Iranski ŭrok. KNDR uviała aŭtamatyčny jadzierny ŭdar u vypadku zabojstva Kim Čen Yna
Paŭnočnaja Kareja ŭniesła źmieny ŭ Kanstytucyju, jakija abaviazvajuć vajskoŭcaŭ nieadkładna nanieści jadzierny ŭdar u adkaz, kali vyšejšy kiraŭnik krainy budzie zabity abo nie zmoža vykonvać svaje abaviazki ŭ vyniku ataki, piša The Telegraph.
Šturškom dla pryniaćcia takich mier stała niadaŭniaja apieracyja ZŠA i Izraila, padčas jakoj byŭ zabity viarchoŭny lidar Irana Ali Chamieniei i jaho bližejšaje asiarodździe. Hetaja likvidacyja mocna napałochała Kim Čen Yna, piša vydańnie.
Pchieńjan ubačyŭ «nievierahodnuju efiektyŭnaść» vysokadakładnych udaraŭ i vyrašyŭ stvaryć miechanizm harantavanaj pomsty, navat kali centralizavanaje kamandavańnie budzie źniščana.
Zhodna z novaj redakcyjaj artykuła 3 zakona ab jadziernaj palitycy, kali sistema kamandavańnia apyniecca pad pahrozaj, jadzierny ŭdar pavinien być naniesieny «aŭtamatyčna i nieadkładna».
Asnoŭnaj cellu dla ŭdaru ŭ adkaz KNDR razhladaje Złučanyja Štaty.
Adnačasova ź jadziernymi pahrozami Pchieńjan uzmacniaje zvyčajnaje ŭzbrajeńnie. Kim Čen Yn asabista prainśpiektavaŭ vytvorčaść novych 155‑mm samachodnych haŭbic z dalokaściu strełu bolš za 60 km. Hetaja artyleryja pavinna być razhornuta ŭzdoŭž miažy ŭžo ŭ hetym hodzie.
U zonie paražeńnia apyniecca Sieuł (jaki znachodzicca ŭsiaho za 56 km ad miažy) i klučavyja pramysłovyja centry Paŭdniovaj Karei.
Pchieńjan aficyjna vykraśliŭ z Kanstytucyi zhadki pra mirnaje abjadnańnie Karej i ciapier adkryta nazyvaje Sieuł svaim hałoŭnym voraham.
Kamientary