U Minsku adbyŭsia sud, anałahičny vypadku z kvateraj Dolinaj. Jak jon skončyŭsia?

U sakaviku 2025 hoda sud u Rasii viarnuŭ kvateru Łarysie Dolinaj, pryznaŭšy, što ŭ toj momant jana nie mahła kantralavać situacyju. Joj dazvolili nie viartać hrošy — pakupnicy Palinie Łurje prapanavali patrabavać kampiensacyju strat z machlaroŭ, na rachunki jakich śpiavačka i adpraviła hrošy. Niekalki ź ich atrymali ad čatyroch da siami hadoŭ kałonii.

Paśla hetaha vypadku pradaŭcy kvater stali čaściej zajaŭlać, što pradali žyllo «pad uździejańniem machlaroŭ», i praz sud patrabavali viarnuć im nieruchomaść. Na kaniec listapada 2025 hoda, pavodle danych rasijskaj Fiederalnaj pałaty advakataŭ, u sudach susiedniaj krainy razhladałasia nie mienš za 150 takich spraŭ.

«Lusterka» znajšło anałahičnuju historyju ź Minska ŭ biełaruskim banku sudovych rašeńniaŭ. Dakumient ananimizavany — u im nie paznačanyja realnyja imiony ŭdzielnikaŭ raźbiralnictva. 

3 krasavika 2023 hoda Volha zaklučyła ź Iharam (imiony vydumanyja) damovu kupli-prodažu kvatery ŭ Minsku. Mužčyna zapłaciŭ za jaje 52 tysiačy dalaraŭ pavodle kursu Nacbanka na toj momant.

Pa dakumientach Volha vypisałasia z žyłpłoščy i zarehistravałasia ŭ vioscy. Ale faktyčna praciahvała žyć u pradadzienaj kvatery i nie vyzvaliła jaje ŭ ustanoŭleny termin. U vyniku novy ŭłaśnik źviarnuŭsia ŭ sud z patrabavańniem vysielić byłuju haspadyniu.

Padčas pasiadžeńnia Volha śćviardžała, što stała achviaraj machlaroŭ. Pa jaje słovach, jana pradavała žyllo «pad uździejańniem padmanu z boku paznačanych asob», a nasamreč naohuł nie źbirałasia hetaha rabić. Žančyna padała sustrečny pazoŭ z patrabavańniem pryznać dahavor nikčemnym i prymianić nastupstvy niesapraŭdnaści ździełki — to-bok viarnuć joj prava ŭłasnaści.

10 lipienia 2023 hoda sud Leninskaha rajona Minska razhledzieŭ abodva pazovy. Sudździa staŭ na bok Ihara — novaha ŭłaśnika. Dovady Volhi pra toje, što jaje padmanuli, nie pryniali, a sustrečny pazoŭ adchilili poŭnaściu.

U vyniku sud pastanaviŭ vysielić žančynu z kvatery biez pradstaŭleńnia inšaha žyłoha pamiaškańnia. Akramia taho, ź jaje spahnali sudovyja vydatki na karyść Ihara: 1000 rubloŭ za apłatu jurydyčnaj dapamohi i jašče 111 rubloŭ dziaržaŭnaj pošliny.

Taksama surazmoŭca-advakat u razmovie z «Lusterkam» adznačyŭ: u biełaruskaj praktycy byvajuć vypadki pryznańnia ździełak kupli-prodažu nieruchomaści niesapraŭdnymi. Kab hetaha paźbiehnuć, isnujuć rekamiendacyi jurystaŭ i sposaby pravieryć kontrahienta. Naprykład, možna zakazać psichołaha-psichijatryčnuju ekśpiertyzu dla pradaŭca, kab pazbavicca ryzyki nastupnych raźbiralnictvaŭ nakont taho, ci ŭśviedamlaŭ jon svaje dziejańni.

— Adnak mnie nie viadomy nivodny vypadak, kali b ździełku admianiali tolki na toj padstavie, što pradaviec dziejničaŭ pad uździejańniem telefonnych machlaroŭ — «pad bieśpierapynnym psichałahičnym uździejańniem», jak ukazvaje rasijskaja śpiavačka ŭ apisanaj spravie, — kaža jon.

Kali sud usio ž pryznaje ździełku niesapraŭdnaj abo nikčemnaj, to dalej užyvajecca miechanizm restytucyi — viartańnie da pieršapačatkovaha stanu.

— Pa sutnaści heta aznačaje, što kožny z bakoŭ pavinien viarnuć usio atrymanaje: pakupnik viartaje pradaŭcu nieruchomaść, a toj — zapłačanyja za jaje hrošy, — tłumačyć advakat i dadaje, što na hetym etapie byvajuć składanaści. — Kali viarnuć kvateru časta nie składaje vialikaj ciažkaści, to hrošy mohuć źniknuć biasśledna, jak i ŭ apisanaj situacyi. U vypadku ž, kali ŭ pradaŭca pa niejkich pryčynach nie zastałosia srodkaŭ, davodzicca raźličvać tolki na prymusovaje vykanańnie, jakoje raściahvajecca na doŭhija hady, i časta poŭny raźlik tak i nie adbyvajecca nikoli.

• 8
• 0
• 0
• 3
• 1
• 0
• 1
• 0