Mužčyna, abvinavačany ŭ sprobie vykradańnia dziaciej u Baraŭlanach, akazaŭsia bieź viny vinavatym
Dniami žycharka Baraŭlanaŭ apublikavała ŭ Threads videa, u jakim zajaviła, što niby stała śviedkaj «sproby vykradańnia dziaciej». Jana raskazała, što ŭviečary zaŭvažyła mužčynu, jaki pryjechaŭ na mašynie da dziciačaj placoŭki i nakiravaŭsia da dźviuch jaje dačok. Žančyna padumała, što jon choča zabrać dziaciej, kryknuła jamu i papiaredziła, što budzie zdymać videa i vykładzie jaho ŭ internet. Jana śćviardžała, što napisała zajavu ŭ milicyju. Ciapier heta historyja atrymała praciah.
U milicyi paviedamili, što znajšli mužčynu, jaki byŭ na videa, i praviali pravierku. Akazałasia, što nijakaj sproby vykradańnia nasamreč nie było.
Mužčyna, žychar tych ža Baraŭlanaŭ, pryjechaŭ, kab zabrać svaju dačku, jakaja hulała ŭ dvary ź siabroŭkaj. Było ŭžo ciomna, kala 17:30. Jon patelefanavaŭ dačce, taja adkazała, što hulaje kala doma. Pryjšoŭšy tudy, mužčyna ŭbačyŭ na arelach dziaciej i vyrašyŭ, što heta jaho dačka, bo zdalok dzieci byli padobnyja. Jon huknuŭ da dziaciej, ale adkazu nie pačuŭ. Padyšoŭ krychu bližej i zrazumieŭ, što pamyliŭsia. Tamu raźviarnuŭsia i pajšoŭ nazad.
U hety momant žančyna, jakaja siadzieła ŭ mašynie kala placoŭki, pačała vykazvać jamu pretenzii, što jon chodzić da dziaciej. Mužčyna padyšoŭ patłumačyć, što šukaje svaju dačku, i sprabavaŭ razmaŭlać spakojna. Žančyna pryhraziła, što zapiša jaho i vykładzie ŭ internet. Mužčyna na toje skazaŭ, što nie suprać, bo jamu niama čaho chavać.
Praź niekatory čas jahonaja dačka vyjšła z padjezda (jana była ŭ kvatery siabroŭki), i jany razam pajechali dadomu.
Vykłaŭšy hetu viersiju padziej, Ministerstva ŭnutranych spraŭ abvinavaciła žančynu ŭ tym, što jana stvaryła «chajpavy kantent» i raspaŭsiudziła infarmacyju, jakaja nie adpaviadaje rečaisnaści.
Na dumku MUS, takija videa vyklikajuć u hramadstvie nieabhruntavanuju paniku. Čałaviek ža, maŭlaŭ, jaki sapraŭdy turbujecca pra biaśpieku dziaciej, u pieršuju čarhu źviarnuŭsia b u apieratyŭnyja słužby, a nie raźmiaščaŭ videa ŭ sacsietkach dla pryciahnieńnia ŭvahi.
Z samoj błohierkaj taksama zapisała pakajannaje videa, u jakim jana patłumačyła situacyju, što adbyłasia, i paprasiła prabačeńnia za ŭkid. Pavodle słoŭ žančyny, z mužčynam prosta nie zdoleli vyrašyć pytańnie na miescy, bo jon nibyta tołkam joj situacyju nie patłumačyŭ.
Ciapier čytajuć
Mužčyna, abvinavačany ŭ sprobie vykradańnia dziaciej u Baraŭlanach, akazaŭsia bieź viny vinavatym2
Kamientary