Pierad sustrečaj z Uitkafam i Kušnieram Pucin zajaviŭ, što hatovy da vajny ź Jeŭropaj
Paśla vystupleńnia na forumie «Rasija kliča», adkul prezident Rasii Uładzimir Pucin nakiravaŭsia na sustreču z pasłancami prezidenta ZŠA Donalda Trampa Styvam Uitkafam i Džaredam Kušnieram, jon zrabiŭ žorstkija zajavy adnosna chodu vajny i pazicyi jeŭrapiejskich krain u pieramovach pa Ukrainie.
Pa słovach Pucina, Jeŭropa «žyvie iluzijami» adnosna mahčymaści stratehičnaj parazy Rasii. Na jaho dumku, jeŭrapiejcy sami siabie vyklučyli ź pieramoŭnaha pracesu i ciapier pieraškadžajuć administracyi Donalda Trampa damaŭlacca. Jak ličyć Pucin, krainy ES zajmajuć bok vajny, a ich prapanovy tolki błakujuć mahčymy mir.
Jeŭrapiejskija inicyjatyvy Pucin nazvaŭ nieprymalnymi. Ź jaho słoŭ, jany śpiecyjalna vystaŭlajuć patrabavańni, jakija Rasija nie moža pryniać, kab paśla abvinavacić Maskvu ŭ zryvie pieramoŭ.
Rasija ž nibyta hatovaja da pieramovaŭ, ale «na bazie realnaści». Kali Jeŭropa zachoča viarnucca da dyjałohu, uličvajučy situacyju «na ziamli», to Maskva «nie suprać».
Pry hetym Rasija, maŭlaŭ, nie choča vajny ź Jeŭropaj, ale hatovaja da jaje ŭ luby momant. Kali ž jeŭrapiejskija krainy pačnuć vajenny kanflikt, to Maskvie vielmi chutka «nie zastaniecca z kim damaŭlacca».
«Kali Jeŭropa raptam zachoča z nami vajavać — i pačnie — my hatovyja prosta ciapier. Tut nie moža być nijakich sumnievaŭ. Tolki pytańnie ŭ čym: kali Jeŭropa raptam pačnie z nami vajnu, to, mnie zdajecca, što vielmi chutka… Heta ž nie Ukraina, z Ukrainaj my dziejničajem chirurhičnym sposabam, akuratnieńka — heta nie vajna ŭ pramym sučasnym sensie hetaha słova. Kali Jeŭropa raptam zachoča pačać z nami vajnu — i pačnie jaje — to vielmi chutka moža adbycca situacyja, pry jakoj nam nie budzie z kim damaŭlacca», — zajaviŭ Pucin.
Udary pa rasijskich tankierach u Čornym mory Pucin acaniŭ jak «piractva». Kali takija ataki praciahnucca, to Rasija, maŭlaŭ, moža «adrezać Ukrainu ad mora».
Ciapier čytajuć
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ1515
Kamientary
Heta prosta chadziačaja chimiery zahadkavaj ruskaj dušy