Maci Kaciaryny Vadanosavaj zastajecca ŭ Polščy. Sud vynies pramiežkavaje rašeńnie
Pryznačanaja na paniadziełak 6 kastryčnika departacyja Neli Vadanosavaj z Polščy ŭ Litvu nie adbudziecca. Maci śpiavački i viadoŭcy Kaciaryny Vadanosavaj chacieli adpravić u Litvu praz toje, što jana ŭjechała ŭ Jeŭrasajuz pa litoŭskaj vizie, a padałasia na mižnarodnuju abaronu ŭ Polščy. Jurystka Hanna Macijeŭskaja, jakaja zajmałasia hetaj spravaj, paviedamiła «Radyjo Svaboda» pra rašeńnie Varšaŭskaha administracyjnaha suda i patłumačyła, što nasamreč adbyłosia.
Varšaŭski administracyjny sud vynies rašeńnie ab ustrymańni vykanańnia rašeńnia ŭ spravie Neli Vadanosavaj. Sama sprava budzie razhladacca naprykancy kastryčnika, paviedamiła Hanna Macijeŭskaja.
«Adbudziecca pasiadžeńnie pa Dublinskim rehłamiencie. Pieršaja instancyja vydała rašeńnie — zakryć spravu ab uciokach i nakiravać spravu ŭ Litvu. I Pamiežnaja słužba pavinna była heta vykanać, tamu jany i pryjšli da Kaciaryny».
Jurystka Hanna Macijeŭskaja padkreślivaje, što ŭ polskaj praktycy jość asobnyja rečy, źviazanyja jak z abskardžańniem sudovaha rašeńnia, tak i z vykanańniem administracyjnaha rašeńnia ŭ pieršaj instancyi.
«Asobna abskardžvajecca sudovaje rašeńnie, asobna sud razhladaje spravu vykanańnia. Tut polskaja Pamiežnaja słužba vyznačyła davoli chutki termin — u aŭtorak jany pryjšli da Kaciaryny, a ŭ paniadziełak užo pryznačyli vykanańnie rašeńnia, to-bok ciaham šaści dzion».
Advakatka tłumačyć, što siamja padała zajavu ab ustrymańni vykanańnia rašeńnia, tolki na toj momant sud jaje jašče nie paśpieŭ razhladzieć. Macijeŭskaja ŭdakładniaje jurydyčnuju terminałohiju.
«Heta nie departacyja. Toje, što Kaciaryna tak heta sfarmulavała, — heta narmalna, tamu što ludzi nie zaŭsiody viedajuć jurydyčnyja farmuloŭki. Nasamreč heta było vykanańnie rašeńnia pa Dublinskim rehłamiencie».
Pavodle jurystki, takija pracedurnyja rečy mohuć zdaracca, ale jana razumieje, što heta emacyjna vielmi turbuje siamju, jakaja znachodziłasia ŭ padviešanym stanie. Hanna Macijeŭskaja ličyć dobraj spravaj šyroki rozhałas u hetaj prablemie.
«Ja ŭžo paŭtara hoda kažu pra «Dublin», jak jon zakranaje biełarusaŭ. Mnie, kaniečnie, krychu škada, što hetaja tema stała bolš publičnaj tolki tady, kali pačali vychodzić palitviaźni, jakich prymusova departavali. Uvohule hetaja tema ciapier vielmi surjoznaja dla biełarusaŭ.
Ja baču, što biełaruskija palityki pačali varušniak u hetym pytańni. Apošni hod ja ŭzdymała hetuju temu razoŭ dziesiać. I jana sapraŭdy balučaja dla biełarusaŭ.
Ja baču, što isnuje absalutna instrumientalny padychod da hetych spraŭ. To-bok, jość viza — jedź mienavita ŭ Litvu. Nie biarucca pad uvahu vielmi surjoznyja humanitarnyja pryčyny. Maju nadzieju, što naprykancy kastryčnika budzie jašče adna pazityŭnaja sprava razhladu pa «Dublinie». Bo jość vyniki pracy advakata».
Na pytańnie, ci źviazana rašeńnie suda z šyrokim rozhałasam, jaki źjaviŭsia paśla taho, jak Kaciaryna Vadanosava paviedamiła publična pra hetuju prablemu, jurystka adkazvaje admoŭna.
«Nie. Ja rastłumaču čamu. Vyrašaje sud. Treba było skantaktavacca z sudom. Tyja, chto nie mieŭ dačynieńnia da suda, pa sutnaści, nie spryčyniajucca da hetaha pytańnia. Ja nie suprać, što ŭvohule hetaja tema padśviečvajecca, heta supier, bo Kaciaryna — viadomaja asoba. Kali my kažam pra prablemy, to jany bolš zaŭvažalnyja. Ale ŭ sensie vyrašeńnia heta vyklučna vynik mienavita jurydyčnaj pracy. Usio vyrašaje vyklučna sud. Treba taksama razumieć, što na sud palityčnyja struktury nie majuć upłyvu, bo Polšča — demakratyčnaja kraina».
Kaciaryna Vadanosava atrymała šmat reakcyj na svoj dopis u sacyjalnych sietkach, u tym liku ad daradcy Śviatłany Cichanoŭskaj u pravavych pytańniach Leanida Marozava, jaki zaniaŭsia hetaj spravaj i nakiravaŭ listy padtrymki ŭ adpaviednyja struktury.
Jak paviedamiŭ «Radyjo Svaboda» Marozaŭ, u adkaz na list padtrymki ad Ofisa Śviatłany Cichanoŭskaj Pamiežnaja słužba Polščy paviedamiła jamu ŭ liście, što Neli Vadanosava «ciapier nie źjaŭlajecca bokam nivodnaha pracesu, jaki viadzie Pamiežnaja varta, pry hetym rašeńni ab vyznačeńni adkaznaj dziaržavy zastajucca ŭ vyklučnaj kampietencyi Kiraŭnika ŭpraŭleńnia ŭ spravach zamiežnikaŭ». Tudy taksama byŭ nakiravany list padtrymki ad Ofisa kiraŭnicy demakratyčnych sił Biełarusi.
Kaciaryna Vadanosava raspaviała, što jaje maci departujuć z Polščy ŭ Litvu
13 niadaŭna vyzvalenych i vyviezienych u Litvu palitviaźniaŭ vykazali žadańnie lehalizavacca ŭ Polščy
Kali biełarus chutka nie atrymaje dazvoł na žycharstva ŭ Polščy, jaho žonku i dačku mohuć adpravić u Hiermaniju
«Historyja nie vyklikaje davieru». Polšča pieradała Litvie spravu ab mižnarodnaj abaronie biełaruski, jakaja časta jeździła ŭ kamandziroŭki
Kamientary