Cichanoŭskaja moža naviedać Ukrainu ŭ kancy lutaha — pačatku sakavika
Demakratyčnaja lidarka Biełarusi moža naviedać Kijeŭ u kancy hetaha ci pačatku nastupnaha miesiac. Pra heta jana paviedamiła ŭ intervju RBK-Ukraina.
Nahadajem, što Uładzimir Zialenski zaprasiŭ jaje ŭ Kijeŭ padčas sustrečy ŭ Vilni 25 studzienia. Jak jana raspaviała RBK-Ukraina, vizit moža adbycca naprykancy hetaha abo na pačatku nastupnaha miesiaca.
U razmovie z RBK-Ukraina jana pastajanna padkreślivała, što Łukašenka źjaŭlajecca saŭdzielnikam rasijskaj ahresii suprać Ukrainy i za heta taksama pavinien panieści, u pryvatnaści, kryminalnuju adkaznaść na mižnarodnym uzroŭni. Dasiahnuć hetaha pakarańnia dla dyktatara Cichanoŭskaja imkniecca i ŭ supracoŭnictvie z Ukrainaj.
Jana taksama raskazała pra vyraznuju miažu pamiž biełaruskimi i rasijskimi apazicyjnymi siłami.
«Pa-pieršaje, našaj čyrvonaj linijaj zaŭsiody była ideja, što biełarusy — heta nie režym, i biełarusy — heta nie rasijanie. My inšyja, u nas niama impierskich ambicyj, i bolšaść biełarusaŭ vystupaje suprać vajny», — kaža jana.
Cichanoŭskaja skazała, što sustreča z prezidentam Zialenskim była dla mianie nadzvyčaj važnaj na praciahu ŭsiaho hetaha času. I hetaja sustreča pakazała, što Ukraina vielmi vyrazna adroźnivaje režym Łukašenki i biełaruski narod.
«Ja liču, što heta i jość asnova novaj palityki Ukrainy ŭ dačynieńni da Biełarusi. Naša sustreča była vielmi mocnym i vyraznym sihnałam, i, dumaju, hety sihnał byŭ pačuty i ŭ Biełarusi», — skazała jana.
Kamientary