Bolšaść biełarusaŭ (kala 56%) emihravali z-za palityčnaj situacyi ŭ RB i strachu represij. Ekanamičnyja pryčyny nazvali 32% apytanych.
Siarod biełaruskich mihrantaŭ mužčyn bolš, čym žančyn — 58% i 42% adpaviedna.
Amal pałova respandentaŭ pražyvaje ŭ Polščy z mužam ci žonkaj, čverć — ź dziećmi, małodšymi za 18 hadoŭ.
Stanovišča mihrantaŭ ź Biełarusi na polskim rynku pracy palepšyłasia?
Aŭtary daśledavańnia śćviardžajuć, što ŭ 2025 hodzie stanovišča mihrantaŭ ź Biełarusi na polskim rynku pracy palepšyłasia: uzrovień biespracoŭja źniziŭsia (87% respandentaŭ pracaŭładkavanyja, bolšaść majuć pastajannuju pracu), pavialičyłasia dola samazaniatych (14%).
Kala 62% respandentaŭ majuć vyšejšuju adukacyju.
Žančyn z vyšejšaj adukacyjaj bolš, čym mužčyn — 67% i 59% adpaviedna, tym nie mienš, jany čaściej za mužčyn vykonvajuć prostyja pracy (30% žančyn suprać 20% mužčyn).
Dziakujučy dobramu ci svabodnamu vałodańniu polskaj movaj (pra što paviedamili bolš za 63% apytanych) rabotnikaŭ ź Biełarusi možna sustreć u śfiery adukacyi, kultury, finansaŭ, markietynhu, u achovie zdaroŭja. 17% apytanych pracujuć u IT.
Bolš za pałovu respandentaŭ atrymlivajuć 3—6 tysiač złotych (709—1418 jeŭra) u miesiac. 14% — bolš za 10 tysiač złotych (kala 2365 jeŭra). Jak praviła, heta IT-śpiecyjalisty i daktary.
Amal 67% apytanych płanujuć zastacca ŭ Polščy
Jašče adzin błok daśledavańnia Nacbanka Polščy pryśviečany tamu, jak mihranty z RB bačać svaju budučyniu.
Amal 67% respandentaŭ płanujuć zastacca ŭ Polščy nazaŭsiody ci bolš čym na hod. Čaściej pra takija płany kažuć tyja, chto pryjechaŭ pa palityčnych pryčynach i praz strach pierad represijami.
Uzrost respandentaŭ taksama ŭpłyvaje na ich płany adnosna dalejšaha znachodžańnia ŭ krainie. Najčaściej pra heta kažuć ludzi 45—59 hadoŭ i 18—26 hadoŭ (tyja, chto pryjechaŭ z metaj atrymać adukacyju). Siarod ludziej, starejšych za 60 hadoŭ, — najbolšy pracent achvotnych zastacca ŭ Polščy na stałaje miesca žycharstva ci daŭžej za adzin hod.
Najbolš zapatrabavanyja formy dapamohi ŭ mihrantaŭ ź Biełarusi: spraščeńnie lehalizacyi znachodžańnia, biaspłatny dostup da sistemy achovy zdaroŭja, arhanizacyja kursaŭ polskaj movy i palahčeńnie pracedury nastryfikacyi dypłomaŭ.
Ekanamist: «Mihracyja ź Biełarusi maje stanoŭčy efiekt dla Polščy»
Vyniki daśledavańnia DW paprasiła prakamientavać ekanamista, staršaha navukovaha supracoŭnika daśledčaha centra BEROC Anastasiju Łuzhinu. Pavodle jaje słoŭ, u Polščy, jak i ŭ Biełarusi, nazirajucca demahrafičnyja prablemy, nizkaja naradžalnaść, jość niedachop rabočaj siły. Adno z rašeńniaŭ — padtrymka rynku pracy za košt mihrantaŭ.
«Zvyčajna ludzi, jakija vyrašajucca na pierajezd, aktyŭnyja, bolš hnutkija, mohuć, kali jość nieabchodnaść, pieravučycca, pierakvalifikavacca», — źviartaje ŭvahu ekśpiert.
Taksama Łuzhina adznačaje, što z RB, u bolšaści svajoj, pryjechali ludzi pracazdolnaha ŭzrostu (tych, kamu 60 hadoŭ i bolš, pavodle źviestak daśledavańnia, usiaho 2%). Jany płaciać padatki, padtrymlivajuć piensijnuju sistemu, pry hetym sami jašče doŭha nie buduć mieć patrebu ŭ piensijnych vypłatach.
«Mihracyja ź Biełarusi ŭ čystym vyniku maje vielmi stanoŭčy efiekt dla Polščy», — ličyć Anastasija Łuzhina.
«Jakasnaja dyjaspara»
«Novaja dyjaspara, jak by cynična heta ni hučała, jakasnaja, z vysokim uzroŭniem čałaviečaha patencyjału, z vysokim adukacyjnym i prafiesijnym uzroŭniem», — adznačaje, u svaju čarhu, sacyjołah Hienadź Koršunaŭ.
Jon vyłučaje dźvie chvali emihracyi ź Biełarusi. Kali emihracyja 2020—2021 hoda była vyklučna «palityčnaj», to ŭ 2022 hodzie dadaŭsia ekanamičny składnik. «Źjechali ludzi, jakim naŭprost nie pahražała niebiaśpieka, ale tyja, chto stratehična pahladzieŭ na pierśpiektyvy svajho znachodžańnia ŭ Biełarusi», — kaža Koršunaŭ.
Pavodle jaho słoŭ, pačatak poŭnamaštabnaj vajny va Ukrainie źmianiŭ jak staŭleńnie da biełarusaŭ, tak i ich samaadčuvańnie. Surazmoŭca taksama adznačaje, što ŭ apošnija hady ŭ Polščy, jak i ŭ inšych jeŭrapiejskich krainach, nazapasiłasia peŭnaja stomlenaść, nie stolki ad biełarusaŭ, kolki ad mihrantaŭ u cełym.
«Ad režymu maksimalnaj prychilnaści Polšča viartajecca da bolš žorstkaj sistemy kantrolu i ŭzajemadziejańnia ź mihranckaj supolnaściu», — ličyć sacyjołah.
Ciapier čytajuć
Syn ministra Kubrakova staŭ načalnikam Centralnaha RUUS Minska. Major, ale budzie kiravać pałkoŭnikami4
Syn ministra Kubrakova staŭ načalnikam Centralnaha RUUS Minska. Major, ale budzie kiravać pałkoŭnikami
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek33
Kamientary
Kali bolšaść z-za represii źjechała, čamu takija hihanckija čerhi na ŭjezd u RB u śviatočnyja dni?
Pahladzicie krynicu ŭ nizie skrynšotaŭ. Heta Deutsche Welle, jakaja maje damien na ruskaj movie. Čamu NN pracuje z DW, a nie ź pieršakrynicaj - voś heta dobraje pytańnie. A čarhovaje nyćcie ad niepiśmiennych moŭnych kanapnych vajaroŭ užo nie ździŭlaje.