Ci chočuć biełarusy sajuza z Rasijaj? Vyniki novaha apytańnia
Chatham House pakazaŭ vyniki novaha daśledavańnia pohladaŭ biełarusaŭ na vajnu, unutranuju i zamiežnuju palityku.
Apytańnie, pra jakoje idzie havorka, prachodziła sioleta ŭ žniŭni i listapadzie. U im uziali ŭdzieł 713 biełarusaŭ, vybarka abmiežavanaja karystalnikami internetu. Na vyniki apytańnia moža ŭpłyvać faktar strachu, bo častka respandentaŭ aścierahajecca vykazvać krytyčnyja mierkavańni adnosna ŭłady. Ale, jak zapeŭnivajuć aŭtary, statystyčnaja chibnaść nie pieravyšaje 3,7%.
Apytańnie padzialiła respandentaŭ na čatyry hrupy: praŭładnyja (da takich adnieśli 26%), niejtralnyja (37%), ekanamična niezadavolenyja (24%) i prademakratyčnyja (13%).
Zamiežnaja palityka i vajna
Padtrymka Rasii ŭ vajnie zastajecca adnosna nizkaj, pra jaje zajaŭlajuć tolki 27% biełaruskich haradskich žycharoŭ. Pry hetym bolšaść biełarusaŭ chacieła b nieadkładnaha spynieńnia vajennych dziejańniaŭ i pačatku pieramoŭ. I hetaja ličba raście na praciahu dvuch hadoŭ.
Pry hetym za apošni hod biełarusy stali mienš vieryć u pieramohu Ukrainy — takich tolki 8% (hod tamu było 12%). Pra toje, što pieramoža Rasija, vykazaŭsia kožny druhi apytany. Ale i vialiki pracent tych, kamu było ciažka adkazać, — 42%.
U zamiežnaj palitycy biełarusy čaściej za ŭsio padtrymlivajuć sajuz z Rasijaj. Za heta vykazalisia 44% apytanych. I heta najbolšy pakazčyk za piać hadoŭ apytańniaŭ.
U toj ža čas na praciahu apošnich dvuch hadoŭ amal nie mianiajecca dola tych, chto vystupaje za ŭvachodžańnie krainy ŭ ES (15%), i tych, chto ličyć, što joj lepš zastavacca niejtralnaj (19%). Za adnačasovy sajuz z Rasijaj i ES vykazalisia 22% apytanych.
Acenka situacyi ŭnutry krainy
Biełarusy roznych palityčnych pohladaŭ pazityŭna staviacca da vyzvaleńnia palitźniavolenych (tolki 15% vykazvajuć nieadabreńnie). Tady jak da płanaŭ pryciahnuć pracoŭnych mihrantaŭ — pieravažna niehatyŭna.
Biełarusy schilnyja piesimistyčna aceńvać nastupstvy rasijska-ŭkrainskaj vajny, a taksama emihracyju nasielnictva. Niašmat aptymizmu vyklikaje i situacyja sa svabodaj słova i ŭzroŭniem dachodaŭ.
U toj ža čas u šerahu śfier nastroi prykmietna bolš pazityŭnyja: biełarusy prychilna hladziać na stan navakolnaha asiarodździa, raźvićcio adukacyi i miedycyny.
Vajskovaja intehracyja z Rasijaj i staŭleńnie da NATA
Vyniki apytańnia prademanstravali słabuju daśviedčanaść biełarusaŭ ab detalach vajskovaha supracoŭnictva z Rasijaj. Tak, tolki kala traciny apytanych zajavili, što viedajuć pra płany raźmiaščeńnia kompleksu «Arešnik» i taktyčnaj jadziernaj zbroi (adpaviedna 32% i 33%).
Najbolšuju daśviedčanaść prademanstravała hrupa praŭładnych (51%). A voś siarod niejtralna nastrojenych takich było najmienš — 22%.
Pry hetym prademakratyčnyja čaściej za inšych vykazvali mierkavańnie, što jadziernaja zbroja na terytoryi Biełarusi nie była raźmieščana.
Padtrymka rašeńnia ab raźmiaščeńni jadziernaj zbroi za dva hady prykmietna vyrasła — z 33% u listapadzie 2023 hoda da 45% u listapadzie hetaha hoda, choć bolšaść — 56% — usio jašče vystupajuć suprać. Rost pakazčyka padtrymki aŭtary daśledavańnia tłumačać upłyvam dziaržaŭnaj prapahandy.
Što tyčycca roznych vajennych błokaŭ, to za ŭstupleńnie ŭ NATA paśla źmieny palityčnaha kiraŭnictva ŭ krainie vykazalisia tolki 8% biełarusaŭ. Amal na tym ža ŭzroŭni (37%), što i dva hady tamu, zastałasia kolkaść biełarusaŭ, jakija ličać, što Biełarusi nieabchodna budzie imknucca da niejtralitetu, i tych, chto ličyć, što jana pavinna budzie zastavacca ŭ ADKB (55%).
«Kali mnie prylacić, ja hatovaja». Nasta Rahatko — pra seks-scenu ŭ svajoj knizie, prarasijskich svajakoŭ, Hajun i Matolku32
Kamientary
Jakoje apytańnie ŭ Biełarusi, Astapienia? Idzi narešcie na pracu prystojnuju ŭładkujsia!