Dziadźka Alik u žyćci nie pje čarlik: historyja błohiera, jaki paradziruje vypivochu z vašaha dvara
Papularny błohier Andrej Chandoha, bolš viadomy ŭ vobrazie ałkaša z vašaha dvara — dziadźki Alika, naohuł nie vučyŭsia na artysta. Pa svajoj prafiesii inžyniera-ekanamista jon nikoli nie pracavaŭ, ale vykanańnie pjanaj pachodki dziadźki Alika stała kultavym u sacyjalnych sietkach i źbiraje miljony prahladaŭ. Vydańnie «Pieršy» pahavaryła z Andrejem pra jaho vobraz i pra toje, jak jon ledź nie atrymaŭ žoŭtuju kartku za chadu dziadźki Alika.
U Andreja Chandohi ŭ ahulnym liku ŭ instahramie, tyktoku i jutubie bolš za 200 tysiač padpisčykaŭ. Videa ŭ tyktoku časta pieravalvajuć za niekalki miljonaŭ prahladaŭ. Najbolš Andrej viadomy dziakujučy vobrazu dziadźki Alika, pra jakoha i viadziecca havorka.
— Andrej, adrazu pytańnie ŭ łob: dziadźka Alik u žyćci lubić «čarlik»? Ci časta pje Andrej Chandoha, i jakim ałkaholnym napojam addaje pieravahu, kali davodzicca?
— Dziadźka Alik, kaniečnie, užyvaje, a što tyčycca mianie, jak Andreja, to ja ŭ žyćci ŭvohule nie ŭžyvaju śpirtnoje, ni ŭ jakim vyhladzie, i nie kuru. I nikomu nie raju. Heta ŭ mianie taki kantent — prosta ŭśmichnucca, paśmiajacca.
— Paradziravanaja vami pachodka dziadźki Alika adrazu spadabałasia mnohim padpisčykam, bo jany paznali ŭ joj pachodku pjanicy sa svajho dvara. Ci doŭha vy vučylisia jaje vykonvać i jak naohuł źjaviŭsia hety vobraz?
— Mabyć, u kožnym dvary byŭ choć adzin taki, u susiednim dvary jašče adzin, padobnyja ałkaholiki. Bačyŭ ich ź dziacinstva i hetuju pachodku ŭmieŭ užo paradziravać hadoŭ dvaccać tamu. Asabliva i nie treniravaŭsia. Tak, paru razoŭ pasprabavaŭ, z chłopcami paśmiajalisia ŭ dvary — i ŭsio.
I paśpiachova ja zabyŭsia pra hetuju pachodku na stolki hadoŭ. A dva hady tamu prosta pierarabiŭ adnu pieśniu Hanny Aści «Caryca». Pierarabiŭ jaje ŭ pradavačku. Uźnikła ideja videa, jak ałkaholik prychodzić uziać u doŭh butelku vina. Jamu tak kiepska, što jon adychodzić za kramu i dryžačymi rukami vypivaje.
Źniaŭ hetaje videa, ale tam była prosta pachodka pjanoha čałavieka. Imia ŭ piersanaža jašče nie było. Alikam nazvaŭ jaho paźniej, prykładna praz paŭhoda, kali ŭspomniŭ, što ŭmieju tak chadzić. I vyrašyŭ dadać hetuju pachodku ŭ vobraz. Zahruziŭ u instahram i tyktok — ludziam spadabałasia. Zrazumieła, što nie adrazu miljony prahladaŭ, ale sotni tysiač naźbirałasia. Ludzi ŭśmichnulisia, i ja zrazumieŭ: treba rabić jašče.
— Jak ludzi reahujuć na hetaha piersanaža ŭ žyćci? Ci paznajuć vas na vulicy?
— U asnoŭnym, kali chodziš, zdymaješ, usim usio adno. Ale niekatoryja, kali ja ŭ vobrazie Alika, paznajuć. Kali biez vobraza, to asabliva, kali ščyra, nie paznajuć. Moža, heta navat i dobra — ja spakojna chadžu pa vulicach. Chacia kali chto i paznaje, to z zadavalnieńniem spyniusia, sfatahrafujusia, pahavaru.
— Ci zdarajecca, što hledačy vierać u «realnaść» dziadźki Alika i dumajuć, što heta vy taki na samaj spravie?
— Kali ja pačaŭ vykładać pieršyja maje pachodki, vyhladała, nibyta niechta zdalok zdymaje pjanoha dziadźku. I prosta videa z nakładzienaj muzykaj. Pieršyja miljonnyja prahlady — ludzi ŭ kamientaryjach upeŭniena pisali, što idzie pjany. Niekatoryja navat: «Navošta vy pjanoha zdymajecie, heta ž chvaroba?» Potym pačali pryzvyčajvacca, paznavać. Ciapier bolšaść užo viedaje, što jość taki dziadźka Alik.
— U jaki momant vy zrazumieli, što vaš kantent sapraŭdy «streliŭ» i spadabaŭsia hledačam? I čamu, na vašu dumku?
— Heta było rańniaj viasnoj 2025 hoda. My z Panam Usialanam pajšli razam 8 sakavika zdymać. Paru žartaŭ zrabili — pa rajonach u Minsku chadzili ź ciulpanami, padali, valalisia, karaciej, dureli. Tady kantent pačaŭ narmalna «zalatać». Viasna była plonnaja, a ŭ kancy leta pajšła druhaja chvala.
— Ci nie było krytyki, što dziadźka Alik «ramantyzuje» pjanstva? Ci jość chiejtary?
— Zrazumieła, što kali videa nabiraje 3—5 miljonaŭ, tam buduć tysiačy kamientaroŭ. Chtości moža i krytyku napisać. Ale niehatyvu asabliva niama. U asnoŭnym usie adekvatnyja, śmiajucca, viesialacca. Złosnych chiejtaraŭ amal niama. Ja biaru na siabie tolki pazityŭ i radujusia, što ludzi razumiejuć hety humar, im viesieła, im padabajecca maja pachodka.
— A jašče vy hulajecie za miedyjnuju futbolnuju kamandu «Infarm». Navat pry zdymkach anonsaŭ matčaŭ umudrajeciesia ŭstavić tudy dziadźku Alika ŭ vobrazie futbalista. Heta vyhladaje niesumiaščalna, ale mienavita tamu vielmi śmiešna. Asabliva, kali ŭličyć jaho futbolny numar — 0,7, jak asacyjacyja z pamieram butelki. Raskažycie pra svoj futbolny dośvied i ŭražańni ad kamandy.
— Viasnoj, kali kantent pačaŭ «stralać», mnie napisaŭ Uład Chavanski (futbolny błohier) i zaprasiŭ u kamandu «Infarm». Pieršy vyjezd u Łuniniec ja prapuściŭ, ale hladzieŭ tranślacyju. Heta było kruta. Da hetaha ja asabliva nie cikaviŭsia miedyjnym futbołam, tolki viedaŭ, što jość takaja kamanda.
A kali ŭbačyŭ, kolki ludziej pryjšło ŭ Łunincy, vyrašyŭ, što na nastupny matč u Chojnikach užo pajedu. Heta i byŭ moj pieršy vyjezd — tamu i niezabyŭny. Nas tam vielmi ciopła sustreli. Pahulali ŭ futboł, sfatahrafavalisia, razdali aŭtohrafy. I ja zrazumieŭ, što vyjezdy z «Infarmam» — heta vielmi kruta. My pryvivajem luboŭ da futbołu i sportu.
Tak, Alik u svaich anonsach vyhladaje śmiešna. U jaho nibyta minułaje futbalista — dynamaŭskaja futbołka z numaram 0,7. Mnie b taksama chaciełasia mieć taki numar u «Infarmie».
— Pomnicca, kali vy pryjazdžali ŭ Ivacevičy na matč, to prosta padčas hulni vykanali svaju pachodku dziadźki Alika. Sudździa, zdajecca, niešta byŭ niezadavoleny.
— Tak, heta byŭ pieršy raŭnd Kubka Biełarusi. Ja razumieŭ, što treba vyjści z pachodkaj dziadźki Alika. Praŭda, na Kubak patrebien bolš surjozny skład, tamu vypuścili mianie tolki na apošnija 15 chvilin, kali vynik užo dazvalaŭ.
Vyjšaŭ svajoj pachodkaj — pryhoža. Škada tolki, što heta było daloka ad trybun. Ale źniali i na telefon, i ŭ žyvoj tranślacyi pakazali. Ja i nie dumaŭ, što sudździa adreahuje. Prajšoŭ try siekundy, videa źniali — i pabieh dalej.
A tut sudździa padchodzić: maŭlaŭ, što vy robicie, navošta pryciahvajecie ŭvahu? Ja adkazaŭ, što prosta pažartavaŭ. Jon skazaŭ: jašče raz takoje paŭtorycca — atrymaješ žoŭtuju kartku. Dobra, bolš mnie i nie treba było. Adzinaje, kali b ja zabiŭ hoł, to ŭžo naŭmysna prajšoŭsia b pachodkaj i atrymaŭ žoŭtuju kartku. Ale mianie pastavili ŭ apornuju zonu, tamu momantaŭ kranuć miač asabliva nie było.
— Ci chočacie vy raźvivać dziadźku Alika jak doŭhaterminovy prajekt, ci heta chutčej adzin z etapaŭ? Jakija płany?
— Ja pačaŭ zdymać videa daŭno, jašče z 2019 hoda. Byli roznyja vobrazy — babka, što telefanavała ŭ kamunalnyja słužby, miascovy aŭtarytet, «dziaŭbun» — syn babki… Karaciej, kožny vobraz niešta źbiraŭ patrochu. Pačynałasia z prankaŭ hołasam babki, niejkuju aŭdytoryju ja ź ich nabraŭ. Potym užo i Alik źjaviŭsia.
Pieraskokvać z vobraza na vobraz, zdymać usio adrazu — ciažkavata, ščyra kažučy. Kali vobraz palubiŭsia, ja jaho raźvivaju. Mahčyma, niekali i Alika spynim zdymać. Ale pakul mnie z Alikam viesieła, mnie padabajecca, ludziam taksama padabajecca. Nie baču sensu spyniacca. Možna dadavać niešta novaje, razbaŭlać. Idej dla Alika šmat, voś tolki času brakuje. Ale chutka budzie bolš času, i budzie bolš videa, bolš piesień. Mnie padabajecca pieśni składać, klipy zdymać.
— Kali jakoje pytańnie nie zadaŭ, ale vy chacieli b skazać.
— Chacieŭ by padziakavać usim maim padpisčykam, chto hladzić mianie, kamu cikavaja maja tvorčaść. Vielmi šmat kamientaroŭ, vodhukaŭ, u asabistyja paviedamleńni pišuć, dziakujuć za kantent. Mnie vielmi pryjemna, što ŭ mianie kłasnyja padpisčyki. Starajusia kožnamu nadać uvahu, pahutaryć, nakolki heta mahčyma. Budu i dalej radavać vas kantentam.
Čmiakajuć, siorbajuć i ližuć palcy: chto ź biełarusaŭ padniaŭsia na mukbanhu
Bulba-fitnes: biełarusy pakazvajuć u sacyjalnych sietkach, kolki bulby vykapali sioleta
Jak 23‑hadovy chłopiec z homielskaj vioski źbiraje sotni miljonaŭ prahladaŭ na kaskadziorskich trukach i maje kantrakt z Red Bull
Błohier paraŭnaŭ košt adpačynku ŭ sanatoryi «Radon» z pajezdkaj na kitajski vostraŭ Chajnań — i byŭ šakavany
Praŭładnaj błohiercy Andžališy zrabili prapanovu ruki i serca na 3 lipienia
Błohierka Baba Niura raźviałasia z mužam-dalnabojščykam i syšłasia z hitarystam «Drazdoŭ»
Ciapier čytajuć
Palitviazień Kim Samusienka paraŭnaŭ śviet na momanty jaho pasadki i vyzvaleńnia: Usio niadrenna dla jeŭrapiejskaj cyvilizacyi, a značyć, i dla biełarusaŭ2323
Kamientary