Japoncy dahetul nie zajmajucca seksam. I nichto nie viedaje čamu
Prykładna kožny dziasiaty žychar Japonii dasiahaje 30‑hadovaha ŭzrostu, tak ni razu i nie ŭstupiŭšy ŭ intymnyja adnosiny. Navukoŭcy pakul nie mohuć dakładna patłumačyć pryčyny hetaj źjavy.
Niadaŭni maštabny ahlad daśledavańniaŭ, na jaki źviartaje ŭvahu BBC Science Focus, pakazaŭ, što maładyja ludzi ŭ Japonii ŭsio radziej ustupajuć u intymnyja adnosiny, i hetaja tendencyja nabiraje abaroty.
Zhodna z ahladam, prykładna pałova japoncaŭ dasiahaje 25-hodździa, nie majučy nijakaha seksualnaha vopytu, a kožny dziasiaty zachoŭvaje cnatlivaść da 30 hadoŭ.
Adnak navat tyja, chto ŭžo straciŭ cnotu, nie adroźnivajucca vysokaj seksualnaj aktyŭnaściu. Anłajn-apytańni 2020‑ch hadoŭ pakazvajuć, što kala pałovy darosłych japoncaŭ va ŭzroście ad 20 da 49 hadoŭ źjaŭlajucca «seksualna nieaktyŭnymi», što aznačaje adsutnaść seksu na praciahu apošniaha hoda.
Nacyjanalnaje «zacišša»
Hety pieryjad seksualnaha spakoju pahoršaŭ za apošnija dziesiacihodździ. Kali ŭ 2002 hodzie tolki tracina japoncaŭ va ŭzroście 20—24 hadoŭ paviedamlała pra adsutnaść seksualnaha vopytu, to da 2020‑ch hadoŭ hety pakazčyk moh vyraści da 60% siarod mužčyn i 51% siarod žančyn toj ža ŭzrostavaj hrupy.
Da takich vysnoŭ pryjšli aŭtary, kali praanalizavali 38 publikacyj, zasnavanych na 43 apytańniach ab sieksualnych tendencyjach u krainie ŭ pieryjad z 1974 pa 2024 hod.
Cikava, što na fonie źnižeńnia seksualnaj aktyŭnaści ŭ šlubie i adnosinach papularnaść parnahrafii i seks-pasłuh zastajecca vysokaj, asabliva siarod mužčynskaj častki nasielnictva. Naprykład, u niekatorych apytańniach, praviedzienych z 2008 pa 2024 hod, da 60% japonskich mužčyn pryznalisia, što raniej płacili za seks.
Čamu tak adbyvajecca?
Aŭtary daśledavańnia adznačajuć, što seksualnyja pavodziny ŭ Japonii ŭjaŭlajuć saboj «zahadkavuju i supiarečlivuju sumieś usiodazvolenaści i čakańnia strymanaści». Chacia dakładnaj pryčyny fienomienu niama, daśledčyki vyłučyli niekalki klučavych faktaraŭ.
Adsutnaść žadańnia. Adnoj ź vierahodnych pryčyn źjaŭlajecca toje, što ludzi prosta hetaha nie chočuć. Anłajn-apytańnie 2020 hoda pakazała, što 20—30% mužčyn va ŭzroście ad 20 da 39 hadoŭ zajavili ab niežadańni zajmacca seksam, jak i kala 40% žančyn u abiedźviuch uzrostavych hrupach.
Prahmatyzm. Aŭtary vykazali zdahadku, što, mahčyma, niezamužnija darosłyja ludzi va ŭzroście 20 i 30 hadoŭ nie žadajuć marnavać čas i hrošy na spatkańni ź ludźmi, ź jakimi jany nie płanujuć brać šlub.
Hiendarnyja roli. Dla žančyn ideja šlubu moža zdavacca nie takoj užo i pryvabnaj u kultury, dzie ad ich čakajecca, što jany voźmuć na siabie bolšuju častku adkaznaści za chatnija spravy.
Alternatyvy. Aŭtary vykazvajuć dumku, što japonskija darosłyja mienš saromiejucca cnatlivaści i ŭstrymańnia, čym ich ravieśniki ŭ takich krainach, jak ZŠA ci Vialikabrytanija. Pry hetym dla ich źjaŭlajucca bolš prymalnymi inšyja sposaby vychadu seksualnaha žadańnia.
Naprykład, fiktaseksualnaść — vykazvańnie ramantyčnych abo seksualnych pačućciaŭ da vydumanych piersanažaŭ. Apytańnie 2017 hoda siarod japonskich studentaŭ va ŭzroście 16—22 hadoŭ vyjaviła, što 14—17% ź ich pryznalisia ŭ ramantyčnych pačućciach da piersanažaŭ videahulniaŭ abo anime.
Pracaholiki. U toj ža čas, jak pišuć aŭtary, žorstkaja kultura pracy z doŭhimi hadzinami i pajezdkami ŭ ofis uskładniaje pabudovu adnosin. Kala 30% mužčyn i 15% žančyn pracujuć bolš za 50 hadzin u tydzień.
Taksama aŭtary źviartajuć uvahu na toje, što ŭ Japonii abmiežavana seksualnaja adukacyja, i vielmi mała žančyn vykarystoŭvajuć harmanalnuju kantracepcyju.
Hłabalny zruch?
Aŭtary daśledavańnia adznačajuć, što ŭ krainach z vysokim uzroŭniem dachodu pa ŭsim śviecie maładyja ludzi, zdajecca, zajmajucca seksam usio mienš. Naprykład, daśledavańnie 2019 hoda pakazała, što amal tracina respandentaŭ u Vialikabrytanii zajaviła, što nie mieła seksu ŭ papiarednim miesiacy, u paraŭnańni z prykładna čverciu apytanych u 2001 hodzie.
Doktar Vanesa Apiea, kansultant pa seksualnym zdaroŭi, u intervju vydańniu prakamientavała vyniki daśledavańnia (sama jana nie prymała ŭdzieł u im). Pa jaje słovach, jano demanstruje źmienu pryjarytetaŭ maładych japoncaŭ.
Danyja pakazvajuć na šyrokija sacyjalnyja i ekanamičnyja ŭpłyvy. Jana miarkuje, što situacyja ŭ Japonii moža być rańnim sihnałam hłabalnaha zruchu, dzie technałohii i sučasnyja čakańni pieraasensoŭvajuć toje, jak ludzi kantaktujuć, budujuć adnosiny i adčuvajuć blizkaść.
Ciapier čytajuć
«Nie chaču čuć «śpierdalaj da Ukrainy» tolki tamu, što razmaŭlaju z baćkami pa telefonie na ruskaj». Biełarusy dzielacca, čamu viartajucca z Polščy73
Kamientary