U Jeŭropie ŭ adzin dzień zaharelisia dva NPZ, jakija atrymlivajuć rasijskuju naftu
U adzin dzień u Jeŭropie adbylisia dva incydenty na naftapierapracoŭčych zavodach, jakija pracujuć na rasijskaj syravinie. Uviečary 20 kastryčnika ŭspychnuŭ pažar na NPZ kampanii MOL u vienhierskim horadzie Sazchałambat, a taksama adbyŭsia vybuch na pradpryjemstvie ŭ rumynskim Płaješci, jakoje naležyć «ŁUKOJŁu», piša The Moscow Times.
Pažar na zavodzie MOL, jaki źjaŭlajecca hałoŭnym NPZ Vienhryi i pierapracoŭvaje ŭ tym liku naftu, što pastaŭlajecca pa paŭdniovaj halinie trubapravoda «Družba», da ciapierašniaha momantu łakalizavany, pieradaje «24.hu». Mer Sazchałambaty Michaj Viezier udakładniŭ, što achviar i paciarpiełych niama, a pryčyny zdareńnia vyśviatlajucca. Premjer-ministr Viktar Orban u Facebook paviedamiŭ, što abmierkavaŭ situacyju z kiraŭnictvam MOL i ministram unutranych spraŭ, zapeŭniŭšy, što pastaŭki paliva ŭ Vienhryju znachodziacca ŭ biaśpiecy.
U Rumynii vybuch na NPZ «ŁUKOJŁa» adbyŭsia padčas ramontnych rabot. Pavodle danych miascovaj palicyi, incydent zdaryŭsia ŭ naziralnym kałodziežy trubapravoda z-za skopišča hazaŭ ad uciečki adchodaŭ. U vyniku paciarpieŭ 57‑hadovy supracoŭnik, jaki atrymaŭ traŭmy hałavy i nahi ad bietonnaj nakryŭki kałodzieža. Zaviedziena kryminalnaja sprava ab parušeńni techniki biaśpieki.
Abodva zavody zaležać ad rasijskich pastavak nafty. NPZ MOL u Vienhryi i Słavakii atrymlivajuć syravinu praz trubapravod «Družba», nahadvaje Reuters. U kastryčniku 2024 hoda kampanija zajaŭlała pra płany pavialičyć dolu pierapracoŭki nierasijskaj nafty da 100% da kanca 2026 hoda. Rumynski NPZ «ŁUKOJŁa», nabyty ŭ 1998 hodzie, źjaŭlajecca adnym z najbujniejšych u krainie z mahutnaściu pierapracoŭki 2,5 młn ton na hod.
Kamientary