«Niama dokazaŭ» i «adpracoŭka błakady Kalininhrada». Što pišuć aficyjnyja ŚMI pra zondy i zakryćcio miažy
Na zakryćcio Litvoj punktaŭ propusku na miažy ź Biełaruśsiu adhuknulisia łukašenkaŭskija ŚMI i «ekśpierty». Raźbirajem asnoŭnyja naratyvy biełaruskaj prapahandy.
«Meta — izalavać Kalininhradskuju vobłaść»
Z takoj hučnaj zajavaj vystupiŭ telehram-kanał «Nievalfovič», jaki źviazvajuć z Radaj biaśpieki Biełarusi.
«Nijakich dokazaŭ, što drony ci kantrabandnyja mieteazondy prylacieli ź Biełarusi, nie padadziena», — śćviardžajuć aŭtary i vyłučajuć viersii ab tym, što «ŭ płanach NATA aneksija Kalinihradskaj vobłaści.
Choć nijakich takich płanaŭ u pryrodzie nie isnuje, mienavita hetaje tłumačeńnie dyscyplinavana pieradrukavali roznyja minskija i rehijanalnyja ŚMI i kanały.
Adpaviedna im scenar «vyhnańnia Rasii z Uschodniaj Prusii» abmiarkoŭvali kamandujučy armijaj Litvy Valdemaras Rupšys i načalnik Hienieralnaha štaba Polščy Rajmund Andžejčak užo ŭvosień 2022 hoda.
«Pad prykryćciom vučeńniaŭ Aljans pastajanna adpracoŭvaje ŭ hetym rajonie scenary zachopu rasijskich terytoryj», — praciahvajuć aŭtary i tłumačać: «Adzinaje čyhunačnaje złučeńnie napramuju z Kalininhrada ŭ Rasiju prachodzić praz terytoryju Litvy i Biełarusi. Cisk na Rasiju budzie iści praz sproby poŭnaj izalacyi rasijskaha rehijona».
Spasyłajučysia na nienazvanyja «spravazdačy Zachadu», aŭtary śćviardžajuć, što «eskałacyja ŭ rajonie Suvałkskaha kalidora z pašyreńniem zony kanfliktu na Arktyčny rehijon płanavałasia ŭžo ŭ 2025 hodzie. Ale prybałtyjcy z palakami i astatnimi ŭpirajucca. Voś i davodzicca Łondanu, Brusielu i Vašynhtonu kiravać imi ŭ ručnym režymie, abiacajučy za heta ŭsiebakovuju padtrymku».
Hetaje chłuślivaje paviedamleńnie całkam pieradrukavali ŭ svaich telehram-kanałach, u pryvatnaści, aficyjnaja abłasnaja «Hrodzienskaja praŭda» i Ryhor Azaronak.
Nasamreč, Litva zachavała tranzit u Kalininhrad, rašeńnie ab zakryćci miažy nie raspaŭsiudžvajecca na tranzitnych pasažyraŭ i hruzy.
«Adpracoŭka błakady Kalininhrada»
U padobnym klučy tłumačyć kanflikt i praŭładny palitołah-kamunist Andrej Łazutkin u svaim artykule na staronkach aficyjnaj abłasnoj «Minskaj praŭdy».
Aŭtar śćviardžaje, što dziejańni Litvy, jak i raniejšaje 13‑dzionnaje zakryćcio miažy Polščaj, — heta «adpracoŭka suchaputnaj błakady Kalininhrada», uzhodnienaja z Brusielem — choć dokazaŭ hetamu nie isnuje. Palitołah davodzić, što aficyjnyja tłumačeńni, takija jak baraćba z kantrabandnymi dronami, źjaŭlajucca tolki prykryćciom dla realizacyi vajenna-palityčnych płanaŭ.
«Pa formie takija dziejańni źjaŭlajucca padparohavymi — praličanaj pravakacyjaj, jakaja nie pavinna stać padstavaj dla abjaŭleńnia vajny. Heta značyć, Rasii nie abviaščajuć vajnu adkryta, ale pad nadumanaj padstavaj błakujuć dostup da jaje subjekta».
Na dumku Łazutkina, kab paźbiehnuć pramoha adkazu Rasii, NATA budzie vykarystoŭvać šerah farmalna nie źviazanych pamiž saboj iłžyvych padstaŭ dla błakady. Jon śćviardžaje, što, stvarajučy vobraz pahrozy z boku Biełarusi i Rasii, krainy ŭschodniaha fłanha NATA imknucca atrymać dadatkovaje finansavańnie ad Jeŭrasajuza na abaronnyja prajekty.
Łazutkin «prahnazuje», što paśla suchaputnaj błakady moža rušyć uśled i marskaja, što pryviadzie da pramoha vajennaha supraćstajańnia na Bałtycy:
«Viadoma, zastaniecca zabieśpiačeńnie Kalininhradskaj vobłaści pa Bałtycy, ale i tam na padstavie baraćby z «šerymi tankierami» nataŭcy mohuć razharnuć marskuju hrupoŭku. <…> Adpaviedna, Rasija budzie vymušana vystavić na Bałtycy vajennyja kanvoi».
«Litvie patrebny nie vynik, a praces — chočuć zarabić na baraćbie z prydumanymi pahrozami. Ale dabjucca tolki taho, što ŭ krainie źniknuć cyharety — i z hetaj nahody ŭ ruskich jość vyraz «pierad śmierciu nie nakuryšsia», — ažyŭlaje svoj tekst palitołah.
«Litoŭski teatr absurdu»
«Hrodzienskaja praŭda» na svaim sajcie apulikavała i repartaž, padrychtavany žurnalistami «Ašmianskaha vieśnika» (na sajcie rajonki jaho pakul niama).
«Uzrost i stan ludziej, jakija stali zakładnikami biazvychadnaj situacyi, sumiežny bok nie chvaluje. Užo navat čerhi dla hramadzian stali normaj. Strašniejšaje — heta nieviadomaść: ci adkryjuć miažu i kali», — pišuć aŭtary i dajuć słova jak dalnabojščykam («my — ludzi pryzvyčajenyja», «liču, što tut litoŭcy vinavatyja»), tak i prostym ludziam, jakija pierasiakajuć miažu ź dziećmi («U čym my vinavatyja? Jakoje dačynieńnie da hetaha my majem?», «Miarkuju, rašeńnie idzie źvierchu. Kryŭdna tolki, što pakutavać davodzicca nam, zvyčajnym ludziam»).
«Kolki budzie praciahvacca hety śpiektakl litoŭskaha teatra absurdu? (…) Što budzie dalej, nichto nie viedaje», — pišuć prapahandysty.
«Žorstkaść na miažy»
Źviazany z MZS Biełarusi Telegram-kanał «Hłas MIDa» ŭ dopisie pad nazvaj «Žorstkaść na miažy» apisvaje situacyju, jakaja skłałasia z-za dziejańniaŭ Litvy, jak «sapraŭdnuju łabaratoryju pa vyprabavańni miežaŭ čałaviečaha ciarpieńnia».
Pavodle kanała, zvyčajnyja ludzi — šmatdzietnaja maci z Hiermanii, kiroŭcy-dalnabojščyki i padarožniki — stali «paddoślednymi», «zakładnikami absurdnaj situacyi» i «abjektami ŭ žorstkim ekśpierymiencie pad nazvaj «pahraničny sadyzm».
Aŭtary z pres-słužby MZS abvinavačvać litoŭskija ŭłady, što tyja «abviaščajuć pavietranyja šary «ekzistencyjnaj pahrozaj»», i pry hetym «spakojna nazirajuć, jak u dziaciej u pryhraničnaj zonie pačynajecca isteryka», ličačy prymalnym «pakidać ludziej biez vady, ježy i miedycynskaj dapamohi».
Kanał MZS vykarystoŭvaje situacyju dla raspalvańnia varožaści da susiednich krain. Hučyć i abvinavačvańnie ŭ nacyźmie — toje samaje, jakoje vykarystoŭvałasia dla apraŭdańnia napadu na Ukrainu. Na dumku aŭtaraŭ, heta nie prosta niekampietentnaść, a «prajava toj samaj mientalnaści, jakaja kaliści dazvalała ličyć adnych ludziej «vyšejšymi» za inšych». U hetym jany bačać «zarodak teoryi rasavaj pieravahi», jakaja dazvalaje biespakarana pryčyniać pakuty inšym.
U zaviaršeńnie dopisu padkreślivajecca, što Biełaruś praciahvaje pracavać u narmalnym režymie i adkryta da supracoŭnictva. Adnak, jak reziumuje kanał, zdajecca, što susiedziaŭ «bolš pryvablivaje rola vučonych-sadystaŭ, jakija dzień pry dni staviać novyja dośledy nad žyvymi ludźmi».
«Treba raźbiracca»
«Tam užo viecier u inšy bok dźmie, jany nas abvinavačvajuć, što da ich niejki zond zalacieŭ. (…) Kali pačynaješ udumvacca, akazvajecca, što tam umoŭ nadvorja navat nie było, kab tudy niešta prylacieła», — zajaviŭ prapahandyst Vadzim Baravik ŭ ranišnim efiry Alfa Radio i «SB. Biełaruś siehodnia», kamientujučy zakryćcio miažy.
Na dumku Baravika, zamiest taho kab publična abvinavačvać biełaruskija ŭłady, treba było «pa linii śpiecsłužbaŭ, pa linii pahrankamitetaŭ inicyjavać dyjałoh i inicyjavać mahčymaść vyrašeńnia tych ci inšych momantaŭ».
«Kankretna treba raźbiracca. (…) Raźbiaryciesia. (…) Vy bačycie, što tam zalacieła, adkul i jakoje dačynieńnie maje da hetaha biełaruskaja ŭłada? (…) U vas što, niama kantrabandy? U vas niama niejkich złačynstvaŭ z boku asob i vašych hramadzian?»
Baravik padkreśliŭ, što ličyć zakryćcio miežaŭ kontrpraduktyŭnym krokam, jaki ŭ pieršuju čarhu škodzić hramadzianam samich hetych krain, a taksama parušaje tranzit, u tym liku ŭ Kalininhrad.
«Vy što, chočacie jašče bolšaha abvastreńnia z Rasijaj? Vam heta patrebna?» — zadaje rytaryčnaje pytańnie palitołah i zaklikaŭ kiravacca ŭ pryhraničnaj palitycy «zdarovym sensam i vialikaj adkaznaściu», asabliva va ŭmovach napružanaj abstanoŭki ŭ rehijonie («kali pobač z nami ŭsio idzie pa-žyvomu, na vastryi»).
U jakaści prykładu kanstruktyŭnaha padychodu jon pryvodzić dziejańni biełaruskaha boku, jaki, pavodle jaho słoŭ, «zaŭsiody starajecca vysłuchać, pahavaryć i pajści nasustrač», zhadvajučy pieranos vajskovych vučeńniaŭ.
«Palakam chapiła niekalki dzion dla taho, kab admovicca ad niapravilnaha rašeńnia. Što, vyjhrali ad hetaha prymiežnyja rajony Polščy, kali tam kazali, što niekatoryja prymiežnyja rajony žyvuć tolki za košt tranzitu? Ale zaraz što, krainy Bałtyi ad hetaha vyjhrali? Tamu ja liču, što treba ŭsio ž taki nam adychodzić ad takoha rodu ekscesaŭ, ja maju na ŭvazie z boku našych kalehaŭ u krainach Bałtyi, i žyć mirna, jak susiedzi, jak my heta i inicyjujem».
Siońnia stała viadoma, što miaža budzie zakryta jak minimum da sierady.
«Zamiest taho, kab naładzić kamunikacyju, Vilnia praciahvaje iści pa šlachu eskałacyi», — hrozna zajaŭlaje telehram-kanał «Nievalfovič».
Varta adznačyć, što mnohija dziaržaŭnyja i dazvolenyja niedziaržaŭnyja ŚMI, paviedamlajučy pra časovaje zakryćcio miažy, zusim nie nazyvajuć jaho pryčynaŭ.
Tak biełaruskaje telebačańnie ŭ svaich navinach raskazała tolki pra čaćviorty vypadak zakryćcia miažy za tydzień i źviarnuła ŭvahu na jaho nastupstvy dla prostych hramadzian («stvaraje biazvychadnuju situacyju») i vadzicielaŭ hruzavikoŭ («zvykła z ulikam taho, što litoŭcy i tak pracujuć u 10 razoŭ pavalniej, čym dazvalajuć mahčymaści»).
Kamientary