Padasłać papieru ci zavisnuć nad unitazam? Jak lepš skarystacca hramadskim tualetam

Z hetym sutykaŭsia kožny: zachodziš u kabinku hramadskaj prybiralni, a tam ślady papiarednich naviedvańniaŭ i sumnieŭny pach. I ŭžo chočacca raźviarnucca i źbiehčy. Ale kali arhanizm patrabuje, vybaru niama. 

Prafiesar mikrabijałohii i hihijeny Markus Ehiert u intervju Tagesspiegel raspavioŭ, jakija mietady nasamreč ratujuć nas ad mikrobaŭ.

Samy raspaŭsiudžany strach: «siadu — i padchaplu kišečnuju infiekcyju». Biezumoŭna, ryzyka napatkać niebiaśpiečnyja bakteryi ŭsio ž isnuje. Naprykład, kali niezadoŭha da vas tualetam karystaŭsia čałaviek z naravirusam i dyjarejaj. Heta vielmi kavarny ŭzbudžalnik: kab padchapić infiekcyju, dastatkova navat mizernaj kolkaści virusa.

Ale jość važnaja detal, jakaja dapamoža vam rassłabicca. Jak adznačaje ekśpiert, ryzyka padchapić kišečnuju infiekcyju prosta praz dotyk skury da siadzieńnia minimalnaja.

«Toje, što traplaje vam na ściohny abo jahadzicy, nie zrobić vas chvorym. Kab zachvareć, mikroby pavinny trapić vam u rot», — adznačaje prafiesar Ehiert. Pa jaho słovach, hałoŭnaja niebiaśpieka — heta nie sam unitaz, a našy ŭłasnyja ruki, jakimi my čapajem brudnyja pavierchni, a potym ciahniem ich da tvaru.

Čamu nie varta vyściłać siadzieńnie papieraj

Padčas karystańnia tualetam vy možacie minimizavać kolkaść mikrobaŭ, jakija traplajuć na vašy ruki. «Hałoŭnaje — dakranacca jak maha mienš», — kaža Markus Ehiert.

Tamu starannaje vyściłańnie siadzieńnia tualetnaj papieraj mikrabijołah ličyć drennaj idejaj.

«Čym bolš lišnich ruchaŭ vy robicie ŭ kabincy, tym vyšejšaja imaviernaść, što vy dakraniaciesia da brudnych pavierchniaŭ, čaho mahli b paźbiehnuć», — davodzić jon. Pakul vy raskładvajecie papieru, papraŭlajecie jaje, kali jana spaŭzaje, vy aktyŭna źbirajecie bakteryi na svaje palcy.

Kali ideja sieści na hramadski ŭnitaz dla vas nieprymalnaja, lepš vykarystoŭvać taktyku paŭprysiadu (kali jahadzicy navisajuć nad siadzieńniem). Ale tut patrebny mocnyja nohi i, što važna, dakładny raźlik. Bo kali ŭsio palacić mima, nastupnamu naviedvalniku budzie vielmi niepryjemna.

Załatyja praviły hihijeny

Zamiest taho kab mudravać z papieraj, ekśpiert rekamienduje vykonvać nastupnyja try prostyja praviły:

1. Zakryvajcie viečka pierad zmyvańniem! Heta vielmi važna. Kali vy naciskajecie knopku zmyvu z adkrytym viečkam, u pavietra ŭzdymajecca vobłaka drabniutkich kropiel z bakteryjami i virusami, jakija vy potym udychajecie.

2. Nie zatrymlivajciesia. Čym mienš času vy pravodzicie ŭ kabincy, tym mienš aerazolaŭ (tych samych kropiel) vy ŭdychniacie.

3. Myjcie ruki! Heta samaja banalnaja, ale samaja dziejsnaja parada. Myć treba z myłam, nie śpiašajučysia, nie mienš za 20—30 siekund, dobra zmyvać i vycirać nasucha (pažadana papiarovym ručnikom).

Tak što mienš pieražyvajcie pra kantakt skury z unitazam i bolš uvahi nadavajcie čyścini ruk.

• 2
• 0
• 0
• 0
• 0
• 0
• 0
• 0