Małajzija adnaŭlaje pošuki MH370 praz 10 hadoŭ paśla źniknieńnia avijałajniera

Heta praciah pošukaŭ, jakija pačalisia ŭ sakaviku hetaha hoda, ale chutka byli prypynienyja praz drennyja ŭmovy nadvorja. Jak płanujecca, pošukavaja apieracyja budzie doŭžycca 55 dzion. Dzie mienavita buduć pravodzicca pošuki, nie paviedamlajecca. 

«Apošnija padziei padkreślivajuć pamknieńni [Małajzii] zabiaśpiečyć padtrymku siemjam, paciarpiełym ad hetaj trahiedyi», — zajavili ŭ sieradu ŭ Ministerstvie transpartu, paviedamlajuć miascovyja ŚMI. 

Samalot Boeing 777, jaki vykonvaŭ rejs MH370, źnik 8 sakavika 2014 hoda. Paśla zahadkavaha źniknieńnia łajniera pačalisia adnyja z samych maštabnych i darahich pošukaŭ u historyi avijacyi. 

Pošuki viadzie kampanija Ocean Infinity. Umovy kantraktu praduhledžvajuć, što kampanija nie atrymaje nijakaha hrašovaha ŭznaharodžańnia ŭ vypadku, kali abłomki łajniera nie buduć znojdzienyja.

U vypadku vyjaŭleńnia abłomkaŭ Ocean Infinity atrymaje 70 młn dalaraŭ, ab hetym raniej zajaviŭ ministr transpartu Małajzii.

U pošukach, jakija pačalisia paśla źniknieńnia łajniera, brali ŭdzieł mnohija krainy: było zadziejničana kala 60 sudoŭ i 50 samalotaŭ z 26 dziaržaŭ. Tysiačy akijana-daśledčykaŭ, inžynieraŭ-avijakanstruktaraŭ i amataraŭ-pašukavikoŭ vyvučali frahmientarnyja danyja pra palot, sprabujučy vyznačyć, dzie jon pierapyniŭsia.

U lipieni 2015 hoda byli znojdzienyja niekalki mocna paškodžanych abłomkaŭ na bierazie vostrava Rejuńjon u Indyjskim akijanie na ŭschod ad Madahaskara. Pošuki byli zavieršanyja tolki ŭ studzieni 2017 hoda. 

Paŭtornyja pošuki, raspačatyja ŭ studzieni 2018 hoda Ocean Infinity, taksama zaviaršylisia biezvynikova praz šeść miesiacaŭ. 

Samalot, jaki vykonvaŭ rejs MH370, źnik praz hadzinu paśla ŭźlotu 8 sakavika 2014 hoda. Boeing 777-200, na borcie jakoha byli 227 pasažyraŭ i 12 členaŭ ekipažu, pavinien byŭ pierasiekčy pavietranuju prastoru Vjetnama i ź niejkaj pryčyny rezka źmianiŭ kurs, paśla čaho suviaź z dyśpietčarami była pierarvanaja. 

Danyja radaraŭ śviedčać, što łajnier adchiliŭsia ad pieršapačatkovaha maršrutu. Paśla pošukaŭ 2018 hoda ŚMI sa spasyłkaj na ekśpiertaŭ pisali, što adchileńnie ad maršrutu, mahčyma, było naŭmysnym. 

Nie vyklučajecca, što ekipaž ź niejkaj pryčyny naŭmysna nakiravaŭ samalot da miažy zon adkaznaści avijadyśpietčaraŭ Tajłanda i Małajzii, dzie łajnier moh zastacca niezaŭvažanym radarami adnoj abo inšaj krainy. 

Źniknieńnie samalota Malaysia Airlines zastajecca adnoj z samych zahadkavych avijacyjnych katastrof. Usie hetyja hady hučać zakliki da praciahnieńnia pošukaŭ.

Źniknieńnie łajniera taksama sparadziła mnostva teoryj zmovy, u tym liku zdahadki, što piłot moh naŭmysna spravakavać katastrofu abo što łajnier byŭ zachopleny. 

U 495‑staronkavym dakładzie ab źniknieńni, vydadzienym u 2018 hodzie, havorycca, što kiravańnie Boeing 777, mahčyma, było naŭmysna źmienienaja z metaj adchileńnia ad kursu. Śledčyja tady zajavili, što adkaz moža być kančatkovym tolki paśla taho, jak buduć znojdzienyja abłomki.

• 0
• 0
• 0
• 0
• 0
• 0
• 0
• 0