Paŭlučenka pra Cichanoŭskaha: Takim ludziam nie miesca ŭ biełaruskaj palitycy

Hučnyja zajavy Siarhieja Biaspałava, jaki da niadaŭniaha času byŭ pres-sakratarom Siarhieja Cichanoŭskaha, stali adnoj z tem novaha vypusku jutub-prajekta «Saša, čto ty niesioš?..»

Pavodle słoŭ hałoŭnaha redaktara Reform.news Fiodara Paŭlučenki, pałovu taho, što raskazaŭ Siarhiej Biaspałaŭ, jon viedaŭ da hetaha.

«Kali Siarhiej Cichanoŭski dumaje, što nichto heta nie abmiarkoŭvaje i nie raskazvaje… To ŭsie abmiarkoŭvajuć i raskazvajuć. (…) Kali niechta dumaje, što Siarhiej Biaspałaŭ namaniŭ, pierabolšyŭ ci jašče niešta… Nie, nie treba tak dumać. Tak usio i jość», — śćviardžaje hałoŭny redaktar Reform.news.

«My mahli b ciapier palitkaretna vykazacca, što heta taki asablivy styl, što ŭ palitycy ŭsialakaje mahčyma. Ja liču, što ŭ palitycy takoje nieprymalna», — praciahnuŭ Paŭlučenka.

Na jaho dumku, kali «čałaviek, jaki sprabuje być palitykam (…) pavodzić siabie tak», to «z hetym treba zmahacca».

«Nie pieršy Siarhiej Cichanoŭski čałaviek z takimi zamaškami ŭ našym žyćci. Ja dumaju, što i nie apošni. I dumaju, što takim ludziam nie miesca ŭ biełaruskaj palitycy», —

vykazaŭ svaju pazicyju Paŭlučenka i dadaŭ:

«Na žal, jany hetaha sami nie zrazumiejuć. Bolš za toje, ja dumaju, što ŭ ich znojducca navat niejkija paśladoŭniki, prychilniki. Heta narmalna taksama. Ale heta nie admianiaje nieabchodnaści ŭtrymlivać takich ludziej ad taho, kab jany pradstaŭlali intaresy ŭsich biełarusaŭ.

Jašče raz paŭtaru — Siarhiej Cichanoŭski moža jak zaŭhodna siabie pavodzić. Hałoŭnaje, kab heta nie parušała Kryminalny kodeks toj krainy, u jakoj jon žyvie. Ale jon nie maje prava vykazvacca ad imia ŭsich biełarusaŭ. Navat niahledziačy na ​​toje, što jon pieražyŭ».

Pavialičyć

Praciahvajučy dumku, Paŭlučenka padkreśliŭ, što nie žadaje, kab ad jaho imia pramaŭlali ludzi, jakich nie abirali i ŭ jakich niama na toje adpaviednaha mandata, «jak jość chacia b u Śviatłany Cichanoŭskaj. Chacia b na ŭzroŭni Kaardynacyjnaj Rady, chacia b na ŭzroŭni kiraŭnika partyi».

«Tamu niachaj kožny raz, kali Siarhiej Cichanoŭski choča čarhovuju krynžacinu ŭtvaryć, niachaj pra heta dumaje, pamiataje i ŭličvaje», — zaznačyŭ Paŭlučenka.

Pry hetym redaktar vykazaŭ sumnieŭ, što błohier i były palitviazień budzie heta ŭličvać: «Nie dumaju, što jon navat nas pačuje. Ja nie dumaju, što jaho treba abaraniać u hetym sensie».

• 67
• 2
• 7
• 5
• 2
• 3
• 2
• 0