Kali biełarus chutka nie atrymaje dazvoł na žycharstva ŭ Polščy, jaho žonku i dačku mohuć adpravić u Hiermaniju

Iryna pryjechała ŭ Polšču ŭ 2024 hodzie. Pierajezd ź Biełarusi byŭ niepłanavany. Jaje zatrymali siłaviki — i žančyna zrazumieła: joju cikaviacca ŭ suviazi z aktyŭnaściu ŭ 2020 hodzie. Tady času na rozdum było niašmat. U pašpartach — jaje i dački — byli adkrytyja pa inšaj pryčynie niamieckija vizy. Polšča zdavałasia blizkaj krainaj z zrazumiełaj movaj i biełaruskaj dyjasparaj. Tak žančyna apynułasia ŭ hetaj krainie ŭ vymušanaj emihracyi. Pryznajecca: u dzień adjezdu pra budučuju lehalizacyju jana nie dumała.

Užo ŭ Polščy žančyna daviedałasia pra miechanizm mižnarodnaj abarony i padała zajavu za siabie i dačku. A jašče daviedałasia ad jurystaŭ pra Dublinski rehłamient, jaki moža akazacca dla jaje niespryjalnym.

Dublinski rehłamient — heta pahadnieńnie, jakoje vyznačaje, jakaja kraina ES pavinna razhladać zajavu ab mižnarodnaj abaronie. U ahulnym vypadku heta kraina, što vydała zamiežniku dakumient dla ŭjezdu ŭ ES abo dazvoł na znachodžańnie. A kali takoha dakumienta nie było — kraina pieršaha ŭjezdu ŭ ES.

Dla Iryny i jaje dački takoj krainaj źjaŭlajecca Hiermanija. Heta značyć, što mienavita tam pavinna razhladacca ich prašeńnie ab mižnarodnaj abaronie. Pra heta i havaryłasia ŭ rašeńni Upraŭleńnia pa spravach zamiežnikaŭ, jakoje razhladała ich spravu.

Ale rehłamient dazvalaje rabić vyklučeńni: uličvać humanitarnyja abstaviny abo siamiejnyja suviazi. Tady sprava nakiroŭvajecca toj dziaržavie, ź jakoj ciesna źviazany zajaŭnik abo dzie žyvuć jaho muž/žonka, niepaŭnaletnija dzieci abo baćki niepaŭnaletnich.

Karani muža mohuć dapamahčy

Muž i syn Iryny spačatku zastavalisia ŭ Biełarusi. Ale potym pryjechali ŭ Polšču. U mužčyny polskija karani, tamu jany z synam padali dakumienty na pastajanny dazvoł na žycharstva (stały pobyt) na hetaj padstavie. Ale heta adbyłosia ŭžo paśla taho, jak Upraŭleńnie pa spravach zamiežnikaŭ pryniało rašeńnie nakiravać spravu žančyny ŭ Hiermaniju.

Atrymaŭšy adkaz, jana paviedamiła dziaržaŭnamu orhanu pra namier muža i syna atrymać DNŽ u Polščy, adnak rašeńnie zastałosia tym samym.

Tady žančyna padała apielacyju. Jaje sprava pakul razhladajecca, jak i spravy ab DNŽ. Kali mužu i synu daduć stały pobyt raniej, čym budzie razhledžana apielacyja pa spravie ab mižnarodnaj abaronie, žančyna atrymaje žalezny arhumient dla razhladu jaje spravy ŭ Polščy. Kali paźniej — joj mohuć admović i nakiravać spravu ŭ Niamieččynu. U takim vypadku ŭ jaje jašče zastaniecca mahčymaść abskardzić admovu ŭ sudzie.

— Dačka ŭpieršyniu była vyrvanaja sa svajho asiarodździa i pieražyła stres. Tolki pačała adaptavacca, zavodzić siabroŭ… i znoŭ kudyści pierajazdžać — heta vielmi ciažka. A niemcy, u adroźnieńnie ad palakaŭ, nie razumiejuć našaj situacyi, jany redka dajuć abaronu [biełarusam] — byccam viartacca ŭ Biełaruś dla nas biaśpiečna, — tłumačyć Iryna.

• 0
• 0
• 0
• 1
• 0
• 1
• 0
• 0