Minski hastrabar ź biełaruskaj kuchniaj chacieŭ razdavać sałdackuju kašu. Ale admoviŭsia ad idei, bo narod nie zacaniŭ
Akcyja kafe da 9 Maja vyklikała šmat sprečak.
«Zaŭtra z 12:00 budziem častavać vas sałdackaj kašaj, a taksama zmožacie atrymać biaspłatnuju nastojku», — taki dopis apublikavaŭ u Treds minski hastrabar «Łampa», jaki choča być samaj lampavaj biełaruskaj ustanovaj.
Aŭdytoryja ideju nie zacaniła. Niechta napisaŭ kamientar, što siońnia ŭ mnohich papoŭnicca čorny śpis ustanoŭ, i atrymaŭ amal tysiaču padabajek.
«Barani mianie kot ad sałdackaj kašy i biaspłatnaj čarki», «Znoŭ ramantyzacyja vajny», — pišuć.
«Vy tak dobra pačynali… navošta heta ŭsio?? Jakaja nafih kaša sałdackaja??? Jak jana kareluje z vašym biełaruskim mieniu?? Nu što ž vy robicie sami z saboj?» — zadajecca pytańniami inšy kamientatar.
Adrazu niekalki čałaviek zhadali razdaču blinoŭ z łapaty, jak heta niekali rabili ŭ Rasii, tamu pačali ŭdakładniać pra mietad padačy stravy: «A bliny z łapaty?», «Z rydloŭki choć?».
Chacieli pryvabić turystaŭ z Rasii?
Mnohija adznačyli, što takija zabavy dakładna nie dla biełarusaŭ, tamu pačali zadavać šmat pytańniaŭ, ci nie na haściej z uschodu idzie raźlik.
«Heta vy tak rasijskich turystaŭ zavablivajecie?», «Heta vy dla pryjezdžych rasijan, vidać, pastaralisia».
«Narešcie źjaviłasia miesca, jakoje možna śmieła rekamiendavać haściam «Biełorusii», — ź ironijaj napisaŭ adzin kamientatar.
Prysłuchalisia da kamientataraŭ
Prykładna praz 13 hadzin paśla abviaščeńnia akcyi va ŭstanovie apublikavali infarmacyju, što pačuli mierkavańni ludziej, tamu admovilisia ad zadumy.
«My admianiajem palavuju kuchniu. Bačym usie vašy paviedamleńni, reposty, tredsy — pryznajom, što hetaja ideja ad nas niaŭdałaja pa roznych pryčynach.
My z samaha pačatku staralisia da vas prysłuchoŭvacca i praciahvajem heta rabić. Vy dla nas važnyja».
Hety dopis nabraŭ bolš za sotniu kamientaroŭ.
Voś jak hučyć samy ŭpadabany: «Chłopcy, vy — małajcy! Ja vami hanarusia! Takaja sapraŭdnaja biełaruskaść mnie padabajecca. Zvyčajna ŭ takich situacyjach biełaruskija biznesy znosiać usie pasty, zhadki i robiać vyhlad, što ničoha nie było.
Vy pakazali prykład hodnaha i sumlennaha staŭleńnia da svaich haściej. Pamylacca — nie strašna. Strašna — nie pryznavać svaje pamyłki i nie vypraŭlać ich», — napisała žančyna.
Palacieła z abodvuch bakoŭ
Pry hetym siarod kamientaroŭ možna znajści i mierkavańni tych, chto ličyć, što chalaŭnaja palavaja kaša z čarkaj mohuć nie padabacca tolki tym, chto źjechaŭ ź Biełarusi i žyvie ŭ krainach ES.
«A jašče čaho heta vy ŭ Biełarusi pracujecie, a nie pierajechali ŭ Polšču? Usim viadoma, što samyja «pravilnyja» i «dobryja» žyvuć u Polščy i Litvie i nie śviatkujuć 9 Maja. Budźcie ŭžo da kanca paśladoŭnymi i mihrujcie na radaść tym, pad kaho vy mimikryrujecie. Dno, adnym słovam», — napisaŭ mužčyna.
Što za «Łampa»?
Ustanova zusim niadaŭna adkryłasia i pracuje ŭ testavym režymie. Siabie «Łampa» pazicyjanuje jak biełaruskuju kuchniu biez pafasu pad etna-matyvy.
Mieścicca hastrabar pa adrasie Kastryčnickaja, 23. Raniej tam byli «Iskra» i Enzo.
Kamientary
A Vy točno mirnyja ludzi?