U Tenieryfe prybyŭ kruizny łajnier z uspyškaj chantavirusa. Pasažyraŭ evakuirujuć i adpraviać u svaje krainy
U port Hranadzilja na ispanskim vostravie Tenieryfe ŭ niadzielu ranicaj prybyło niderłandskaje sudna MV Hondius, na borcie jakoha zafiksavana ŭspyška niebiaśpiečnaha chantavirusa i pamierli try čałavieki.
Ispanskija ŭłady sumiesna z SAAZ raspracavali strohi pratakoł biaśpieki dla vysadki ludziej. Sudna staić na jakarnaj stajancy na maksimalnaj adlehłaści ad pryčała, a pasažyraŭ dastaviać na bierah nievialikimi łodkami pa 10 čałaviek.
Pieršymi bort pakinuli 14 ispancaŭ, jakich adrazu nakiravali ŭ vajskovy špital dla poŭnaj izalacyi i PCR-testavańnia.
Dla astatnich zamiežnikaŭ Hiermanija, Francyja, ZŠA i inšyja krainy ŭžo nakiravali śpiecrejsy, kab evakujavać svaich hramadzian adrazu paśla pravierki miedykami.
Niahledziačy na pratesty miascovych žycharoŭ, jakija prajšli napiaredadni, SAAZ nastojvaje, što ryzyka dla hramadskaha zdaroŭja na vostravie zastajecca nizkaj.
Chantavirus, jaki pieranosicca hryzunami, vyklikaje ciažkija paražeńni lohkich i nyrak. Śpiecyfičnaha lačeńnia nie isnuje, a śmiarotnaść pry niekatorych formach zachvorvańnia dasiahaje 40%.
Na hety momant novych simptomaŭ u tych, chto zastaŭsia na borcie, pakul nie vyjaŭlena, adnak troje chvorych byli ekstrana evakujavany jašče padčas prypynku na Kaba-Vierde.
Łajnier, jaki vyjšaŭ z Arhienciny jašče 1 krasavika, staŭ miescam trahiedyi: ad infiekcyi tam pamierli try čałavieki — pažyłaja para ź Niderłandaŭ i hramadzianka Hiermanii.
Ciapier čytajuć
Kolkaść sudoŭ pa palityčnych kryminałkach źmienšyłasia ŭ razy13
Kamientary
Prablema ŭ tym, što inkubacyjny pieryjad u chantavirusa zanadta doŭhi - da 8 tydniaŭ, tamu ciahniecca ŭsia hetaja badziaha z pasažyrami łajniera